Tlam mbruê 17/9, Knơ̆ng gĭt gai lĭng kahan čar Dak Lak mkŏ mjing klei bi tuôm hŏng phung mâo kơhưm mnuih djuê biă. Kluôm čar ară anei mâo êbeh 1.060 čô mâo kơhưm êdah êdi hlăm 49 djuê ana. Hlăm mmông bi tuôm, phung bi ala kah mbha klei hriăm hlăm bruă čung ba mnuih ƀuôn sang, bi mgrăng, mkŏ mkra krĭng ƀuôn sang mrâo, mtrŭt mjhar phung êdam êra nao kahan. Blŭ hrăm hlăm mmông bi tuôm, Đại tá Niê ta, khua knơ̆ng gĭt gai lĭng kahan čar Dak Lak čih yap dŭm klei đru mguôp prŏng mơ̆ng phung mduôn ƀuôn, khua ƀuôn, phung mâo kơhưm hŏng bruă klam lĭng kahan ti alŭ wăl.

Đại tá Niê Ta mñă lŏ dơ̆ng bi mguôp bi kna hdră bhiăn lăn čar hŏng hdră bhiăn djuê ana, hâo hưn, mtrŭt mjhar mnuih ƀuôn sang hluê ngă hdră êlan mơ̆ng Đảng leh anăn knŭk kna. Wưng anei, Knơ̆ng gĭt gai lĭng kahan čar mđup brei hră pah mni kơ 30 čô hlăm bruă klam lĭng kahan, đru mkŏ mjing bruă lĭng kahan hlăm jih jang mnuih ƀuôn sang.