Klei mđup brei mnơ̆ng anei jing sa kdrêč hlăm bruă bi đru mâo anăn “Kuč mngač kơ Ƀuôn Kiêu – Light up Buon Kieu” mơ̆ng dŭm êpul bruă bi đru. Hlăm anăn, mâo 30 boh computer kơ sang hră gưl 2 Yang Mao, lehanăn 30 boh mkăn mđup brei sang dlăng hră Ƀuôn Kiêu, mbĭt hŏng klei đru tla jih klei ba yua internet. Êngao anăn, êpul lŏ mđup brei 20 hnư prăk đru hriăm hră mơar kơ phung hđeh hriăm hră ti ƀuôn Kiêu, mâo klei hdĭp dleh dlan ƀiădah hriăm hră thâo, grăp hnư̆ prăk đru hriăm hră jing 1 êklăk prăk.

Nai Trần Hữu Phước, khua sang hră gưl dua Yang Mao brei thâo, klei hriăm hră mơar mơ̆ng hđeh hriăm hră ti ƀuôn Kiêu dôk hlăm klei dleh dlan, mâo dŭm êpul êya đru kơ prăk hriăm hră mơar, lehanăn mđup brei computer anei mjing klei jăk găl kơ hđeh hriăm hră krĭng taih kbưi anei:

“Sang hră mâo leh mơh sa boh adŭ pioh kơ bruă bi hriăm computer, maoa mkŏ dưm mơ̆ng hlăk thŭn 2013, lehanăn truh kơ ară anei amâo thâo mă bruă ôh. Hrue anei lŏ mâo klei đru kơ kdrăp mrâo anei jing jăk êdi, srăng đru kơ klei mtô bi hriăm kơ hđeh hlăm sang hră jing jăk hĭn. Phung hđeh mâo hriăm lehanăn yua kdrăp hriăm mrâo snei jing yuôm bhăn snăk pioh pŏk tui hriăm djăp mta klei mrâo mrang hlăm internet pioh kơ wưng ti anăp hriăm mjuăt bi jăk hĭn”.

        Buôn Kiêu, să Yang Mao jing sa hlăm dŭm boh ƀuôn dôk hlăm klei dleh dlan ti kdriêk Krông Bông, čar Daklak. Kluôm ƀuôn mâo 130 gŏ sang, hŏng ênoh 628 čô mnuih, hnơ̆ng ênoh gŏ sang ƀun giăm 45%. Mâo klei knŭk kna mđing hlăm dŭm thŭn giăm anei ƀuôn mâo leh dŭm êpul bruă đru dŏng hriê čuă mđup brei, lehanăn rŭ mdơ̆ng sang dlăng hră, mkăp anôk bi êran êa pơ̆ng, lehanăn đru mjeh mnơ̆ng pla, hbâo pruê pioh pla mjing./.