Hluê si dhar bruă mặt trận čar Dak Lak, găn 20 thŭn mkŏ mjing, Hruê knăm bi mguôp djuê ana ƀrư̆ ƀrư̆ dưi pŏk mlar hlăm klei hdĭp mnuih ƀuôn sang alŭ wăl. Hŏng hdră êđăp ênang, mkiêt mkriêm, tŭ dưn, grăp thŭn jih jang krĭng ƀuôn sang hlăm čar mkŏ mjing sơăi hruê knăm anei. Lu krĭng mđup brei sang bi mguôp, čuă êmuh gŏ sang knŭk kna dlăng ba, gŏ sang ƀun ƀin, pah mni dŭm êpul êya, grăp čô mâo bruă tŭ dưn hlăm yang ƀuôn.

Bruă mặt trận dŭm gưl čar Dak Lak dưi iêo mkrum êbeh 280 êklai prăk hlăm keh prăk đru kơ mnuuih kñap mñai, đru rŭ mjing êbeh 5.500 sang bi mguôp leh anăn 2.000 bruă mkŏ mkra yang buôn. Boh nik hlăm 2 thŭn klei ruă tưp Covid-19, čar mâo leh klei bi mguôp hlăm bruă gang mkhư̆ klei ruă tưp hŏng prăk leh anăn mnơ̆ng dhơ̆ng mâo ênoh êbeh 55 êklai 600 êklăk prăk.