Hlăm sang amĭ Việt Nam jhŏng ktang Võ Thị Đủ (97 thŭn), ti ƀuôn hgŭm Đông Sơn, čar Quảng Ngãi, bi dia klei tlao mơak. Grăp hrue, mâo phung knuă druh, lĭng kahan mơ̆ng knơ̆ng bruă lĭng kahan čar Quảng Ngãi, Êpul kiă kriê kahan ƀuôn hgŭm, êpul kahan ƀuôn lehanăn êpul êdam êra alŭ wăl nao bi čuă êmuh, mđĭ ai, đru kơ amĭ  Võ Thị Đủ piăt êmiêt pưk sang. Ung lehanăn dua čô anak nao hlăm klei bi blah, lehanăn djiê êngiă hlăm kdrăn mblah kyua lăn čar. Leh lăn čar mâo klei êđăp ênang, amĭ Võ Thị Đủ mâo nanao klei đru ba, klei dlăng kriê mơ̆ng phung knuă druh, lĭng kahan hlăm ƀuôn sang.

“Ară anei amĭ leh mduôn, amâo lŏ êbat hiu ôh. Kyua mâo klei đru ba mơ̆ng ƀĭng kahan, čiăng kơ sang amĭ doh mngač, hlăm yan bhang, amâo mâo hjan sač hlăm yan hjan. Dôk đih mâo klei mĭn snei sdih. Hrue anei mâo ayŏng adei hriê čuă, đru klei anei, mnơ̆ng adih, duh mĭn brei kơ pô snăn kâo lač jăk, lehanăn mâo klei mơak snăk”.

Ti čar Quảng Ngãi, mâo êbeh 6.800 čô amĭ mâo mđup brei anăn knăl, Amĭ Việt Nam jhŏng ktang, ară anei adôk 106 čô amĭ dôk hdĭp. Hlăm anăn, Knơ̆ng bruă kahan čar Quảng Ngãi tŭ mă rông ba truh 21 čô amĭ. Dŭm thŭn leh êgao, knuă druh, lĭng kahan čar Quảng Ngãi mâo nanao klei dlăng kriê phung amĭ Việt Nam jhŏng ktang, mnuih mâo bruă tŭ dưn hŏng cách mạng, phung knŭk kna dlăng ba. Lê Văn Công, K’iăng khua kiă kriê, Êpul khua kiă kriê kahan ƀuôn hgŭm Đông Sơn, čar Quảng Ngãi brei thâo:

“Kâo ƀuh mơ̆ng bruă anei jing yuôm bhăn snăk, đru leh kơ phung mda asei thâo săng hĭn kơ klei tŭ dưn, klei săn asei mlei luič liê  mơ̆ng phung Amĭ lehanăn jih jang phung djiê êngiă hlăm klei bi blah kyua lăn čar. Mơ̆ng jih jang bruă ngă anăn, čiăng kơ phung mda asei lŏ thâo hdơr knga, lehanăn đru bi mtă hdơ̆ng găp mâo bruă ngă yuôm bhăn bi leh bruă klam hĭn”.

Dŭm êpul êya lĭng kahan čar Quảng Ngãi hlăk bi mguôp hŏng dŭm êpul bruă djŏ tuôm ruh mgiah bi pral, hlue ngă djăp ênŭm dŭm hdră êlan mơ̆ng gưl dlông, mơ̆ng čar hŏng phung knŭk kna dlăng ba. Bruă tui duah, kuai ba wĭt klang kleh phung djiê êngiă hlăm lu thŭn êgao mâo leh mơh êpul bruă Đảng anôk bruă kiă kriê kahan čar mđing uêñ. Mơ̆ng akŏ thŭn truh kơ ară anei, Êpul kiă kriê bruă đru ba mơ̆ng phŭn bruă lĭng kahan čar Quảng Ngãi mâo tŭ mă lehanăn bi mklă, akâo klei đru kơ 24 čô kahan êka êkeh mơ̆ng ênuk mblah ngă, ktrâo atăt bi klă hlăm bruă ngă hră mơar, lehanăn tŭ yap phung djiê êngiă săn asei mlei.

Mbĭt hŏng anăn, Knơ̆ng kiă kriê kahan čar Quảng Ngãi bi mguôp leh hŏng dŭm phŭn dhar bruă lehanăn alŭ wăl djŏ tuôm bi mklă klei thâo, mnơ̆ng mâo mơ̆ng phung djiê êngiă dưi ba wĭt kơ găp djuê digơ̆. Êpul bruă mao leh truh 20 hră mơar lehanăn mnơ̆ng mnuă ba wĭt kơ găp djuê.

Hŏng ai tiê thâo hdơr knga tla ai hŏng aê ama pô nao leh êlâo, dŭm hrue anei, knuă druh, lĭng kahan čar Quảng Ngãi mkŏ mjing lu bruă ngă duh mĭn dlăng kriê dŭm gŏ sang kahan êka êkeh, phung djiê êngiă, mkŏ mjing klei nao čuă, mkă dlăng klei ruă, mbha êa drao amâo mâo mă prăk ôh kơ dŭm gŏ sang knŭk kna dlăng ba, mnuih mâo bruă tŭ dưn hlăm čar. Đại tá Võ Tấn Tài, bruă Đảng knơ̆ng bruă kahan čar  Quảng Ngãi lač:

Ngă bruă hdră êlan, klei hdơr knga tla ai mâo leh êpul bruă Đảng čar mđing uêñ. Hlăm wưng leh êgao, mâo rŭ mdơ̆ng leh sang ƀi đru, sang hdơr knga tla ai, lehanăn mđing hŏng phung ară anei ăt dôk hlăm sang tĭ rưč, hlăm anăn mâo dŭm gŏ sang dôk duh mĭn kơ phung leh djiê êngiă, mâo dŭm êpul êya bruă nao bi čuă êmuh, mđĭ ai digơ̆”./.