VOV4.Êđê - Êbeh 34 ha dliê mgang akŏ êa ti Wăl dliê 1065 mơ̆ng Knơ̆ng bruă sang čư̆ êa să H’Bông, kdriêk Čư̆ Sê, čar Gia Lai kriê dlăng bi rai, kuai, hli lăn mơ̆ng mlan 3/2021 truh akŏ mlan 9/2021. Leh 34 ha dliê mâo arăng bi rai jih, 23 ha hlăm anăn pla ana mtŭk, snăn êpul bruă djŏ tuôm ti kdriêk dưi thâo ƀuh, gang mkhư̆. Klei bi rai dliê kjham anei amâo djŏ knŏng ƀuh klei jhŏng mơ̆ng phung ngă soh ôh, ƀiădah lŏ bi êdah klei êdu kƀah hlăm bruă jao lăn, phăn dliê ti alŭ wăl.

Boh klei anăn mâo ti čuê mrô 1; 2; lehanăn mrô 4, hlăm đang dliê mrô 1065, dôk hlăm ênoh dliê pioh răng mgang mâo knơ̆ng bruă sang čư̆ êa să H’Bông, kdriêk Čư̆ Sê kiă kriê. Hlăm kdrăn anăn, phung ngă bruă kă sang čhiăm hŏng djăp ênŭm mnơ̆ng mnuă yua, lehanăn ba êdeh čuk nao čuk hli dliê, pioh pla êbeh 23 ha mkrah ana mtŭk, 11 ha adôk mâo hwai mdoh leh pioh pla kyâo dliê. Rmah H’Bĕ Net, Khua knơ̆ng bruă sang čư̆ êa kdriêk Čư̆ Sê, čar Gialai brei thâo, dŭm êpul bruă hlăm kdriêk bi lač, klei čhuak soh lăn dliê anei jing kjham êdi, mâo êbeh mkrah thŭn hŏng anei leh, mơ̆ng mlan 3 truh mlan 9 thŭn 2021, jing wưng jih bruă kđi čar hlăm alŭ wăl dôk mdrơ̆ng hŏng klei ruă tưp: “Thŭn 2021, kdriêk Čư̆ Sê mâo klei ruă tưp Covid 19. Să H’Bông mâo sa boh alŭ bi kwang dar, snăn jih jang bruă kđi čar ktuh êyuh mdrơ̆ng hŏng klei ruă tưp sơăi, mnuih mă bruă lĕ ƀiă, ksiêm dlăng amâo mâo dưi djăp ênŭm ôh. Kyuanăn, mâo hĕ klei msĕ snei, hmei ăt ƀuh jing klei amâo mâo djŏ ôh êdi”.

Mbĭt hŏng mta phŭn jing msĕ djuê anăn, Bùi Văn Cường k’iăng khua knơ̆ng bruă sang čư̆ êa să H’Bông, kdriêk Čư̆ Sê lač ăt dôk lu klei amâo mâo djŏ hlăm bruă jao lăn phăn dliê, Cường lŏ brei thâo, krah thŭn 2019, leh Dhar bruă răng mgang dliê akŏ êa Ayŭn Pa bi kruh hĕ, mâo jao kơ alŭ wăl êbeh 3 êbâo 800ha dliê, hlăm anăn mâo êbeh 2 êbâo 100 ha jing dliê pioh răng mgang ƀiădah amâo mâo kdrăp mă bruă, amâo mâo djăp mnuih mă bruă snăn dleh dlan hlăm klei kiă kriê. Čuê dliê djŏ kơ alŭ wăl jing dliê bi knông hŏng dua kdriêk Phú Thiện lehanăn Mang Yang, klei anei ăt jing dleh mơh hlăm bruă kiă kriê: “Leh să H’Bông mâo tŭ mă ênhă dliê pioh kiă kriê, hlăm anăn bŏ hŏng klei dleh dlan mtam, msĕ si găn hnoh krông, amâodah dôk plah wah dua kdriêk Phú Thiện lehanăn Ia Pa, dah wăt nao lehanăn wĭt ăt truh 100km. Knơ̆ng bruă sang čư̆ êa să amâo mâo djăp mnuih ngă bruă truăn kơ bruă msĕ hŏng phung ngă bruă dliê kyâo ôh”

Djŏ tuôm hŏng klei bi rai dliê kjham kjhuê̆ anei, Thái Thượng Hải, Khua kiă kriê dliê kyâo kdriêk Čư̆ Sê, brei thâo, êpul êya bruă hlăk jih ai tiê dôk ksiêm bi mklă hŏng phung ngă soh: “Boh klei anei jing kjham leh êdi, snăn anôk bruă dliê kyâo mbĭt hŏng dŭm dhar bruă djŏ tuôm, msĕ si anôk bruă ksiêm dlăng, knơ̆ng bruă ksiêm dlăng kđi soh nao ksiêm mkă hlăm kdrăn. Tal êlâo, ăt mâo iêu leh phung ngă soh, ksiêm êmuh čiăng bi klă hlei jing pô phŭn ngă klei soh anei. Hŏng ênhă dliê leh bi čuk hli, ksul kuai leh hlăm djăp anôk, boh nik anei jing dliê răng mgang akŏ êa, snăn Anôk bruă dliê kyâo kut kat ngă bruă hŏng klei ktang, tui duah pô ngă soh, mghaih msir bi ktang djŏ hŏng hdră bhiăn knŭk kna”.

Mbĭt hŏng bruă kiă kriê jih hnơ̆ng bruă ksiêm êmuh, bi mngač boh klei, knơ̆ng bruă sang čư̆ êa kdriêk Čư̆ Sê ăt hâo mdah leh jih boh klei truh hŏng knơ̆ng bruă sang čư̆ êa čar Gialai, Knơ̆ng bruă lŏ hma čar, akâo jao klei kiă kriê dliê ti alŭ wăl kơ dŭm êpul êya mâo klei kjăp hlăm bruă, pioh răng mgang, kiă kriê bi jăk mâo klei tŭ dưn hĭn./.