Êpul hgŭm gru bi kal hrah čar Daklak hlăk jih ai tiê hlue ngă klei bi đru kơ “Tết hlăm klei khăp” yan mnga Ất Tỵ  thŭn 2025 hŏng lu bruă ngă, mâo mđing uêñ leh hŏng phung knŭk kna dlăng ba, mnuih dôk hlăm klei hdĭp dleh dlan hlăm čar. 

Tết anei, Êpul hgŭm gru bi kal hrah čar Daklak ktưn čiăng mâo đru truh êbeh 65.000 čô mnuih ƀun, mnuih dôk hlăm klei dleh dlan, mnuih ênưih lĕ hlăm klei kpĕ êka. Čiăng dưi ngă djŏ hŏng mta čoh cuăn anei, ară anei dŭm gưl hlăm čar dôk iêo mthưr, mtrŭt mjhar dŭm êpul êya, mnuih, phung duh mkra bi đru duh mĭn Tết kơ mnuih ƀun. Trần Thị Phương Thu, K’iăng khua êpul hgŭm gru bi kal hrah čar Daklak brei thâo: Mơ̆ng jih jang bruă ngă anei, êpul hgŭm čang hmăng amâo mâo djŏ knŏng đru mnơ̆ng ƀiădah lŏ dơ̆ng bi mlar klei thâo bi khăp, thâo bi đru, mâo klei bi mguôp kjăp hlăm ƀuôn sang, đru kơ jih jang mnuih mâo drông Tết hŏng klei êđăp ênang jăk mơak./.