Mlan 9 thŭn 2022, adei Lương Thị Trâm Anh, đoàn viên adŭ 12A4, Sang hră gưl 3 Phan Bội Châu, kdriêk Krông Hnang, čar Dak Lak dưi mŭt Đảng êjai ñu mrâo bŏ 18 thŭn. Anei jing klei hing ang kơ phung nai mtô, phung ƀĭng găp hlăm klei hriăm hră mơar mơ̆ng adei hlăm lu thŭn êgao. Adei Trâm Anh brei thâo: “Mmông mŭt Đảng kâo ƀuh msĕ si jing sa čô mnuih mkăn. Anăn jing knhuang prŏng hlăm klei hdĭp pô. Kyuanăn pô srăng ngă bi leh jăk bruă klam pô”.

Bi adei Võ Thị Như Ngọc – Khua bruă đoàn adŭ 12A1, Sang hră gưl 3 Lê Quí Đôn, ƀuôn prŏng Ƀuôn Ama Thuôt, čar Dak Lak brei thâo, hlăm klei hriăm hră mơar, adei mâo nanao klei gĭr ktưn, bi mjuăt pô čiăng lŏ čuê knhuah gru gŏ sang jing dưi mŭt hlăm Đảng. Hlăm dŭm thŭn hriăm hră, adei mâo nanao klei pah mni kdlưn hĭn, hur har hlăm bruă Đoàn. Kyua dŭm klei gĭr mơ̆ng pô, mlan 10 mrâo êgao, adei mâo bruă Đảng nah gŭ hlăm sang hră hưn mdah brei hriăm alŭ thâo săng kơ Đảng. Anei jing phŭm kčưm đuč ƀiădah ƀuh jing hing ang êdi: “Kâo ƀuh mơak êdi kyua jing sa čô hlăm dŭm čô dưi nao hriăm adŭ mŭt Đảng. Anei jing mmông găl čiăng kơ kâo dưi mđĭ kyar pô leh anăn dưi bi lar klei hur har, klei gĭr ktưn truh kơ grăp čô ƀĭng găp hlăm sang hră”.

Nai Nguyễn Thị Xuân Hương, Khua hlăm bruă Đảng nah gŭ, khua kiă kriê sang hră gưl 3 Lê Quí Đôn lač, bruă hmao ƀuh, mtô bi hriăm mđĭ kyar đảng viên mơ̆ng diñu dôk hriăm ti sang hră jing năng mjêč leh anăn mâo lu boh tŭ dưn jăk. Kyua bruă anei amâo djŏ knŏng bi mbŏ ai dưi, mđĭ hnơ̆ng tŭ jăk kơ dŭm anôk bruă Đảng, bi mda êpul đảng viên, ƀiădah lŏ đru mguôp yuôm bhăn hlăm bruă tă hdră mtô mjuăt bi hriăm klei mĭn bruă kđi čar hlăm sang hră mơar. Mbĭt anăn, bi lar klei đăo knang mơ̆ng phung mda asei hŏng Đảng, đru kơ diñu mâo klei mĭn leh anăn klei hmăng hmưi. “Phung mda asei ară anei diñu hur har êdi, srăng dưi mđĭ kyar đảng mơ̆ng phŭn kčưm čiăng kơ leh diñu mŭt hriăm ti sang hră gưl prŏng dưi mâo klei găl bi klă pô hnưm hĭn”.

Čiăng mđĭ kyar phung đảng viên mda asei hlăm sang hră mơar, bruă đảng nah gŭ, Êpul kiă kriê sang hră srăng ktrâo lač, mtô kơ dŭm êpul bruă đoàn bi lar ktang hĭn bruă klam mơ̆ng Êpul bruă hđeh êdam êra hlăm bruă tă hdră, mtô mjuăt hlăm klei mĭn, bruă kđi čar, klei thâo săng kơ Đảng mơ̆ng phung hđeh sang hră. Mbĭt anăn, mkŏ mjing dŭm mta bruă čiăng mtô mjuăt, thâo săng klă klei mĭn, klei čiăng leh anăn tă hdră kơ diñu dưi gĭr ktưn. Mơ̆ng klei hriăm mđĭ kyar đảng viên hlăm sang hră mơar mơ̆ng pô. Lã Mạnh Hà, khua bruă Đảng nah gŭ, Khua kiă kriê sang hră gưl 3 Phan Bội Châu, kdriêk Krông Hnang brei thâo: “Êpul bruă hđeh êdam êra cộng sản Hồ Chí Minh hlăm sang hră dưi mâo klei đru, klei sa ai mơ̆ng bruă đoàn kdriêk ăt msĕ hŏng dŭm êpul bruă kđi čar yang ƀuôn, kyuanăn diñu mâo klei thâo săng mơ̆ng êlâo, kyuanăn sang hră ăt rơ̆ng hnơ̆ng čoh čuăn klei hrŏng ruah. Hlăm bruă mtô mjuăt bi hriăm, phung nai mtô ăt msĕ hŏng phung nai kiă kriê adŭ hriăm tă êlan leh anăn ksiêm dlăng čiăng đru kơ sang hră bi leh bruă klam kđi čar, boh nik mđĭ kyar đảng viên jing phung hđeh sang hră”.

Hluê si Phạm Đăng Khoa, Khua kiă kriê knơ̆ng bruă mtô mjuăt bi hriăm čar Dak Lak, thŭn hriăm 2021 – 2022 mâo 18 čô hđeh sang hră gưl 3 dưi bi mŭt Đảng. Anei jing ênoh ƀiă mkă hŏng ênoh 41.000 čô đoàn viên hlăm dŭm sang hră gưl 3 ti čar. Kyuanăn, knơ̆ng bruă mtô mjuăt bi hriăm mtă kơ dŭm sang hră uêñ mĭn lu hĭn kơ bruă mđĭ kyar đảng viên jing phung hđeh sang hră, dlăng anei jing mta kñăm bruă kđi čar. Phạm Đăng Khoa brei thâo: “Hmei uêñ mĭn čiăng mkŏ mjing sa wăl brei phung hđeh dưi hriăm leh anăn bi leh bruă klam pô hlăm klei hriăm hră mơar, thâo săng bruă klam mơ̆ng hlăk thŭn mda jing dưi mŭt hlăm êpul bruă Đảng, čiăng kơ diñu dưi đru mguôp ai tiê pô hlăm bruă mkŏ mjing leh anăn răng mgang ala čar Việt Nam êdei dih”.

Hŏng klei uêñ mĭn mđĭ kyar đảng viên mda asei hlăm sang hră, Dhar bruă mtô mjuăt bi hriăm čar Dak Lak dôk gĭr ktưn mkŏ mjing êpul đang viên mda asei mâo klei thâo, klei kjăp hlăm bruă kđi čar. Mơ̆ng anăn, dưi râo klei hmăng hmưi đru mguôp mơ̆ng phung mda asei čiăng mkŏ mjing Đảng, mkŏ mjing bruă kđi čar leh anăn mđĭ kyar alŭ wăl, mđĭ kyar ala čar.