VOV4.Êđê - Ƀri mlam mlan pur yan hla luh 2021, hruê 20-9, Êpul mă bruă mơ̆ng Knơ̆ng bruă sang čư̆ êa čar Gia Lai nao čhưn, mđup brei mnơ̆ng kơ phung hđeh điêt hlăm dŭm wăl bi ktlah hjăn leh anăn phung hđeh dôk mdrao klei ruă Covid-19 ti čar. Ară anei, kluôm čar Gia Lai mâo 92 čô hđeh dôk bi ktlah hjăn sa anôk leh anăn 23 čô hđeh dôk mdrao klei ruă Covid-19.

Kyua amâo dưi nao ba ti kngan phung hđeh ôh, jưh kơ phung knuă druh, lĭng kahan ti dŭm wăl bi ktlah hjăn, phung hlăm êpul mơĭt leh mnơ̆ng kơ phung hđeh leh anăn hơêč hmưi kơ phung hđeh gưt asăp, suaih pral, hnưm bi leh gưl bi ktlah hjăn, suaih pral čiăng wĭt hŏng gŏ sang. Êngao kơ hnư mnơ̆ng mơ̆ng Knơ̆ng bruă sang čư̆ êa čar Gia Lai, truh tlam 20-9, mâo leh giăm 1000 hnư mnơ̆ng mơ̆ng dŭm anôk bruă, êpul mjuăt ktang asei mlei mđup brei kơ phung hđeh dôk bi ktlah hjăn leh anăn mdrao mgŭn klei ruă Covid-19. Dŭm hnư mnơ̆ng pral mâo phung knuă druh lĭng kahan mđup brei kơ kngan phung hđeh.

H Zawut pô mblang