Ti să Ia Pnôn, kdriêk Đức Cơ, Knơ̆ng bruă kiă kriê kahan răng mgang knông lăn čar Gia Lai mkŏ mjing leh hdră “Yan mnga knông lăn h’uh mđao hŏng mnuih ƀuôn sang’ yan mnga Ất Tỵ 2025. Ia Pnôn jing să knông lăn, lu jing mnuih djuê ƀiă, klei hdĭp mda dôk găn klei dleh dlan, hnơ̆ng ênoh gŏ êsei ƀun adôk 16,49%.

Hŏng hdră kñăm amâo mâo lui sa čô mnuih kơ tluôn ôh, lehanăn čiăng kơ jih jang gŏ sang mâo Tết, cKlei bi đru mâo mkŏ mjing msĕ si: Anôk rang mdah mnơ̆ng dhơ̆ng čhĭ mnia amâo mâo mă prăk ôh, klei bi đru đŭng klŏ điŏ, lehanăn klei bi mguôp kưt muiñ. Wưng anei, kahan răng mgang knông lăn čar Gia Lai mâo mđup brei leh 100 hnư mnơ̆ng kơ dŭm gŏ êsei knŭk kna dlăng ba, lehanăn gŏ sang dôk hlăm klei dleh dlan. 20 čô hđeh hriăm hră jing anak rông mơ̆ng kahan răng mgang knông lăn, ăt mâo tết sơăi.

Êpul hgŭm phung aê mdrao mda asei Việt Nam mrâo bi hgŭm hŏng Knơ̆ng bruă mdrao mgŭn čar Dak Lak mkŏ mjing Hdră “yan mnga čŏng ngă bruă - Tết klei khăp” ti să Čư̆ Pô, kdriêk Krông Ƀuk. Hdră mđup brei 20 hnư mnơ̆ng kơ hđeh sang hră leh anăn gŏ sang mâo klei hdĭp dleh dlan, đru 10 hnư bliah kboh amâo mă prăk kơ hđeh leh anăn 50 čô bliah phaco kơ phung mâo klei ruă hlăm ală ti kdriêk Krông Ƀuk. Ksiêm mkă klei ruă, mbha êa drao amâo mă prăk kơ 500 čô mnuih ƀuôn sang ti să Čư̆ Kpô.  Gưl anei, anôk mkŏ mjing ăt nao čhưn, mđup brei mnơ̆ng kơ 5 gŏ sang mâo ai hŏng lăn čar ti să Čư̆ Kpô, kdriêk Krông Ƀuk. Ênoh bi liê kơ bruă anei 1, 3 êklai prăk. Anei jing bruă ngă yuôm bhăn, klă sĭt đru, kriê dlăng Têt hơuh mđao, kuh kŭm ênŭm ênap, ba klei suaih pral, klei mơak kơ phung hđeh, mnuih ƀuôn sang ti krĭng dleh dlan čar Dak Lak.