Hlue si klei čih pioh mơ̆ng Êpul hgŭm mnuih mă bruă Việt Nam, mơ̆ng mlan 9/2022 truh hruê 10/12 mâo leh 1.242 anôk bruă duh mkra tuôm hŏng klei dleh dlan, khăt bi hrŏ hră akâo blei anăn bi hrŏ mmông mă bruă mơ̆ng 482.120 čô mnuih mă bruă, mâo 90% ênoh mnuih hmăi djŏ. Mâo hlăm brô 6.600 čô mdei êjai mă bruă, mdei bruă amâo mâo prăk mlan.

 Klei anôk bruă duh mkra khăt bi hrŏ hră akâo blei, mnuih mă bruă luič bruă mă amâodah bi hrŏ mmông mă bruă, ba lu klei amâo jăk, boh nik wưng Têt Nguyên đán dơ̆ng truh. Bruă tă kčoh jing sa hlăm dŭm bruă hmăi lu hĭn leh hră akâo blei knhal jih thŭn mơ̆ng lu anôk bruă duh mkra khăt bi hrŏ mơ̆ng 15% truh 50%, mbĭt  anăn hmăi kơ bruă mă mơ̆ng dŭm êklăk čô mnuih mă bruă. Trương Văn Cẩm, K’iăng Khua Êpul hgŭm tă kčoh Việt Nam kčĕ:

“Mâo dŭm bruă truh ară anei hmei lač anôk bruă duh mkra dưi mâo ênoh đru kơ klei êđăp ênang leh anăn bruă mă 48,5b êbâo êklai kơ mnuih mă bruă, 110 êbâo êklai đry kơ anôk bruă duh mkra, hlăm anăn mâo mkăp mnga 2%, drei ăt ka dưi ngă mơh. Ênoh VAT bi hrŏ jia 2% snăn hmei mtă lŏ dơ̆ng hlue ngă kơ anôk bruă duh mkra. Dŭm hdră êlan kơ hră ênua ala ƀuôn, hră ênua luič bruă mă lŏ mâo lu klei êdu kbah hmei akâo leh snăn ăt mtă klei ksiêm hriăm čiăng dưi msir mgaih.”

Hlue si Trần Thị Lan Anh,  Khua čih hră Êpul hgŭm mnia blei leh anăn tuh tia mkra mjing Việt Nam, boh klei mkra mjing mnia blei mơ̆ng anôk bruă duh mkra amâo dưi mâo klei jăk ôh hlăm mlan knhal jih thŭn leh anăn đăo knăl srăng sui truh ƀiă êdi jih gưl 1 thŭn êdei.

“Ti anăp klei dleh dlan anei,  VCCI akâo brei hơĭt klei hdĭp bruă duh mkra kluôm, dŭm hdră mđĭ bruă duh mkra hlăm ala čar, đru mđĭ bruă mnia blei, duah dŭm hdră êlan đru kơ phung mă bruă leh anăn phung yua mnuih mă bruă hŏng dŭm ênoh đru kơ ngăn prăk, hdră êlan đru kơ klei êđăp ênang ala ƀuôn, hlăm anăn mđing đru kơ dŭm anôk bruă duh mkra man đưn leh anăn điêt. Brei mkra mlih dŭm hdră êlan mnuih mă bruă djŏ guôp hĭn hŏng boh sĭt, mtô bi hriăm.”

 Hlăm boh klei anei, Ngọ Duy Hiểu, K’iăng Khua Êpul hgŭm mnuih mă bruă Việt Nam brei thâo, brei mâo lu hdră msir mđrăm mbĭt, đru hlăm wưng bhiâo kơ mnuih mă bruă hgao klei dleh dlan, lŏ dôk mă bruă amâodah hnưm lŏ wĭt hlăm anôk mă bruă, đru hlăm wưng sui kñăm mđĭ klei dưi mdrơ̆ng ti anăp klei rŭng răng, klei bi mlih mơ̆ng anôk mă bruă:

“ Êlâo hĭn, brei mđĭ bruă mkăp klei hâo hưn kơ anôk mă bruă, pŏk ngă dŭm hdră êlan, hdră đru kơ mnuih mă bruă ênưih ba yua klei hâo hưn hrŏng ruah, hŏng dŭm phŭn hrŏng ruah đăo knang, dŭm anôk bruă duh mkra, êpul bruă dôk čiăng duah bruă mă. Mbĭt anăn, mđĭ lar bruă klam mơ̆ng dŭm êpul hgŭm yua mnuih mă bruă hlăm bruă mkŏ čiăng hưn mthâo bruă mă kơ mnuih mnuih mă bruă."

 Čiăng dưi msir mgaih ăt msĕ mơh thâo êlâo kơ klei dleh dlan anăp truh, Vũ Trọng Bình, Khua Knơ̆ng bruă mă, Phŭn bruă mnuih mă bruă - kahan êka keh leh anăn ala ƀuôn lač, brei mâo hdră msir mgaih leh anăn wĭt lač dŭm bruă dôk mâo hlăm bruă mnuih mă bruă, bruă mă leh anăn klei êđăp ênang ala ƀuôn. Ară anei, Phŭn bruă mnuih mă bruă - kahan êka keh leh anăn ala dôk bi hgŭm hŏng dŭm Phŭn, anôk bruă bi knar hŏng phŭn bruă hưn mdah hŏng Knŭk kna mtrŭn Hdră mtrŭn kơ klei mđĭ kyar anôk mă bruă kñăm kơrŭ wĭt pral bruă duh mkra- ala ƀuôn.

 “ Ară anei mâo sa bruă jing čiăng snăk mâo klei bhiăn dưi bi hgŭm kluôm ala dŭm anôk bruă duah bruă mă êngao knŭk kna hlăm ala čar leh anăn ala tač êngao, leh anăn hdră bruă duah bruă knŭk kna, snăn Bình Dương leh anăn dŭm alŭ wăl dôk akâo, năng ai drei srăng mjing êpul hgŭm mkăp mnuih mă bruă. Klei bhiăn kơ mnuih mă bruă anei đru kơ knŭk kna gĭt gai, đru jăk hĭn.”

Êlâo kơ dŭm klei dleh dlan dôk mâo hlăk Tết nguyên đán giăm truh brei knŭk kna, dŭm Phŭn, dhar bruă djŏ tuôm brei pŏk ngă dŭm hdră msir mjêč kñăm bi hrŏ klei dleh dlan kơ anôk bruă duh mkra leh anăn mnuih mă bruă, dưi krơ̆ng phung mă bruă thâo mbruă, đru hơĭt mnuih mă bruă, mprăp kơ wưng lŏ kơrŭ wĭt hlăm thŭn 2023.