Kluôm čar ară anei ebêh 1 êbâo boh sang hră mơ̆ng gưl hđeh điêt truh kơ gưl 3, hŏng giăm 470 êbâo čô hđeh sang hră, hlăm anăn mâo hđeh sang hră mnuih djuê ƀiă gưl hđeh điêt mâo 35%, hđeh sang hră gưl 1 mâo 40%. Thŭn hriăm 2021 - 2022, mâo 98% čô hđeh sang hră gưl sa bi leh klei hriăm klei Yuăn; ênoh hđeh sang mnuih djuê ƀiă mŭt adŭ 1 djŏ thŭn (6 thŭn) mâo 99,8%.

 Hlăm wưng kơ anăp, bruă sang hră mtô bi hriăm čar Dak Lak lŏ dơ̆ng mđĭ klei bi hriăm mbŏ mđĭ klei thâo kơ phung knuă druh, nai mtô, hdră mkŏ mjing hriăm klei Yuăn kơ hđeh sang hră mnuih djuê ƀiă gưl hđeh, gưl sa. Mđĭ hnơ̆ng bi hriăm klei Yuăn thiăm 2 blư̆/hruê kăm mơ̆ng adŭ 1 truh adŭ 5; mđĭ klei Yuăn mơ̆ng klei blŭ djuê ana leh anăn răng kriê knhuah dhar kreh dŭm djuê ana; mđĭ klei Yuăn hlăm dŭm klei hriăm leh anăn bruă mtô bi hriăm…