Hlăm sang simăng ti ƀuôn Êa Rông, sa Krông Ana, kdriêk Ƀuôn Đon, čar Daklak, adei H’Hải Niê Kdăm, hđeh hriăm hră adŭ 7A, Sang hră gưl 2 Võ Thị Sáu dôk hriăm hră, hŏng klei hmăng hmưi mgi dih čiăng jing nai mtô hđeh mơh. Gơ̆ êrĭt ama mơ̆ng hlăk 2 thŭn, gŏ sang dôk hlăm klei dleh dlan, amĭ kreh dju djuăm duam ruă nanao. Ƀuh klei hdĭp adei dleh dlan msĕ snăn, thŭn 2019, mâo kđông răng mgang knông lăn Serepok đru ba mtrŭt adei nao sang hră mơar. Hŏng klei đru kơ adei grăp mlan 500 êbâo prăk, knuă druh, lĭng kahan kđông răng mgang knông lăn Serepok kreh jêñ jêñ nao čuă lehanăn mđĭ ai adei, lehanăn mtă mtăn kơ gơ̆ hriăm hră mơar. Thâo săng kơ gŏ sang pô dôk hlăm klei dleh dlan, lehanăn ƀuh lĭng kahan kđông răng mgang knông lăn mâo ai tiê đru ba, H’Hải mâo nanao klei gĭr lehanăn mâo leh klei tŭ dưn jăk hlăm klei hriăm hră mơar: “Di amiêt đru leh kâo lu snăk, kâo lač jăk kơ diñu čung ba kâo hriăm hră mơar. Kâo ăt gĭr jih ai tiê hriăm hră mơar, mâo di amiêt mđĭ ai kâo gĭr hriăm hră, lehanăn diñu đru ktrâo brei kơ kâo lu klei hriăm”.

Ăt êrĭt ama mơ̆ng điêt mơh, gŏ sang dôk hlăm klei dleh dlan, adei Hà Duy Khánh ti alŭ Đừng Nhạp, să knông lăn Ia Lôp, kdriêk Êa Sup mâo leh kđông răng mgang knông lăn Êa H’leo đru gơ̆ nao sang hră mơar. Amai Lò Thị Loan, amĭ Khánh lač, mâo kahan răng mgang knông lăn đru ba, brei kơ hmei mâo klei mơak lehanăn mđĭ ai hmei prŏng snăk:: “Kahan răng mgang knông lăn đru leh kơ anak kâo 500 êbâo prăk/mlan, lehanăn lŏ mâo mnơ̆ng mđup brei mkăn, msĕ si hră mơar, mnơ̆ng mnuă yua, lehanăn truh hŏng gŏ sang čiăng mđĭ ai, ktrâo atăt gơ̆ hriăm hră mơar. Hlăm wưng leh êgao gơ̆ hriăm hră mơar mâo leh klei tŭ dưn”.

Trung uý Hà Văn Tân, knuă druh dôk hlăm êpul đru čung ba phung ƀuôn sang mơ̆ng kđông kahan răng mgang knông lăn Êa H’Leo ñu yơh jing pô đru čung ba adei nao sang hră mơar, lehanăn mâo bruă rông hđeh jing anak rông kơ kđông. Ñu brei thâo, phung hđeh mâo đru ba lu jing hđeh êrĭt êrin, dôk hlăm klei hdĭp dleh dlan wăt kơ mnơ̆ng dhơ̆ng lehanăn ai tiê. Kyuanăn, phung lĭng kahan amâo mâo djŏ knŏng đru kơ mnơ̆ng mnuă, ƀiădah lŏ đru mđĭ ai hlăm klei khăp, kñăm mtrŭt phung hđeh thâo gĭr hlăm klei hriăm hră mơar:: “Phung ayŏng adei lĭng kahan mơ̆ng kđông kreh nao čuă jêñ jêñ, mđĭ ai, mtrŭt mjhar phung hđeh hriăm hră mơar. Mơ̆ng leh mâo ngă bruă anei, ƀuh klă phung hđeh mâo klei đĭ kyar hlăm klei hriăm hră mơar, mâo klei thâo gĭr hĭn, kreh kriăng hĭn”.

Ngă bruă đru adei nao sang hră mơar, lehanăn mjing anak rông kơ kahan răng mgang knông lăn, mơ̆ng thŭn 2014 truh kơ ară anei, kahan răng mgang knông lăn čar Daklak mâo đru ba leh giăm 250 čô hđeh. Hŏng dŭm ênoh đru hlăm grăp mlan 500 êbâo prăk, kđông kahan răng mgang knông lăn lŏ mâo lu bruă đru ba phung hđeh msĕ si mđup brei prăk hriăm hră mơar, mđup brei mnơ̆ng mâo ênoh čiăng kơ phung hđeh hơĭt ai tiê hriăm hră mơar. Thiếu tá Vũ Văn Dương, pô ngă bruă kđi čar kđông kahan răng mgang knông lăn Êa H’Leo lač, kơ klei ngă bruă anei: “Tui si klei gĭt gai mơ̆ng Êpul bruă Đảng, knơ̆ng kiă kriê kahan răng mgang knông lăn čar, êpul êya mâo bi mguôp leh hŏng dŭm gưl bruă Đảng, knơ̆ng bruă sang čư̆ êa alŭ wăl, lehanăn dŭm boh sang hră, mbĭt hŏng găp djuê hđeh hlăm să Ia Lôp čiăng nao ksiêm, yap, hrŏng ruah hđeh dôk hlăm klei dleh dlan hĭn kñăm pioh đru. Truh kơ ară anei, êpul kahan răng mgang knông lăn mâo đru leh kơ 50 čô hđeh. Bi ti alŭ wăl mâo klei sa ai nanao, bi sang hră lehanăn gŏ sang phung hđeh snăn digơ̆ mơak snăk.”

Hlăm klei sa ai mă bruă bi krăp mơ̆ng lĭng kahan răng mgang knông lăn, lu phung hđeh ti knông lăn čar Daklak hlăk dôk čung ba hđeh nao sang hră mơar, găn klei dleh dlan, čiăng kơ mgi dih dưi lŏ wĭt đru kơ ƀuôn sang, lehanăn lăn čar pô./.