Hluê si hdră kčah, čiăng kriê dlăng 10.000 ha dliê ti să Ia Mơr, kdriêk Čư̆ Prông, Êpul kriê dlăng dliê kŏ êa Ia Mơr čiăng mâo 17 čô. Ƀiădah, hlăm lu thŭn êgao, jih anôk bruă knŏng mâo mă 12 čô. Mă bruă wăt kơ hruê leh anăn mlan ti alŭ wăl mâo lu klei ngă soh hŏng klei bhiăn dliê kmrơ̆ng mơ̆ng čar, ƀiădah prăk mlan kơ phung knuă duh, mnuih mă bruă tinei knŏng mâo mă mơ̆ng 5-7 êklăk prăk.  Đinh Văn Khẩn, khua êpul kriê dlăng dliê kŏ êa Ia mơr, jing sa hlăm 5 čô hlăm êpul ngă hră akâo mdei bruă hlăm thŭn 2022, ƀiădah ka dưi mgaih msir brei thâo: “Bruă răng mgang dliê ară anei dleh êdi, Ti anôk bruă êpul kriê dlăng dliê Ia Mơr lŏ dleh hĭn mơh, giăm knơ̆ng kdơ̆ng êa Ia Mơr. Mâo 3 bĭt êlan phŭn ktuê hlăm dliê, bi kơ mnuih ƀuôn sang ƀuh sơnăn čiăng mâo lăn ngă hma. 2 čô mdei leh. Tơdah lŏ dei mơh amâo mâo mnuih mă bruă ôh”.

Suăi êmăn, prăk mlan ƀiă, phung ngă bruă răng mgang dliê lo tuôm hŏng lu klei arưp aram. Đinh Mạnh Phong, khua Êpul kriê dlăng dliê akŏ êa Čư̆ Sê brei thâo, ară anei, kah knar sa čô mâo bruă klam răng mgang 1 wăl dliê, knar hŏng 1.000ha. Čư̆ dliê kbưi hŏng anôk mnuih ƀuôn sang dôk, êlan klông dleh. Phung tlĕ mă kyâo lŏ wĭt ngă tơdah hmao ƀuh diñu, ƀiădah êpul răng mgang dliê kreh lĕ hlăm klei awăt: “Mâo phung ayŏng adei phung tlĕ kyâo čăm biêng, hmăi truh kơ ai tiê mă bruă. Klei dưi mơ̆ng dŭm êpul kriê dlăng dliê jing ƀiă êdi, knŏng ƀuh leh anăn hưn đuč. Msĕ si anôk bruă hmei, hluê si klei bhiăn, kdrăp čŭt hơô, mnơ̆ng yua mă ti anôk bruă, ƀiădah prăk hrui wĭt ƀiă êdi, knŏng duah čhĭt sơnăn yơh”.

Ti čar Gia Lai ară anei mâo 22 êpul kriê dlăng dliê, hŏng giăm 500 čô knuă druh, phung mă bruă, mkă hŏng ênoh čuăn dôk kƀah 200 čô. Mnuih ngă bruă kƀah, ƀiădah hlăm 2 thŭn êgao, mâo êbeh 20 klă klơ̆ng mdei bruă, dŭm pluh čô mkăn mâo klei čiăng msĕ.

Nguyễn Văn Hoan- k’iăng khua kiă kriê knơ̆ng bruă lŏ hma leh anăn mđĭ kyar krĭng ƀuôn sang čar Gia Lai brei thâo, Dhar bruă mâo leh lu hdră êlan kñăm krơ̆ng phung ngă bruă răng mgang dliê, ƀiădah lu hĭn knŏng mđĭ ai leh anăn boh sĭt: “Ti anăp, hmei mđĭ ai phung mă bruă khăp kơ bruă, gĭr hŏng bruă čiăng rơ̆ng kơ bruă kriê dlăng, răng mgang dliê, mbĭt anăn mkŏ mjing klei găl čiăng mlih phung mă bruă ti anôk kbưi mă bruă giăm hĭn čiăng bi hrŏ ƀiă mmông nao kbưi, mkŏ mjing klei găl čiăng kơ ayŏng anei mâo hdră đru mrâo čiăng kơ diñu mâo klei hơĭt mă bruă knuă.

Ară anei, knơ̆ng bruă lŏ hma leh anăn mđĭ kyar krĭng ƀuôn sang čar Gia Lai lŏ dơ̆ng đru kčĕ hŏng bruă sang čư̆ êa čar hưn mdah hŏng gưl dlông ksiêm dlăng, mkra mlih hdră đru, bi hơĭt wăl mă bruă hŏng phung răng mgang dliê.