Hdră mtrŭn lač klă: Rơ̆ng kjăp klei mâo djăp pui kmlă ala čar, mkăp brei pui kmlă jing sa tur knơ̆ng rơ̆ng kơ klei kdlưn hĭn mơ̆ng bruă duh mkra leh anăn bi klă klei bi mrâo mrang lăn čar hlăm wưng kơ anăp. Hluê anăn, mta kñăm mđĭ kyar bruă duh mkra lăn čar thŭn 2025 gĭr mâo ti hnơ̆ng êbeh 8% leh anăn đĭ kyar bruă duh mkra wưng thŭn 2026 – 2030 gĭr ti hnơ̆ng 2 mrô, čiăng mâo pui kmlă êbeh 1,5 blư̆, mĭn tĭng kah knar grăp thŭn mơ̆ng 12 – 16%.

Čiăng čŏng pô dŭm hdră êlan mơ̆ng hnưm, mơ̆ng kbưi, rơ̆ng bi mâo djăp pui kmlă hlăm djăp boh klei, Khua knŭk kna Phạm Minh Chính mñă kơ dŭm alŭ wăl, anôk bruă kñăm ngă bruă klam mkăp brei pui kmlă đru mđĭ kyar bruă duh mkra ala ƀuôn wưng thŭn 2025 – 2030, rơ̆ng bi mâo djăp pui kmlă ala čar hlăm ênuk mrâo, dlăng anei jing bruă klam kđi čar yuôm bhăn. Kñăm ksiêm dlăng, ksiêm duah, mkra mlih čuăl mkă pui kmlă VIII čiăng hmao bi mrâo dŭm klei čuăn, mta kñăm hdră êlan kơ mđĭ kyar bruă duh mkra ala ƀuôn, bi mrâo, bi mbŏ dŭm hdră pui kmlă mrâo, pui kmlă mtah, doh, hơĭt kjăp.