Hruê 6/12, Khua kiă kriê kahan ksiêm čar Dak Nông mâo leh klei mđĭ ai, mđup brei klei pah mni kơ phung knuă druh răng mgang êlan internet, gang mkhư̆ phung ngă soh dưn kyua drăp mrâo mrang mbĭt hŏng kahan ksiêm 2 kdriêk Dak R’Lâp leh anăn Đak Glŏng, grăp anôk bruă 5 êklăk prăk, kyua klei kdlưn hĭn hlăm bruă bi kdơ̆ng, bi rai 3 klei hlăp in jin hŏng klei bi mđăo klei čưng boh. Êlâo kơnăn, dŭm anôk bruă kahan ksiêm čar mâo leh Khua bruă Đảng čar Dak Nông pah mni 120 êklăk prăk leh dưi bi rai klei mđăo ƀơ̆ng prăk klei čưng boh hŏng ênoh giăm 600 êklai prăk.

Hluê ngă gưl trŭn kơ bruă ksŭng mă, gang mkhư̆ phung ngă soh, rơ̆ng klei êđăp ênang Tết Nguyên đán Qúy Mão 2023, boh nik hlăm wưng mâo World Cup, kahan ksiêm čar Dak Nông dưi bi kdơ̆ng, bi rai klei hlăp in jin hŏng hdră mđăo ƀơ̆ng prăk klei čưng boh hlăm êlan internet prŏng hĭn mơ̆ng êlâo truh kơ ară anei ti čar anei. Kahan ksiêm čar Dak Nông mâo mă 17 čô, hrui mă 4 boh laptop, lu mrô knơ̆ng prăk, ôtô…Phŭn kčưm bi klă ênoh prăk djŏ tuôm hŏng klei hlăp injin anei giăm 600 êklai prăk. Năng mđing hĭn, hlăm dŭm čô mâo mă, mâo Lương Ngọc Thành, sa čô mă bruă ti knơ̆ng bruă ngăn dŏ leh anăn wăl hdĭp mda čar Dak Nông leh anăn Nguyễn Ngọc Trung, pô mă brưa ti kơ̆ng bruă kreh knhâo mrâo mrang čar Dak Nông. Lương Ngọc Thành, k’kiêng thŭn 1993 dưi bi klă jing pô ba anăp, gĭt gai klei hlăp injin anei.