VOV4.Êđê - Aguah hruê 27/10, mâo 326 čô mnuih ƀuôn sang Gia Lai mơ̆ng dŭm čar kwar Dhŭng mâo leh êpul mă bruă mơ̆ng čar drông wĭt ti ƀuôn prŏng Pleiku êđăp ênang. Phung mâo drông gưl anei jing phung hđeh điêt, hđeh gưl sa lehanăn phung amĭ ama, phung hđeh dôk kpăk đuôm ti ƀuôn prŏng Hồ Chí Minh, 2 čar Bình Dương, Đồng Nai.

Leh truh ti ƀuôn prŏng Pleiku, 125 čô mnuih wĭt mơ̆ng ƀuôn prŏng Hồ Chí Minh dưi ba bi ktlah to Anôk mjuăt bi hriăm klei thâo bruă lĭng kahan lehanăn răng mgang klei êđăp ênang  (Trung đoàn Bộ binh 991, Knơ̆ng gĭt gai lĭng kahan čar Gia Lai). Mnuih ƀuôn sang mơ̆ng 2 čar Bình Dương lehanăn Đồng Nai wĭt srăng dưi bi ktlah ti Sang hră gưl krah mrô 21 (Binh đoàn 15). Hdră drông mnuih ƀuôn sang dưi rơ̆ng kjăp klei êđăp ênang, hluê ngă kjăp hdră gang mkhư̆ klei ruă Covid 19./.

H Nêč pô mblang