Giăm 1.000 čô mnuih hlăm alŭ wăl nah ngŏ Gia Lai mâo leh klei hrŏng ruah mkă dlăng mdrao mgŭn kboh amâo mâo liê prăk ôh, mâo Êpul hgŭm đru ba mnuih ruă ƀun ƀin čar bi mguôp leh hŏng sang êa drao prŏng Huế lehanăn dŭm êpul bruă djŏ tuôm. Leh klei mkă dlăng, phung aê mdrao hmao ƀuh mâo 39 čô mnuih ruă năng bliah mdrao mtam klei ruă kboh, hlăm anăn mâo truh 16 čô hđeh dưi đru bliah mdrao amâo mâo prăk ôh.

Êngao kơ bruă mkă dlăng lehanăn čoh cuăn klei bliah mdrao, phung aê mdrao lŏ kčĕ đru ktrâo atăt hdră dlăng kriê klei suaih pral, kñăm đru kơ phung hđeh hơĭt ai tiê leh bliah mdrao. Bruă anei mâo ngă leh hlăm lu thŭn êgao, ba hriê leh klei găl pral dưi thâo ƀuh mnuih mâo klei ruă čiăng dưi bliah mdrao mtam kơ dŭm êbâo čô mnuih ruă ti čar Gia Lai, đru bi hrŏ ênoh mnuih djiê kyua klei ruă kboh, lehanăn ba wĭt klei hdĭp mơak mñai kơ hđeh dôk hlăm klei dleh dlan./.