Dŭm gưl dhar bruă ti čar Gia Lai dôk mđĭ bruă hâo hưn kơ hdră êlan ênua bruă mdrao mgŭn, gĭr truh ti knhal jih thŭn 2023 hnơ̆ng luôm ênua bruă mdrao mgŭn mâo hlăm brô 90% ênoh mnuih ƀuôn sang. Hluê si ênua bruă mdrao mgŭn čar Gia Lai, yap truh mlan 7/2023, kluôm čar mâo hlăm brô 1 êklăk 290 êbâo čô (90% ênoh mnuih ƀuôn sang) mâo ênua bruă mdrao mgŭn, đĭ êbeh 5% mkă hŏng wưng anei thŭn dih. Hlăm anăn, hnơ̆ng mnuih ƀuôn sang jing mnuih djuê ƀiă nao hgŭm mâo êbeh 75%.

Čiăng lŏ mđĭ hnơ̆ng mnuih ƀuôn sang dưi răng mgang klei suaih pral, Êpul gơ̆ng bruă ƀuôn sang čar Gia Lai mâo leh hdră mtrŭn mrô 48 kơ hnơ̆ng đru tla prăk ênua bruă mdrao mgŭn ti alŭ wăl čar wưng thŭn 2023 – 2025. Hluê anăn, mơ̆ng akŏ thŭn truh kơ ară anei, čar Gia Lai mâo êbeh 170 êbâo čô leh anăn hđeh sang hră mnuih djuê ƀiă dưi đru tla prăk ênua bruă mdrao mgŭn. Mbĭt anăn dŭm gưl, dhar bruă mđĭ hĭn bruă hâo hưn truh kơ dŭm krĭng taih kbưi, krĭng mnuih djuê ƀiă čiăng kơ mnuih ƀuôn sang thâo săng klă hĭn kơ boh tŭ dưn êjai mâo ênua bruă mdrao mgŭn.