Mơ̆ng keh đru ba mnuih ngă lŏ hma anei, dŭm êpul hgŭm phung ngă lŏ hma čar Daklak bi liê leh giăm 2 êbâo 500 gŏ êsei mâo čan pioh bi liê mđĭ kyar klei hdĭp mda. Mbĭt hŏng anăn lŏ čan prăk mơ̆ng knơ̆ng prăk đru ba bruă yang ƀuôn kơ êbeh 15 êbâo gŏ sang mâo čan êbeh 600 êklai prăk, lehanăn brei phung duh mkra čan kñăm đru mkăp mnơ̆ng mă bruă kơ phung pla mjing msĕ si hbâo prue, mjeh mjiêng, mnơ̆ng ƀơ̆ng kơ mnơ̆ng rông hlue hŏng hdră tla ƀrư̆ ƀrư̆, hŏng ênoh jih jang truh 70 êklai prăk.

Čiăng kơ jih jang prăk mâo čan mă bruă tŭ jing, hlăm thŭn anei, êpul hgŭm phung ngă lŏ hma čar Daklak lŏ dơ̆ng kčĕ kơ ƀĭng hgŭm duh mkra pla mjing, rông mnơ̆ng dưn yua ênŭm klei kreh knhâo, kdrăp mrâo, tui duah klei čhĭ boh mnga pô hŏng klei jăk. Lač kơ klei tŭ dưn ba yua prăk đru ba kơ mnuih ngă lŏ hma, aduôn Lại Thị Loan, Khua êpul hgŭm ƀĭng ngă lŏ hma čar Daklak lač:“Mơ̆ng keh anei mâo leh lu êpul ƀĭng ngă lŏ hma bi mguôp hlăm klei ngă bruă, mkŏ mjing leh lu êpul hgŭm. Bi đru hlăm hdră mă bruă. Mđĭ kyar nanao hlăm mnêč duh mkra, bi mlih hdră êlan mă bruă bi djŏ hŏng klei kreh knhâo, kñăm đru ƀĭng ngă lŏ hma dưi kpưn đĭ tlaih mơ̆ng klei dleh dlan. Mơ̆ng keh prăk anei mâo ngă leh tŭ jing dŭm mta bruă bi mlih mrô, lehanăn bi mlih hdră êlan mă bruă mơ̆ng anôk duh mkra pla mjing điêt hlê jing leh êpul hgŭm hlăm klei duh mkra pla mjing lehanăn rông mnơ̆ng prŏng”./.