VOV4.Êđê- Aguah mbruê, ti Hà Nội, phŭn bruă hdră êlan leh anăn duh bi liê mkŏ mjing leh klei kƀĭn trông kơ hdră êlan ala čar kơ klei đĭ kyar mtah wưng thŭn 2021-2030, hdră tă truh kơ thŭn 2050. Nao hgŭm hlăm klei kƀĭn trông anăn mâo pô bi ala dŭm phŭn, dhar bruă, alŭ wăl, pô bi ala mơ̆ng ala tač êngao, êpul êya tar rŏng lăn, ƀĭng hgŭm đĭ kyar, phung bi ala dŭm knơ̆ng bruă, phung ksiêm hriăm, phung thơ̆ng kơ bruă ksiêm duah. Hdră êlan anei ba mdah 4 mta kñăm yuôm bhăn mâo, bi hrŏ êwa čhŏ sang ală kĭng, bi mtah dŭm bruă duh mkra, bi mtah knhuah hdĭp leh anăn mtrŭt mđĭ klei ba yua kjăp leh anăn bi mtah klei bi mlih. Boh nik, mta kñăm tal êlâo jing bi hrŏ hnơ̆ng êwa čhŏ sang ală kĭng dlông GDP, đru bi mguôp hlăm bruă kñăm mdua, răng mgang wăl hdĭp mda, bi mguôp kjăp hŏng klei đĭ kyar hmar, kjăp. Hdră êlan dưi bei êdah truh kơ thŭn 2030, êwa čhŏ sang ală kĭng dưi bi hrŏ ƀiă êdi 15% mkă hŏng thŭn 2014. Kbưi hĭn, hlăm thŭn 2050, êwa čhŏ sang ală kĭng dưi bi hrŏ ƀiă êdi 30% mkă hŏng thŭn 2014.

Pô mblang: Y-Ƀel Êban