Bruă mkŏ mkra dưi bi kluôm ƀrư̆ ƀrư̆ đru kơ krĭng mnuih ƀuôn sang mnuih djuê ƀiă mâo thiăm klei mlih jăk leh anăn mkŏ mjing klei găl kơ mnuih ƀuôn sang mđĭ kyar bruă duh mkra, mđĭ hnư hrui wĭt, bi hơĭt klei hdĭp.

Ktuê êlan krĭng ƀuôn sang ti alŭ Sóc Bưng, să Thạnh Phú, kdriêk Mỹ Xuyên dưi rŭ mdơ̆ng hŏng bê tông hŏng boh dlông giăm 500m, prŏng 3 m, ba yua mơ̆ng knhal jih thŭn 2022 mjing leh klei găl kơ dŭm êtuh čô mnuih Khmer găn êrô găl ênưih. Lý Văn Nâu, ti alŭ Sóc Bưng hơ̆k mơak lač:

Hlăk ka dưi mkra ôh êlan anei snăn mnuih ƀuôn sang găn êrô dleh dlan, êlan čhŏ, kdlŭt amâo dưi găn ôh, bruă čhĭ mnia amâo dưi mâo. Ară anei mâo êlan leh, phung mnia blei nao truh ti hma čiăng mnia blei, anak čô nao sang hră ênưih, mnuih ƀuôn sang hmei bi mni kơ Đảng, Knŭk kna mkŏ mjing leh êlan anei.

Amâo djŏ knŏng duh bi liê êlan krĭng ƀuôn sang, thŭn dih, sang mnia să Thạnh Phú dưi mkŏ mjing mrâo hŏng bi liê êbeh 1 êklai prăk čiăng bi hrô kơ sang mnia hđăp jhat leh, đru kơ mnuih ƀuôn sang mnia blei leh anăn mnuih ƀuôn sang chĭ mnia găl ênưih leh anăn mơak mñai hĭn. Phú Việt Bền, K’iăng Khua Knơ̆ng bruă sang čư̆ êa să Thạnh Phú hâo hưn, să mâo êbeh 57% ênoh mnuih ƀuôn sang jing mnuih djuê ƀiă Khmer, kyua dưi bi liê anôk bruă nah gŭ mơ̆ng klei bi leh, klei hdĭp mnuih ƀuôn sang mâo lu klei bi mlih.

Mnuih ƀuôn sang ti să dưi dưn hdră anei jing lu snăk. Snăn hŏng alŭ wăl ăt hâo hưn mtô mblang mnuih ƀuôn sang gĭr mđĭ lar klei tŭ dưn, gĭr răng krie hdră dưi yua sui thŭn. Hlăm wưng kơ anăp hŏng alŭ wăl ăt čiăng mâo klei mđing dlăng lŏ dơ̆ng bi liê mơ̆ng hdră, knŭk kna ăt đru kơ mnuih ƀuôn sang hlăm bruă mkra mjing, mnia blei ăt msĕ mơh mđĭ klei hdĭp mda, ai tiê mnuih ƀuôn sang jăk hĭn.

Knhal jih thŭn dih, êbeh 200 gŏ êsei mnuih ƀuôn sang ti să Liêu Tú, kdriêk Trần Đề mơak tơdah hdră bruă kban Tà Ốc hŏng boh dlông 20 m, prŏng 3,4m mâo ênoh bi liê êbeh 1 êklai 3 êtuh êklăk prăk dưi ba yua. Tăng Rô Qui Sa, sa čô mnuih ƀuôn sang alŭ wăl kah mbha, êlâo dih, kban hđăp knŏng mâo hnơ̆ng mgăn 1 m kyua mnuih ƀuôn sang čŏng rŭ mdơ̆ng, kyua điêt đei anăn phung hđeh nao sang hră hlăm yan hjan lu blư̆ mâo klei truh, mnuih ƀuôn sang dŭ mdiăng kdrăp mnơ̆ng lŏ hma dleh dlan. Mơ̆ng leh bi leh kban Ta Ốc, mnuih ƀuôn sang mâo lu klei găl čiăng mđĭ kyar bruă duh mkra:

Leh knŭk kna bi liê mkra mjing kban 3 m anei snăn mnuih ƀuôn sang tinei ăt mơak mơh kyua găl ênưih kơ mnuih ƀuôn sang ăt msĕ mơh anak cô nao sang hră. Hlăm brô êbeh 200 gŏ êsei mnuih ƀuôn sang khăng êrô ti kban anei anăn mnuih ƀuôn sang mơak snăk.

 Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă jing hdră êlan djŏ klă mơ̆ng Đảng, Knŭk kna. Hdră bi kƀĭn 119 hdră êlan hŏng 10 hdră bruă, 14 hdră bruă điêt, 36 mta phŭn hdră êlan, hlăm anăn mâo lu hdră êlan kƀĭn bi liê kơ anôk bruă nah gŭ pioh mkra mjing leh anăn klei hdĭp krĭng mnuih djuê ƀiă.

Trần Khắc Trung, K’iăng Khua Knơ̆ng bruă djuê ana čar Sóc Trăng brei thâo, čar mâo êbeh 35% jing mnuih djuê ƀiă, hlăm anăn, êbeh 30% djuê ana Khmer. Hdră đru grăp knhuang bi leh anôk bruă nah gŭ krĭng ƀuôn sang, mjing klei găl kơ mnuih ƀuôn sang djuê ƀiă ti alŭ wăl đĭ kyar, mkra mjing, mđĭ klei hdĭp mda ai tiê mnơ̆ng dhơ̆ng kơ mnuih ƀuôn sang krĭng mnuih djuê ƀiă hlăm anăn mâo krĭng mnuih Khmer.

Mơ̆ng thŭn 2021- 2023, ênoh prăk bi liê kơ anôk bruă nah gŭ dưi mbha kơ čar êbeh 267 êklai prăk, hlăm anăn prăk knŭk kna gưl dlông êbeh 236 êklai prăk. Yap truh ară anei, čar pŏk ngă klei duh bi liê mrâo 113 hdră bruă, êlan klông krĭng ƀuôn sang, anôk bruă nah gŭ wăl sang mnia, sang kƀĭn ƀuôn êpul êya…. Mkra mđĭ êbeh 50 hdră bruă nah gŭ krĭng mnuih djuê ƀiă dleh dlan êdi. Trần Khắc Trung, lŏ brei thâo:

Rơ̆ng ba yua tŭ dưn prăk bi liê kơ anôk bruă nah gŭ snăn čar srăng lŏ dơ̆ng kƀĭn bi liê hlue hdră, hdră kčah bi liê wưng man dưn 2021-2025 kčah, boh nik bruă mđĭ lar leh anăn mđĭ klei tŭ dưn bruă bi mguôp dŭm phŭn prăk mơ̆ng hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă hŏng dŭm hdră kñăm ala čar mkŏ mkra krĭng ƀuôn sang mrâo, bi hrŏ ƀun kjăp. Dŭm   hdră êlan djŏ tuôm kơ klei pŏk ngă ti čar, boh nik bruă iêô mkrum klei tŭ dưn mơ̆ng ala ƀuôn.

Čar Sóc Trăng kčah hdră kñăm truh thŭn 2025, klă klơ̆ng bi leh hdră mkŏ mjing bruă nah gŭ kơ klei duh mkra- ala ƀuôn krĭng mnuih djuê ƀiă kñăm ngă djŏ klei čiăng mđĭ kyar bruă duh mkra ala ƀuôn, mđĭ klei hdĭp mda mnuih ƀuôn sang hlăm anăn mâo mnuih Khmer./.