Mơ̆ng anăn, čar Daklak srăng bi liê truh 400.000 prăk/čô mnuih, lehanăn đru kơ êbeh 13.600 čô mnuih mâo bruă tŭ dưn; hŏng ênoh 500.000prăk/gŏ sang kơ 591 gŏ êsei amĭ Việt Nam jhŏng ktang djiê leh; bi liê 1.200.000 prăk/čô mnuih kơ 118 čô mnuih mâo bruă tŭ dưn. Êngao anăn čar lŏ bi liê truh 15 êklăk prăk pioh nao čuă mđup brei mnơ̆ng kơ 3 anôk bruă rông ba kahan êka êkeh kjham lehanăn anôk rông ba mnuih mâo bruă tŭ dưn ti Bà Rịa Vũng Tàu, ƀuôn prŏng Đà Nẵng lehanăn čar Daklak.

Wưng anei, phung khua kiă kriê čar Daklak srăng mkŏ mjing êpul nao čuă lehanăn mđup brei mnơ̆ng kơ phung amĭ Việt Nam jhŏng ktang, dŭm gŏ êsei mnuih mâo bruă tŭ dưn hŏng ênoh mnơ̆ng mđup brei jing 2.500.000 prăk. Jih jang bruă nao čuă msat phung êngiă asei, čuh diăn hdơr knga mâo mkŏ mjing mơh hlăm kluôm čar./.