Klei bi klă mrô 430, hruê 5/11 mơ̆ng Êpul khua bruă Đảng čar Dak Lak bi tŭ ư hdră êlan đru kơ ênoh prăk mĭn tĭng giăm 15,5 êklai prăk, hluê si klei kčĕ mơ̆ng Êpul khua dhar bruă mặt trận čar.

Ênoh đru mkŏ mjing klei găl čiăng kơ dŭm wăl anôk ƀuôn sang mkŏ mjing mmông huă ƀơ̆ng mbĭt, đru kơ knuă druh leh anăn mnuih ƀuôn sang bi tuôm, mjĕ mjuk, hyuă kjăp klei khă ƀuôn sang. Bruă sang čư̆ êa čar Dak Lak mâo bruă klam ksiêm dlăng, bi kna ngăn prăk, mjêč bi leh hră mơar, rơ̆ng jao ênoh prăk truh kơ dŭm alŭ, ƀuôn mnuih ƀuôn sang êlâo kơ hruê 10/11.

Hŏng akŏ Dak Lak - Anôk bi kƀĭn dŭm knhuah siam dhar kreh, hruê kăm dhar kreh Klei bi mguôp jih jang djuê ana čar Dak Lak srăng mkŏ mjing mơ̆ng hruê 17- 24/11, nao mbĭt hŏng hruê bi mguôp jih jang djuê ana leh anăn hruê knhuah gru mặt trận djuê ana hluh hluh hlir Việt Nam 18/11.

Phạm Văn Bảy, k’iăng khua dhar bruă mặt trận čar Dak Lak brei thâo, bruă mprăp kơ hruê knăm ti nah gŭ lŏ nao mbĭt hŏng pah mni dŭm alŭ ƀuôn êdah êdi leh anăn kriê dlăng kơ dŭm gŏ sang dleh dlan. Mặt trận čar Dak Lak ăt mĭn tĭng dăp 2.330 hnư mnơ̆ng mđup brei kơ gŏ sang ƀun leh anăn gŏ sang Knŭk kna dlăng ba, grăp hnư 500.000 prăk

“Mặt trận ăt mtô kơ dŭm să, ƀuôn hgŭm ksiêm dlăng dŭm alŭ ƀuôn ti alŭ wăl pô čiăng ruah mơ̆ng 1 -2 alŭ ƀuôn êdah êdi čiăng mñă kơ mặt trận pah mni alŭ ƀuôn êdah êdi. Mbĭt anăn hưn hŏng êpul khua bruă Đảng čar tiŏ nao phung khua hlăm êpul bruă Đảng čar klam kơ alŭ wăl nao hgŭm hlăm dŭm alŭ ƀuôn êdah êdi, čiăng đru leh anăn bi mguôp mđup brei sang bi mguôp, mđup brei hnư mnơ̆ng kơ dŭm gŏ sang ƀun, boh nik jing ƀun ƀin hĭn hlăm wưng anăn”.