Jing leh klei mưng, truh aguah ưm, amâodah akŏ tlam, “Loa bi kčăi asăp knông lăn” mơ̆ng kđông kahan knông lăn Huổi Luông, hlăm knơ̆ng bruă kahan răng mgang knông lăn čar Lai Châu lŏ kwang hlăm tar krĭng knông lăn. Bruă anei tuôm ba wĭt leh klei tŭ dưn hlăm bruă mdrơ̆ng hŏng klei ruă tưp Covid 19 đi lar, lehanăn dôk djă yua hlŏng ba kơ ară anei. Knŏng hŏng sa boh loa djă hiu, hŏng sa USB mâo leh jih mta klei čiăng hâo hưn, lehanăn sa boh êdeh p’phŭt snăn knuă druh kahan răng mgang knông lăn dưi truh hŏng djăp anôk phung ƀuôn sang hdĭp mda lehanăn mă bruă pioh hâo hưn.

Đại úy Phan Thành Nam, pô jing k’iăng bruă kđi čar, kđông kahan răng mgang knông lăn Huổi Luông brei thâo: Hlăm alŭ wăl mâo lu mnuih djuê ana Dao; Mông; Hà Nhì hdĭp mda. Jih jang klei čiăng hâo hưn mâo leh kahan răng mgang knông lăn čih mkra hŏng klei djuê lar, mbĭt hŏng klei blŭ mnuih djuê ƀiă, jing djŏ hŏng klei phung ƀuôn sang thâo săng. Kyuanăn, jih jang mnuih ênưih thâo săng sơăi jih jang klei loa bi kčăi asăp bi lar. Hŏng dŭm klei pioh răk, hdră răk pioh hâo hưn kơ hdră bhiăn knông lăn Việt Nam hlăm alŭ wăl, hmei mkŏ mjing hdră hâo hưn, mkŏ mjing dua hrue kăm sa blư̆ ti dŭm boh ƀuôn hlăm alŭ wăl. Hdră anei jing tŭ dưn êdi, kyuanăn mâo hâo hưn leh kơ jih mta kñăm čiăng truh hŏng phung ƀuôn sang. Hlăm wưng kơ anăp, hmei srăng hgŭm hŏng bruă sang čư̆ êa alŭ wăl, hlue ngă djăp mta hdră hâo hưn.

Kyua klei hdĭp mda dôk hlăm klei dleh dlan, snăn amâo mâo djŏ ôh jih jang gŏ sang ti knông lăn dưi tloh blei tivi, amâodah computer pioh hmư̆ djăp mta klei hâo hưn. Êgao hĭn kơ anăn, hŏng loa bi kčăi asăp čiăng dưi bi mtruh djăp mta klei hâo hưn kơ phung ƀuôn sang nao hlăm djăp ƀuôn êlan, snăn phung ƀuôn sang, thâodah dôk hlăm hma ăt dưi hmư̆ mơh. Nanao, bruă hâo hưn hŏng loa bi kčăi asăp hlŏng jing leh klei jĕ giăm amâo mâo dưi kƀah ôh hŏng phung ƀuôn sang ti knông lăn.

Trần Chỉnh Hoàng, ƀuôn A Sa Phìn, să Huổi Luông, kdriêk Phong Thổ brei thâo: Nanao hlăm grăp knăm 6 lehanăn knăm 7 hlăm hrue kăm, loa bi kčăi asăp hlăm ƀuôn lŏ kwang dŭm klei hâo hưn lač kơ hdră êlan mơ̆ng Đảng, knŭk kna. Mbĭt anăn dua hrue kăm sa blư̆ lŏ hâo hưn kơ djăp mta bruă djŏ tuôm hŏng hdră bhiăn knông lăn Việt Nam; dŭm hdră êlan djŏ tuôm hŏng knông lăn, răng mgang gơ̆ng knông lăn... Boh phŭn klei hâo hưn jing khuăt ênưih thâo săng, lehanăn jih jang mnuih ăt păn kjăp sơăi jih jang klei leh hâo hưn. Phung ƀuôn sang hlăm ƀuôn hmei thâo săng leh kơ klei yuôm bhăn kơ bruă răng mgang knông lăn, lehanăn klei yuôm bhăn klông knông lăn. Phung ƀuôn sang hlăm ƀuôn găn ti gơ̆ng knông lăn, ti klông knông lăn, snăn bi hưn hŏng kahan răng mgang knông lăn, čiăng kơ jih jang djăp mta bruă mâo kahan knông lăn ksiêm dlăng, mơ̆ng anăn phung ƀuôn sang ăt thâo săng hĭn kơ knông lăn, gơ̆ng knông lăn.

Mbĭt hŏng gưl hiu hâo hưn hŏng loa bi kčăi asăp să, kđông kahan răng mgang knông lăn Huổi Luông ăt tiŏ nao mơh phung knuă druh, lĭng khan mơ̆ng kđông truh hŏng dŭm gŏ êsei nao mtô mblang mtă mtăn ti anăp phung ƀuôn sang mtam. Mơ̆ng anăn, đru kơ phung ƀuôn sang mâo klei thâo răng hĭn hŏng djăp mnêč jhat mơ̆ng phung bi roh, lehanăn djăp mta klei ngă soh. Amai Lò Thị Trưởng, mnuih dôk ti ƀuôn Hồ Thầu, să Huổi Luông, kdriêk Phong Thổ yăl dliê: Wưng leh êgao kâo mâo kahan răng mgang knông lăn hưn mthâo kơ klông knông lăn, gơ̆ng knông lăn. Kâo mâo klei thâo săng, knông lăn jing yuôm bhăn amâo mâo dưi duah čhuak soh. Jing sa čô mnuih hdĭp hlăm krĭng knông lăn, kâo mâo nanao klei thâo săng bi hrăm mbĭt hŏng kahan răng mgang knông lăn bi răng mgang kjăp klei êđăp ênang lăn čar pô.

Tui si Đại tá Lê Công Thành, k’iăng khua bruă kđi čar kahan răng mgang knông lăn čar Lai Châu, bruă hâo hưn, mjuăt bi hriăm klei bhiăn, hlăm anăn mâo klei bhiăn knông lăn Việt Nam mâo hlue ngă leh hŏng online dưi mkŏ hŏng 115 anôk hlăm čar, mâo leh giăm 2 êbâo 500 čô knuă druh jing pô ngă bruă hâo hưn kơ hdră bhiăn gưl čar truh kơ dŭm să nao bi đru hâo hưn. Bruă hâo hưn mâo ngă nanao jêñ jêñ mđrăm mbĭt hŏng êpul gơ̆ng bruă mjuăt bi hriăm hdră bhiăn ti dŭm kdriêk hlăm 22 boh să knông lăn: Hŏng bruă hâo hưn bi lar êlan hĭn kơ hdră bhiăn knông lăn Việt Nam, klei phung ƀuôn sang thâo săng ti krĭng knông lăn ăt mâo mđĭ hĭn klă mngač leh. Hŏng bruă mâo ngă klă, hlăm klei tŭ dưn lehanăn hŏng lu hdră hâo hưn, snăn hmei mâo bi lar leh êlan hĭn truh hŏng phung ƀuôn sang. Lehanăn jih jang mnuih hdĭp ti knông lăn mâo leh sơăi klei thâo săng djăp ênŭm kơ hdră bhiăn knông lăn Việt Nam. Mơ̆ng anăn, dưi ƀuh bruă kƀĭn ala mtrŭn leh hdra bhiăn knông lăn Việt Nam mâo klei yuôm bhăn êdi hlăm bruă kiă kriê răng mgang klei dưi êngiê lăn čar, klei êđăp ênang ti knông lăn ară anei.

Hŏng djăp hdră bi hâo hưn hlăm klei mbruă, mâo klei tŭ dưn, phung ƀuôn sang djăp djuê ana hlăm čar thâo săng klă hĭn leh kơ klei yuôm bhăn mơ̆ng bruă răng kriê, klông knông lăn, gơ̆ng knông lăn. Phung ƀuôn sang ti knông lăn Lai Châu hơĭt ai tiê duh ƀơ̆ng, mă bruă knuă, grăp thŭn mâo bi hrŏ ƀun êbeh 5%, ênoh klei ngă soh hlăm yang ƀuôn hrŏ 10%. Mơ̆ng anăn grăp čô mnuih, hlăk dôk gĭr mbĭt hŏng bruă Đảng, bruă sang čư̆ êa alŭ wăl ngă jăk hĭn bruă rŭ mdơ̆ng, mđĭ kyar krĭng knông lăn, rơ̆ng bi mâo klei êđăp ênang bruă kđi čar, klei êđăp ênang alŭ wăl knông lăn./.