Amĭ Việt Nam jhŏng ktang Nguyễn Thị Khả ở thôn La Bông, xã Hoà Tiến, kdriêk Hoà Vang, ƀuôn prŏng Đà Nẵng mâo ung lehanăn anak jing mnuih djiê êngiă sơăi. Thŭn 1968, ung ñu jing Võ Văn Cảnh, êngiă asei êjai nao ngă bruă ti kdriêk Nông Sơn, čar Quảng Nam. Truh thŭn 1978, anak êkei ñu jing Võ Văn Bình djiê êngiă êjai nao bi blah ti Campuchia. Thŭn anei, mâo 84 thŭn leh, amĭ Nguyễn Thị Khả mmông hdơr, mmông hơăi. Mprăp kơ klei bi hdơr Hrue kahan êka êkeh – phung êngiă asei hrue (27/7 anei), mâo gưl bruă Đảng, bruă sang čư̆ êa, snăn ñu ƀuh mđao mơh ai tiê klei mĭn:

“Ung lehanăn anak djiê leh jih ăt ênguôt mơh, ƀiădah kyua mâo knŭk kna mđing uêñ đru kơ kâo mdul hĕ klei ênguôt hnĭng anăn. Hrue 27/7 grăp thŭn mâo Êpul hgŭm bruă mniê lehanăn bruă sang čư̆ êa alŭ wăl hriê čuă êmuh mđĭ ai. Ƀuh klei knŭk kna mđing uêñ truh hŏng găp djuê kâo mơak leh”.

       Dŭm hrue hŏng anei, gŏ sang Ngô Văn Hồng, ti să Hoà Bắc, kdriêk Hoà Vang, ƀuôn prŏng Đà Nẵng mơak leh mâo nao dôk hlăm sang mrâo. Thŭn 1966, ñu nao ngă kahan blah dêč tuôm hŏng klei phung roh mnah êka, Ară anei ñu jing kahan êka êkeh ti hnơ̆ng 4/4. Klei hdĭp dôk hlăm klei dleh dlan, gŏ sang amâo dưi lŏ mĭn ôh kơ klei dưi mâo sa boh sang hơĭt. Truh thŭn anei, Ngô Văn Hồng mâo bruă sang čư̆ êa ƀuôn prŏng Đà Năng đru truh 60 klăk prăk, ñu lŏ čan mdơ̆ng bi leh sang pô dôk:

“Kâo jing kahan êke êkeh, mâo knŭk kna đru hlăm grăp mlan. Mrâo anei, knŭk kna đru mdơ̆ng brei sang dôk, snăn hlăm klei hdĭp kâo mơak leh, mơ̆ng ară anei kơ êdei anăp amâo lŏ hyưt ôh kơ hlĭm hjan"

        Ƀuôn prŏng Đà Nẵng ară anei mâo êbeh 100.000 čô mnuih mâo bruă tŭ dưn hŏng cách mạng. Mâo prăk mơ̆ng gưl dlông, prăk mơ̆ng ƀuôn prŏng, mơ̆ng phung thâo bi đru, truh kơ ară anei alŭ wal mâo mdơ̆ng brei leh sang mrâo, lehanăn lŏ mkra wĭt êbeh kơ 10 êbâo boh sang kơ phung mâo bruă tŭ dưn, hŏng ênoh bi liê jih jang giăm 330 êklai prăk. Lê Văn Minh, K'iăng khua knơ̆ng bruă mnuih ngă bruă, phung knap mñai ƀuôn prŏng Đà Nẵng lač, êlâo dih ênoh đru mdơ̆ng brei sang hdơr knga tla ai jing mơ̆ng 30 êklăk truh 40 êklăk prăk snăn ară anei đĭ truh 60 êklăk prăk/sang, mâo đa đa truh 100 êklăk prăk, mâo mdơ̆ng kjăp dưi krơ̆ng hŏng hlĭm hjan angĭn êbŭ:

“Hdră êlan knŭk kna đru kơ mnuih mâo bruă tŭ dưn dôk hlăm klei dleh dlan, ƀun ƀin, ƀuôn prŏng mâo klei mđing lehanăn kčĕ leh kơ dŭm alŭ wăl ngă klei bi đru kơ digơ̆ jing tal êlâo. Čiăng kơ klei hdĭp mda digơ̆ knar hŏng klei hdĭp mnuih ƀuôn sang hlăm krĭng wăl. Ƀuôn prŏng hlue ngă tui si klei gưl dlông ktrâo atăt, mdơ̆ng brei mrâo sang dôk kơ digơ̆. Mđing uêñ duh mĭn kơ klei hdĭp kơ mnuih mâo bruă tŭ dưn, dưi mâo anôk dôk hơĭt lehanăn siam”./.