Leh lu blư̆ mkra mlih, truh kơ ară anei, klei năng mđing hlăm hdră bhiăn lăn yua (mkra mlih) dưi bi klă dŭm hdră êlan lăn yua kơ mnuih ƀuôn sang mnuih djuê ƀiă. Hluê anăn, bi klă hdră êlan yua lăn, brei mưn lăn dôk, lăn mă bruă kơ mnuih ƀuôn sang mnuih djuê ƀiă jing gŏ sang ƀun ƀin ti alŭ wăl mâo bruă duh mkra dleh dlan čiăng rơ̆ng kơ klei hdĭp.

Mbĭt hŏng hdră êlan jao lăn dôk, lăn mă bruă, hdră bhiăn bi klă jao lăn, brei mưn lăn gưl tal êlâo leh anăn lŏ dơ̆ng jao lăn, brei mưn lăn kơ mnuih ƀuôn sang mnuih djuê ƀiă amâo lŏ mâo lăn amâodah kƀah lăn mă bruă mkă hŏng hnơ̆ng jao lăn, brei mưn lăn. Hdră bhiăn ăt bi klă mkra mlih kơ hlei pô dưi yua lăn mâo klei găl. Hluê anăn, mnuih ƀuôn sang mnuih djuê ƀiă dưi brei kơ pô yua lăn jing phung hlăm gŏ sang lŏ dơ̆ng ba yua lăn dưi jao, brei mưn. Mbĭt anăn bi mbŏ dŭm klei čuăn kơ bruă hrui wĭt lăn čiăng hluê ngă hdră êlan dăp lăn dôk, lăn mkra mjing kơ mnuih djuê ƀiă.