Ƀri wưng bi hdơr 77 thŭn hruê phung kahan êka êkeh – phung êngiă asei 27/7, Khua lăn čar mđup brei leh kơ giăm 1,4 êklăk čô phung mâo bruă tŭ dưn, gŏ sang phung mâo ai đru bruă krŭ kdơ̆ng hŏng ênoh giăm 420 êklăk prăk. knŭk kna ba mdah leh hdră mtrŭn mrô 77, hruê 01/07/2024 bi klă ênoh đru kơ phung mâo bruă tŭ dưn hŏng hnơ̆ng đĭ kah knar 35,7%. Anei jing hnơ̆ng đĭ lu hĭn hlăm dŭm gưl mkra mlih, mâo phung ktuê dlăng, phung mâo bruă tŭ dưn bi mni, sa ai.

Phŭn bruă mnuih mă bruă kahan êka êkeh leh anăn ala ƀuôn bi klă klei hưn hlăm msat phung djiê êngiă. Bruă kriê dlăng, uêñ mĭn, ngă bruă hdơr knga tla ai amâo djŏ knŏng bi êdah klei thâo bi khăp, hdơr kơ phung kahan êka êkeh, kahan ruă duam, gŏ sang phung êngiă asei leh anăn phung mâo bruă tŭ dưn, đru bi dluh ƀiă klei ruă ênguôt, klei luč liê phung dôk hdĭp ƀiădah lŏ jing bruă klam mơ̆ng ênuk ară anei leh anăn êdei anăp hŏng phung asăn asei kyua klei êngiê djuê ana, lăn čar.