Hlăm knăm mơak, phung bi ala leh anăn mnuih ƀuôn sang alŭ Đăk Tiêng Kơ Tu, să Đăk La, kdriêk Đăk Hà, čar Kon Tum lŏ wĭt bi hdơr knhuah gru hing ang mơ̆ng bruă Mặt trận čar kwar Việt Nam găn 92 thŭn mkŏ mjing leh anăn đĭ kyar. Sa ai hŏng klei mtrŭt mjhar “Jih jang mnuih ƀuôn sang bi mguôp mkŏ mkra krĭng ƀuôn sang mrâo, ƀuôn prŏng mrâo mrang” leh anăn klei mtrŭt mjhar “Bi mlih klei mĭn, bruă ngă mơ̆ng mnuih ƀuôn sang jing mnuih djuê ƀiă, mđĭ ai mnuih ƀuôn sang jing mnuih djuê ƀiă gĭr ktưn tlaih mơ̆ng klei ƀun ƀin”, thŭn leh êgao 147 gŏ sang hŏng giăm 1.000 čô mnuih ƀuôn sang, hlăm anăn lu jing mnuih djuê ana Bahnar ti alŭ Đăk Tiêng Kơ Tu mâo leh klei hur har mă bruă knuă, bi mguôp, bi đru hdơ̆ng pô hrăm mbĭt mđĭ kyar bruă duh mkra, bi hơĭt klei hdĭp. Ară anei, hlăm alŭ knŏng dôk mă 3 gŏ sang ƀun ƀin leh anăn 9 gŏ sang giăm ƀun ƀin, 136 gŏ sang dưi tŭ yap jing gŏ sang dhar kreh.

Bi ala kơ khua gĭt gai Đảng, knŭk kna, Dhar bruă mặt trận čar kwar Việt Nam Đại tướng Phan Văn Giang, Khua hlăm Phŭn bruă kđi čar, k’iăng khua bruă Đảng knơ̆ng gĭt gai lĭng kahan gưl dlông, Khua phŭn bruă lĭng kahan hơêč hmưi, yap yuôm bhăn dŭm boh tŭ dưn mơ̆ng mnuih ƀuôn sang alŭ Đăk Tiêng Kơ Tu mâo leh hlăm dŭm thŭn êgao. Đại tướng mñă klă: Bi mguôp jing hdră êlan prŏng mơ̆ng Đảng leh anăn Awa Hồ kñăm bi lar klei ktang kluôm djuê ana. Jing leh klei mưng mơ̆ng lu thŭn hŏng anei, bruă mkŏ mjing klei bi hdơr hruê mkŏ mjing Mặt trận djuê ala hluh hlir Việt Nam jing leh knhuah gru jăk siam, ba bruă mặt trận truh hŏng êpul êya yang ƀuôn, mđing truh kơ grăp gŏ sang leh anăn grăp čô mnuih. Knăm mơak bi mguôp jih jang djuê ana thŭn anei lŏ mâo boh tŭ dưn hĭn leh êbeh 2 thŭn tŭ klei hmăi amâo mâo jăk mơ̆ng klei ruă tưp Covid-19, ƀiădah ti gŭ klei gĭt gai mơ̆ng Đảng, knŭk kna, klei nao hgŭm mơ̆ng bruă kđi čar leh anăn klei hrăm mbĭt, sa ai mơ̆ng mnuih ƀuôn sang, ala čar dưi mâo boh tŭ dưn yuôm bhăn hlăm djăp mta bruă.

Bi kơ bruă klam hlăm wưng kơ anăp Đại tướng Phan Văn Giang, khua Phŭn bruă lĭng kahan mtă kơ čar Kon Tum, kdriêk Đăk Hà leh anăn mnuih ƀuôn sang alŭ Đăk Tiêng Kơ Tu lŏ dơ̆ng bi lar ai tiê bi mguôp, hluê ngă mâo boh tŭ dưn dŭm mta kñăm mđĭ kyar mâo Đảng, knŭk kna ba mdah leh. “Čŏng bi klă leh anăn hluê ngă mâo boh tŭ dưn hdră mtrŭn mrô 19 kơ bruă lŏ hma, ƀĭng ngă lŏ hma leh anăn krĭng ƀuôn sang truh ti thŭn 2030 leh anăn tă hdră truh ti thŭn 2045. Hdră mtrŭn mrô 23 mơ̆ng Phŭn bruă kđi čar kơ bruă mđĭ kyar bruă duh mkra ala ƀuôn, rơ̆ng klei êđăp ênang ti alŭ wăl krĭng Lăn Dăp Kngư, tă hdră truh ti thŭn 2045. Mkŏ mjing dŭm hdră bi lông khăp kơ ala čar mơ̆ng mnuih ƀuôn sang. Mtrŭt mjhar, mđĭ ai phung mâo klei bi hmô, dŭm êpul êya, grăp čô kdlưn hĭn čiăng mkŏ mjing ai dưi bi lông mrâo. Hur har nao hgŭm mkŏ mjing Đảng, bruă sang čư êa, mkŏ mjing dŭm êpul êya bruă kđi čar, yang ƀuôn ênuah ênô, kjăp ktang. Hluê ngă jăk bruă mtrŭt mjhar Jih jang mnuih ƀuôn sang bi mguôp mkŏ mkra krĭng ƀuôn sang mrâo, ƀuôn prŏng mrâo mrang”.

Ƀri wưng nao hlăm knăm mơak bi mguôp jih jang djuê ana hŏng mnuih ƀuôn sang alŭ Đăk Tiêng Kơ Tu, Bi ala kơ khua gĭt gai Đảng, knŭk kna, Dhar bruă mặt trận čar kwar Việt Nam Đại tướng Phan Văn Giang, Khua hlăm Phŭn bruă kđi čar, k’iăng khua bruă Đảng knơ̆ng gĭt gai lĭng kahan gưl dlông, Khua phŭn bruă lĭng kahan mđup brei leh 100 boh sang bi mguôp kơ mnuih ƀuôn sang dŭm djuê ana čar Kon Tum hŏng kluôm ênoh 5 êklai prăk. Đại tướng leh anăn Dhar bruă mặt trận čar Kon Tum ăt mđup brei hnư mnơ̆ng kơ giăm 100 gŏ sang knŭk kna dlăng ba leh anăn gŏ sang ƀun ƀin ti să Đăk La.

Ăt hlăm gưl nao ngă bruă ti čar Kon Tum anei, Đại tướng Phan Văn Giang, Khua phŭn bruă lĭng kahan mâo leh klei nao čuă, mă bruă ti Sư đoàn 10, Quân đoàn 3. Nao čuă leh anăn ksiêm dlăng bruă mtô mjuăt bi hriăm ti dŭm anôk bruă. Khua phŭn bruă lĭng kahan Phan Văn Giang mâo leh klei mđĭ ai phung knuă druh, lĭng kahan, boh nik phung lĭng kahan jing mnuih djuê ƀiă, čiăng mgaih msir klei dleh dlan, mđĭ ai tiê bi mguôp, hur har hlăm klei hriăm čiăng thâo djă yua phao ktuang, kdrăp lĭng kahan mrâo.

Đại tướng Phan Văn Giang mtă kơ khua gĭt gai dŭm anôk bruă čiăng ngă jăk bruă mtô bi hriăm dŭm hdră bi blah, hluê ngă bruă klam lĭng kahan ti alŭ wăl krĭng Lăn Dăp Kngư. Đại tướng Phan Văn Giang mtă hlăm wưng kơ anăp, dŭm anôk bruă hlăm Sư đoàn 10 čiăng bi mguôp kjăp hĭn hŏng bruă đảng nah gŭ, bruă sang čư êa leh anăn lĭng kahan alŭ wăl, čiăng thâo klă boh sĭt alŭ wăl, đru čung ba mnuih ƀuôn sang, nao hgŭm mđĭ kyar bruă duh mkra, bi hrŏ ƀun, mkŏ mjing bruă kđi čar alŭ wăl kjăp ktang.