Mơ̆ng thŭn 2022 truh kơ ară anei, ƀuôn prŏng Pleiku pŏk leh 5 adŭ msir klei amâo thâo hră kơ mnuih djuê ƀiă hŏng giăm 100 čô hriăm ti să Biển Hồ, Čư̆ Á, Gào lehanăn ƀuôn hgŭm Chi Lăng. Êdah êdi jing Adŭ msir klei amâo thâo hră ti Sang hră gưl sa Lê Lai să Čư̆ Á, mâo êbeh 30 čô mnuih ƀuôn sang ƀuôn Bông Phun lehanăn Mơ Nú. Adŭ hriăm mkŏ mjing mơ̆ng knăm sa truh kơ knăm êma grăp hruê kăm, ară anei mjưh ruê̆ leh. Tĭng, phung hriăm srăng tŭ mă hră bi mklă ruê̆ hriăm hlăm akŏ thŭn 2025, Amai H’Then, 30 thŭn, ƀuôn Mơ Nú, să Čư̆ Á nao hriăm hlăm adŭ anei mgei ai tiê brei thâo:

"Êlâo adih amâo thâo hră kbiă êngao ƀuôn ăt hêñ mơh kyua amâo thâo hră, hiu êbat dleh dlan êdi. Dưi nao hriăm, thâo hră, thâo čih, thâo răk kâo amâo lŏ hêñ ôh, jhŏng mơh hiu êbat hlăm êlan klông.

Nguyễn Đình Thức, Khua Adŭ bruă Sang hră mơar mtô bi hriăm ƀuôn prŏng Pleiku, čar Gia Lai, brei thâo, adŭ msir klei amâo thâo hră đru leh kơ lu mnuih thâo hră, thâo čih, thâo dlăng, thâo tĭng, dưi bi mjĕ dŭm klei thâo săng, hâo hưn grăp hruê hlăm ala ƀuôn čiăng ba yua hlăm klei hdĭp, ngă bruă duh mkra pla mjing.

“Adŭ bruă mtô bi hriăm mkŏ mjing leh êpul nao ksiêm dlăng grăp sang hră kơ boh tŭ hriăm Toán, Tiếng Việt mâo dŭm klei tĭng, hmư̆ phung hriăm răk, nai mtô brei phung hriăm čih boh hră, phung hriăm bi êdah klei mĭn mơ̆ng pô mơ̆ng êlâo lehanăn leh ruê̆ hriăm adŭ anei. Dlăng kluôm, phung hriăm mâo klei thâo, klei čiăng mơ̆ng diñu ăt jing čiăng thâo răk, thâo čih, thâo dlăng mơ̆ng anăn mđin hĭn kơ klei hdĭp aguah tlam mơ̆ng pô.

Hŏng krĭng knông lăn msĕ si kdriêk Đức Cơ, Gia Lai, wưng thŭn 2022 -2025, kdriêk pŏk leh 20 boh adŭ msir klei amâo thâo hră hŏng êbreh 600 čô. Ti dŭm adŭ hriăm krĭng knông lăn, phung nai hgao leh klei dleh dlan čiăng đru kơ mnuih hriăm. Lê Phú Huy, Kơiăng khua Adŭ bruă Sang hră mơar mtô bi hriăm kdriêk Đức Cơ brei thâo:

“Adŭ msir klei amâo thâo hră ba wĭt leh boh tŭ dưn, hmăi jăk kơ ala ƀuôn, mđĭ ênoh mnuih thâo hră mơ̆ng 15 truh kơ 60 thŭn, mjing klei găl kơ mnuih ƀuôn sang mđĭ klei thâo. Mkŏ mjing adŭ hriăm djŏ guôp hŏng mnuih khua thŭn, ba yua rup, hră mơar, mnơ̆ng mưng hŏng aguah tlam, čiăng mkăp djŏ guôp hŏng klei găl ngă bruă duh mkra pla mjing, mđĭ kyar bruă duh mkra – ala ƀuôn mơ̆ng mnuih ƀuôn sang, mguôp hŏng klei đua klam mơ̆ng phung knuă druh kriê dlăng, phung nai mtô hlăm hdră mtrŭt mjhar mnuih ƀuôn sang nao hriăm mơ̆ng grăp alŭ wăl.

Boh nik, hdră msir klei amâo thâo hră lŏ mâo klei nao hgŭm mơ̆ng êpul kahan răng mgang knông lăn Gia Lai. Ti krĭng mnuih ƀuôn sang dôk Suối Khôn, să Ia Mơ, kdriêk Čư̆ Prŏng, anôk mâo 70 čô amâo thâo hră, Kđông kahan răng mgang knông lăn Ia Lốp mkŏ mjing leh dua adŭ hriăm mơ̆ng krah thŭn 2023 truh ară anei. Đại úy Nguyễn Văn Luân, Khua êpul mtrŭt mjhar mnuih ƀuôn sang, Kđông kahan răng mgang knông lăn Ia Lốp brei thâo:

“Leh mkŏ mjing adŭ anei mâo lu phung amĭ ama mâo anak ăt nao hgŭm mbĭt mơh. Čiăng bi hơĭt adŭ hriăm leanăn ba wĭt boh tŭ dưn hmei lŏ mkŏ mjing anôk phung hđeh điêt dôk hlăp êjai, bi hlăm lam adŭ amĭ ama digơ̆ dôk hriăm.

 Hluê si Knơ̆ng bruă Mtô bi hriăm čar Gia Lai, kluôm čar mâo hlăm brô 60 êbâo čô amâo thâo hră hlăm gưl thŭn 15 – 60, truh 5,6% ênoh mnuih, lu jing phung mniê mnuih djuê ƀiă. Mkă hŏng kluôm ala, Gia Lai mâo ênoh mnuih amâo thâo hrtă lu. Hluê ngă Hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă lehanăn krĭng čư̆ čhiăng wưng thŭn 2021 -2025, Gia Lai pŏk leh 735 adŭ msir klei amâo thâo hră kơ 23,5 êbâo čô. Lê Duy Định, Khua knơ̆ng bruă Mtô bi hriăm čar Gia Lai hưn, ară anei kluôm čar mâo 15/17 êpul êya gưl kdriêk djăp hnơ̆ng čuăn msir klei amâo thâo hră hnơ̆ng 2, mâo mta kñăm wưng tal 1 hlăm bruă msir klei amâo thâo hră hluê Hdră “Mkŏ mjing yang ƀuôn hriăm hră wưng thŭn 2021-2030” mơ̆ng čar:

“Mơ̆ng hdră ksiêm dlăng bruă mtô bi hriăm kơ mnuih djuê ƀiă amâo thâo hră mơ̆ng 15 thŭn kơ dlông, boh sĭt hdră anei ba wĭt leh lu boh tŭ dưn kơ mnuih ƀuôn sang. Hlăm wưng ti anăp, knơ̆ng bruă mtô bi hiăm lŏ dơ̆ng gĭt gai anôk bruă mtô bi hriăm lehanăn dŭm alŭ wăl tơdah pŏk hdră msir lăm klei amâo thâo hră brei mkŏ mjing jăk hĭn kñăm mjing klei găl kơ mnuih ƀuôn sang dưi nao hriăm djăp ênŭm.

Hŏng klei gĭr mơ̆ng bruă sang čư̆ êa alŭ wăl, nai mtô, klei đru mơ̆ng êpul kahan răng mgang knông lăn, čar Gia Lai dôk gĭr hluê ngă tŭ dưn bruă msir lăm klei amâo thâo hră, đru mguôp mđĭ hnơ̆ng tŭ jăk klei hdĭp, dhar kreh mơ̆ng mnuih ƀuôn sang, mđĭ kyar bruă duh mkra – ala ƀuôn, boh nik hlăm krĭng mnuih djuê ƀiă./.