Lŏ dơ̆ng hdră hlăm klei kƀĭn tal 4, aguah mbruê 26/10, phung bi ala bi trông hŏng êpul kơ hdră mtrŭn lông brei klei dưi čuăn ruah mrô êdeh ôtô hŏng klei bi lông blei leh anăn hdră mtrŭn lông yua dŭm hdră êlan jăk hĭn mđĭ kyar ƀuôn prŏng Ƀuôn Ama Thuôt, čar Dak Lak.

Dŭm klei blŭ bi tŭ ư čiăng mâo hdră mtrŭn kơ bruă lông yua dŭm hdră êlan jăk hĭn mđĭ kyar ƀuôn prŏng Ƀuôn Ama Thuôt, kyua anei jing ƀuôn prŏng knơ̆ng ti krĭng Lăn Dăp Kngư, mkŏ hŏng dŭm krĭng knơ̆ng đĭ kyar mơ̆ng  krĭng Dhŭng, krĭng Ngŏ Dhŭng, leh anăn k’kiêng tlâo mđĭ kyar mơ̆ng Lào, Việt Nam, Campuchia, mâo ai dưi bi lar hlăm bruă duh mkra, dhar kreh leh anăn mâo bruă klam yuôm bhăn hlăm klei đĭ kyar bruă duh mkra ala ƀuôn, bruă lĭng kahan, klei êđăp ênang krĭng Lăn Dăp Kngư leh anăn kluôm ala. Pô bi ala Lê Ngọc Hải, Êpul bui ala čar Dak Lak mñă ktang, ară anei ƀuôn prŏng Ƀuôn Ama Thuôt ăt dôk mâo lu klei êdu kƀah hlăm bruă mkŏ mkra, kyuanăn hdră mtrŭn čiăng pŏk sa hdră êlan jăk hĭn, kdlưn hĭn čiăng iêo mthưr klei dih bi liê kơ alŭ wăl anei.