VOV4.Êđê- Leh lu hruê mâo nao nao mnuih mâo klei ruă tưp Covid-19 hlăm êpul êya yang ƀuôn ka thâo bĭt phŭn mtưp. Tlam mbruê 29/10, êpul gĭt gai gang mkhư̆ klei ruă tưp Covid-19 ƀuôn prŏng Pleiku čar Gia Lai mâo leh hră mtrŭn mtă kơ dŭm alŭ wăl, anôk bruă ngă mjêč dŭm hdră êlan gang mkhư̆ klei ruă tưp.

Êpul gĭt gai gang mkhư̆ klei ruă tưp Covid-19 ƀuôn prŏng Pleiku mtă kơ knơ̆ng bruă mdrao mgŭn mđĭ klei ksiêm dlăng, kwang dar, mgaih msir tơl tuič dŭm anôk mâo klei ruă tưp, ksiêm mkă kman kluôm anôk mâo klei hyưt, čiăng găn hĕ phŭn mtưp, mbĕ mđuê F0, F1 kbiă mơ̆ng yang ƀuôn, mtă kơ mnuih ƀuôn sang ti ƀuôn prŏng Pleiku tơdah mâo klei êngoh, mtŭk, dleh bi êwa.., srăng nao kơ anôk mdrao mgŭn să, ƀuôn hgŭm ksiêm mkă kman amâo mâo mă prăk. Tlam mbruê, čar mâo 66 čô mâo klei ruă tưp Covid-19 leh anăn 7 čô lŏ wĭt mâo klei ruă tưp wĭt mơ̆ng anôk mâo klei ruă tưp.

Pô mblang: Y-Ƀel Êban