Gut gut dôk bi mdoh war êning lehanăn mčiêm bê ƀơ̆ng Nay Y Than, djuê ana Jrai, ti ƀuôn Dang, să Ea Hleo, kdriêk Ea Hleo, čar Daklak brei thâo, anei jing hlao bê mơ̆ng êpul kahan ksiêm kdriêk Ea Hleo đup brei hlăm hdră “Rah mjeh jăk hŏng phung tăm lĕ hlăm êlan čhuai” mơ̆ng krah mlan 7 thŭn anei.

 Kyua tăm hmư̆ hĕ klei phung soh mplư ngă klei bi rŭng mâo hŏng anei 9 thŭn Nay Y Than čhĭ jih lăn ala, sang pưk jak ba mô̆ anak đuĕ nao găn knông lăn truh kơ   Cam Pu Chia lehanăn kơ anăn lačdah mâo mnuih mơ̆ng ala tač êngao mđuĕ ba Thái Lan jưh dôk kơ anăn. Mĭndah mâo klei hdĭp jăk mơak, ƀiădah kyua amâo mâo thâo klei blŭ, duah ƀơ̆ng dleh dlan, amâo mâo djăp yua kơ klei hdĭp ôh, gŏ sang ñu lĕ hlăm klei dleh dlan.  Mâo knŭk kna đru dưi lŏ wĭt kơ ƀuôn sang, lehanăn mâo klei mtă mtăn mđĭ ai, ñu ƀuh yơh klei ñu ngă jing soh čhuai, lehanăn gĭr ktir lŏ čô̆ bruă knuă mơ̆ng akŏ. Nay Y Than lač:

 Thŭn 2014 kâo hmư̆ klei phung soh mplư, tui hlue diñu đuĕ nao kơ Thái Lan, leh mâo kahan ksiêm alŭ wăl đru kâo lŏ wĭt kơ Việt Nam snăn kâo ƀuh bruăkâo ngă anăn jing soh, mơ̆ng arsă anei kâo gĭr duh ƀơ̆ng bi jăk hŏng ƀuôn sang. Ară anei kahan ksiêm kdriêk, lehanăn čar mđup brei kơ kâo bê pioh rông, snăn kâo mơak snăk, pioh mđĭ kyar klei hdĭp mda”.

Mbĭt hŏng gŏ sang Nay Y Than lŏ mâo 5 gŏ sang mkăn mâo tŭ mă bê pioh rông hlue hdră “Rah mjeh jăk hŏng phung tăm lĕ hlăm êlan čhuai”. Anei jing dŭm gŏ sang dôk hlăm klei dleh dlan, tuôm găn leh knông lăn, lŏ wĭt kơ ƀuôn sang, phung mâo wĭt leh mơ̆ng mnă, phung tuôm lĕ hlăm klei soh čhuai, čang hmăng dưi lŏ wĭt mkra klei hdĭp pô. Ênoh bi liê mđup brei bê giăm 100 êklăk prăk, mâo kahan ksiêm kdriêk Ea Hleo mtrŭt mjhar đru mguôp mơ̆ng ayŏng adei lĭng kahan, lehanăn mbĭt hŏng phung bi đru mkrum leh.

Êlâo anăn, thŭn 2021, hŏng hdră ngă anei, kahan ksiêm kdriêk Ea Hleo mâo đru leh mơh dŭm hlâo drei bê kơ dŭm gŏ sang, pioh kơ digơ̆ mđĭ kyar klei hdĭp mda. Truh ară anei, dŭm gŏ êsei mâo leh êbeh 30 drei bê, klei hdĭp mda dơ̆ng mâo klei bi mlih, dơ̆ng tlaih leh mơ̆ng klei dleh dlan, lehanăn lŏ dơ̆ng mđup brei bê ana mđai pô rông leh mbha kơ mnuih dôk hlăm klei dleh dlan hĭn kơ pô lĕ lŏ rông.

 Amâo mâo djŏ mđup brei bê kơ mnuih ƀuôn sang rông đuič ôh, ƀiădah hlăm grăp mlan, phung knuă druh kahan ksiêm kdriêk lŏ tiŏ nao truh hŏng ƀuôn sang, păn kjăp boh klei, mjut mjing klei mjĕ mgiăm hlăm mnuih ƀuôn sang, mđup brei braih, ƀung hdang krô, lehanăn mnơ̆ng yua mkăn kơ mnuih ƀuôn sang dleh dlan. Lu knuă druh kahan ksiêm lŏ tui hriăm klei blŭ mnuih djuê ƀiă, čiăng thâo bi blŭ tlao, yăl dliê hŏng mnuih ƀuôn sang, lehanăn mđrăm mbĭt bi răng kriê klei êđăp ênang hlăm grăp boh ƀuôn. Nay Niết, djuê ana Jrai, ti ƀuôn Cham, să Ea Sol, kdriêk Ea Hleo lač:

 Kahan ksiêm kreh mđup brei braih, ƀung hdang krô kơmnuih ƀuôn sang hlăm ƀuôn. Diñu kreh hriê mđĭ ai, mtrŭt mjhar mnuih ƀuôn sang, boh nik ti anôk bi kƀĭn ƀuôn, mơ̆ng kahan ksiêm, khua ƀuôn mâo nanao klei mtă mtăn mnuih ƀuôn sang. Mnuih ƀuôn sang hlăm ƀuôn čŏng bi gĭr ktĭr duh ƀơ̆ng mă bruăknuă, amâo duah hmư̆ ôh klei phung soh mplư mtrŭt ngă dŭm mta klei jing soh hŏng hdră bhiăn”.

Čiăng kơ bruă mkŏ mkra klei hdĭp mda dhar kreh ti alŭ wăl, kahan ksiêm kdriêk Ea Hleo bi mguôp leh kjăp hŏng bruă sang čư̆ êa lehanăn hŏng êpul khua kiă kriê klei đăo mtô mblang mtă mtăn kơ mnuih ƀuôn sang, bi mkŏ mjing klei hdĭp dhar kreh, đru bi hgŭm hlăm bruă mkŏ mkra krĭng ƀuôn sang mrâo. Kahan ksiêm ăt bi mguôp hŏng dŭm boh ƀuôn mkŏ mjing klei kưt muiñ, mjuăt asei mlei, kñăm mjing klei thâo bi mguôip plah wah mnuih ƀuôn sang hŏng êpul kahan ksiêm.  Y Jô Suê Ksơr, Khua Pô Mtô Sang Aê Diê Klei mrâo mrang Jăk Ea Sol, să Ea Sol, kdriêk Ea Hleo brei thâo:

Mbĭt hŏng mnuih ƀuôn sang, snăn kahan ksiêm ti să, kdriêk bi mguôp hâo hưn wăt hlăm sang Aê Diê, tơdah mâo hlei pô hlăm găp djuê adôk djă pioh phao ktuang snăn bi ba wĭt, pioh răng mgang kjăp klei êđăp ênang kơ asei mlei pô lehanăn kơ găp djuê, huĭdah mâo hĕ klei amâo mâo jăk truh hlăm klei hnĭng ênguôt. Ăt hâo hưn mtô mblang kơ mnuih ƀuôn sang hlue gưt bi jăk klei bhiăn êđăp ênang hlăm êlan klông. Mtă bi gĭr ktir duh ƀơ̆ng”.

Tui si Thượng tá Nguyễn Công Hòa, Khua kahan ksiêm kdriêk Ea Hleo, mđrăm mbĭt hŏng bruă mđĭ kyar klei hdĭp mda, lehanăn đru bi răng mgang klei êđăp ênang lehanăn bi rŭ mdơ̆ng klei hdĭp dhar kreh anăn yơh jing 3 mta bruă ngă mđrăm hlăm sa blư̆, mâo leh Êpul bruă Đảng kahan ksiêm kdriêk pŏk ngă mơ̆ng hlăk thŭn 2021 truh kơ ară anei. Bruă anei mâo tŭ mă jăk klei sa ai mơ̆ng jih jang phung knuă druh, kahan ksiêm. Đru mjing leh klei thâo bi mguôp kjăp plah wah kahan ksiêm hŏng mnuih ƀuôn sang, đru kơ bruă răng mgang klei êđăp ênang hlăm ƀuôn sang jăk hĭn:

 “Bruă đru čung ba mnuih ƀuôn sang ară anei, jing bruă ngă nanao, hŏng lu klei bi hmô jăk, hlăm anăn mâo 3 mta bruă ngă mtam mđrăm hlăm sa blư̆ mâo ngă lehanăn ƀuh mâo klei tŭ dưn jăk snăk. Kahan ksiêm kdriêk lŏ iêo jak klei bi đru mơ̆ng phung thâo bi đru blei dŭm hlâo bê, dŭm ênoh braih, ƀung hdang krô, lehanăn mnơ̆ng yua mkăn. Bruă ngă anei bi êdah ai tiê klei khăp mơ̆ng êpul kahan ksiêm hŏng mnuih ƀuôn sang mdul hĭn klei dleh dlan”.

   Mơ̆ng klei jĕ giăm hŏng mnuih ƀuôn sang, siă suôr hŏng alŭ wăl nah gŭ, kahan ksiêm kdriêk Ea Hleo čŏng ngă leh dŭm bruă bi mlih mnơ̆ng ƀơ̆ng huă đru mđĭ ai mtrŭt mjhar mnuih ƀuôn sang ba wĭt phao ktuang. Kyuanăn, mnuih ƀuôn sang thâo săng lehanăn nao ba wĭt dŭm mta phao ktuang čŏng mkra mjing, lehanăn mnơ̆ng mtuh djăp mta. Hdră ngă anei mơ̆ng kahan ksiêm kdriêk Ea Hleo mâo leh phung khua kiă kriê kahan ksiêm čar Daklak bi mni, mâo leh lu êpul bruă ba yua lehanăn bi lar, đru bi hơĭt klei êđăp ênang ti dŭm alŭ wăl mnuih ƀuôn sang dôk./.