VOV4.Êđê - Ti anôk hưn mdah tlam hruê 8/9, Anôk gĭt gai hdră gang mkhư̆ klei ruă Covid 19 čar Gia Lai hưn, mơ̆ng 0h mlam hruê 9/9, ƀuôn prŏng Pleiku mjưh hdră bi ktlah yang ƀuôn hluê si Asăp mtrŭn mrô 16/CT-TTg, mbĭt anăn mtă kơ dŭm alŭ wăl hlăm čar čih mkra hdră kčah mđĭ kyar bruă duh mkra hlăm klei găl mrâo msĕ si yang đar. Anôk gĭt gai hdră gang mkhư̆ klei ruă Covid 19 čar Gia Lai mtă brei mdei êjai dŭm hdră ngă bruă amâo čiăng mjêč, sang mnia hliê hluôt, mnuih ƀuôn sang amâo dôk bi nghi êgao 10 čô êngao anôk bruă knŭk kna, sang hră, sang êa drao gŭn, anôk lu mnuih. Anôk čhĭ mnơ̆ng ƀơ̆ng, êa mnăm dưi čhĭ mnia ƀiădah knŏng dưi čhi ba wĭt. Êngao anăn, čar Gia Lai ăt mtă kơ ƀuôn prŏng Pleiku lŏ dơ̆ng kwang dar kjăp hŏng dŭm anôk djŏ tuôm hŏng mnuih ruă mrâo dưi hmao ƀuh hlăm wưng giăm anei, mjêč tui duah, čuăl krĭng, kwang dar hluê krĭng mnuih ƀuôn sang dôk. Hŏng dŭm kdriêk, wăl krah adôk, čar Gia Lai mtă brei čih mkra hdră kčah răng mgang kjăp, pŏk ngă hdră bruă duh mkra – ala ƀuôn hluê hdră mrâo msĕ yang đar./.

H Nêc pô mblang