Wĭt kơ sang leh 5 hruê nao mdei msăn ti Anôk bruă kriê dlăng phung mâo ai hŏng lăn čar ti čar Dak Lak, kahan êka êkeh Y Siêng Niê, ƀuôn Chiêng Kao, să Dak Phơi, kdriêk Lăk ăt bŏ hŏng klei mơak:

 “Nao mơak snăk, huă mnăm jăk, kriê dlăng jăk snăk. Čar Nghệ An ăt mâo, čar Sóc Trăng ăt mâo, kdriêk Ea Kar anei, kdriêk Ƀuôn Đon anei, kdriêk Ea Sup, Čư̆ Kuin anei bi mmuiñ “5 ayŏng adei hlăm sa boh êdeh sar”, leh anăn “bi čuh dram pui, mơak snăk, grăp mlam mmuiñ, bi yăl dliê klei leh êgao, tinei kâo nao bi blah, bi kâo ti adih. Yang hruê snăn nao hiu hlăm ƀuôn prŏng Ƀuôn Ama Thuôt.”

 Hlăm boh sang dlông mrâo, ayŏng Y Mực Liêng, anak êkei kahan êka êkeh Y Hiên Ông, ti ƀuôn Sruông, să Bông Krang, kdriêk Lăk brei thâo, amâo lŏ rŭng răng kơ adiê hjan mđiă ôh anăn ai tiê leh anăn klei suaih pral ama ñu jăk leh, gŏ sang ăt hơĭt ai tiê mă bruă, mđĭ kyar bruă duh mkra:

 “Ama kâo mâo ai krŭ kdơ̆ng leh anăn knŭk kna đru ñu sa mlan 3 êklăk leh anăn thiăm 50 êklăk prăk, gŏ sang čan thiăm čiăng mkra sang kơ ama. Kyua mâo knŭk kna đru prăk bi liê čiăng đru kơ ñu leh anăn klei hdĭp mda grăp hruê ăt dưi đru leh anăn kriê dlăng klei suaih pral jăk hĭn. Kâo bi mni kơ bruă sang čư̆ êa alŭ wăl ƀuôn hgŭm nao êmuh hrăm leh anăn mđup brei mnơ̆ng kơ ñu.”

Hlue si Phạm Thị Lệ Vân, Adŭ bruă kahan êka êkeh ala ƀuôn kdriêk Lăk, 1489 čô gŏ sang knŭk kna dlăng ba, phung mâo ai hŏng lăn čar dưi kriê dlăng jăk leh anăn mâo hnơ̆ng hdĭp mtăp mđơr amâodah lu hĭn. Ară anei kdriêk kƀĭn đru čiăng amâo brei ti gŏ êsei hdĭp dleh dlan ôh.

 “Hŏng kdriêk Lăk snăn bruă hâo hưn mtô mblang leh anăn tla prăk đru kơ phung dleh dlan snăn dưi hmao mprăp, ƀiădah ăt adôk 12 gŏ êsei hlăm gŏ êsei ƀun. Čiăng gĭr đru kơ 12 gŏ êsei anăn tlaih ƀun snăn ăt hưn kơ Knơ̆ng bruă mnuih mă bruă snăn ăt mâo leh hdră kčah hlue si klei găl grăp gŏ sang snăn đru sang, tơdah mâo leh sang snăn đru êmô mjeh amâodah đru hră prăk mkiêt mkriêm.”

 Hlue si Knơ̆ng bruă mnuih mă bruă kahan êka êkeh leh anăn ala ƀuôn čar Dak Lak, ară anei kluôm čar mâo 45 êbâo čô mâo ai krŭ kdơ̆ng, hlăm anăn êbeh 10 êbâo čô dôk dưn klei đru grăp mlan. Hlăm dŭm thŭn êgao, dŭm bruă kriê dlăng kơ phung mâo ai krŭ kdơ̆ng leh anăn gŏ sang knŭk kna dlăng ba mâo čar mđing dlăng djŏ hdră. Hjăn thŭn anei, čar mkŏ mjing lu gưl hŏng giăm 400 čô mâo ai krŭ kdơ̆ng nao mdei msăn, hiu chưn dlăng; nao čhưn mđup brei mnơ̆ng kơ phung mâo ai hŏng lăn čar hŏng ênoh êbeh 15 êklai prăk. Gưl 17-7 thŭn anei, čar ăt pioh êbeh 6 êklai prăk čiăng kriê dlăng kơ phung mâo ai krŭ kdơ̆ng leh anăn gŏ sang knŭk kna dlăng ba.

 Khădah snăn, Nguyễn Quang Thuân, K’iăng Khua Knơ̆ng bruă kahan êka êkeh ala ƀuôn čar Dak Lak brei thâo, yap truh knhal jih thŭn 2022, čar ăt dôk êbeh 900 gŏ êsei knŭk kna dlăng ba jing dleh dlan hlue si hnơ̆ng kčah lu tĭng, êbeh 600 gŏ sang adôk dleh dlan kơ sang dôk.  Hlăm wưng kơ anăp, čar srăng kƀĭn djăp klei găl čiăng amâo mâo ôh gŏ êsei ƀun hlăm gŏ sang knŭk kna dlăng ba leh anăn phung mâo ai krŭ kdơ̆ng.

 “Gĭr ktưn truh jih thŭn 2024 srăng klă klơ̆ng msir mgaih kơ dŭm gŏ êsei knŭk kna dlăng ba ară anei dôk dleh dlan kơ sang dôk, tal dua jing tlaih mơ̆ng gŏ êsei ƀun. Tlaih ƀun tinei snăn mâo lu mta phŭn, mta phŭn kơ lu tĭng snăn mâo lu hnơ̆ng kčah jing srăng bi hgŭm hŏng dŭm knơ̆ng dhar bruă mơ̆ng anôk anăn čiăng mâo bruă klam msir mgaih leh anăn bi hŏng dŭm gŏ sang amâo mâo hlei pô mă bruă amâodah amâo mâo lăn ala mkra mjing snăn akâo kơ ala ƀuôn đru grăp mlan leh anăn kbiă hlăm anăn gŏ êsei ƀun. Čar srăng mâo dŭm hdră msir klă klơ̆ng čiăng msir mgaih leh anăn đru kơ dŭm gŏ sang knŭk kna dlăng ba.”