VOV4.Êđê- Leh ƀuh 7 čô F0 hlăm êpul êya yang ƀuôn ti ƀuôn prŏng Kon Tum, hruê mbruê, bruă sang čư̆ êa čar Kon Tum bi tŭ ư hŏng klei kčĕ mơ̆ng knơ̆ng bruă mtô mjuăt bi hriăm brei phung hđeh mdei hriăm klă anăp leh anăn kwang dar bruă mdrao mgŭn dŭm anôk mâo klei ruă tưp Covid-19 hlăm yang ƀuôn. Hluê anăn, mơ̆ng hruê anei, jih jang anôk bruă mtô mjuăt bi hriăm ti ƀuôn prŏng Kon Tum srăng mdei klei hriăm klă anăp. Phung hđeh sang hră srăng ngă klei hriăm online ti sang leh anăn dŭm hdră hriăm djŏ guôp mkăn.

Bruă lŏ wĭt hriăm klă srăng lŏ ksiêm dlăng kơ klei ruă tưp alŭ wăl ƀuôn prŏng Kon Tum. Djŏ tuôm hŏng 7 čô F0 hlăm êpul êya yang ƀuôn ti ƀuôn prŏng Kon Tum, bruă sang čư̆ êa čar Kon Tum mâo leh klei bi klă kwang dar anôk mâo klei ruă tưp ti êpul 6, ƀuôn hgŭm Quang Trung, ƀuôn prŏng Kon Tum čiăng gang mkhư̆ klei ruă tưp Covid-19. Anôk bruă mdrao mgŭn ƀuôn prŏng Kon Tum phŭn kčưm bi klă mâo 113 čô F1, 168 čô F2.

Pô mblang Y-Khem Niê