Adei Trần Quốc Thịnh lehanăn Trần Hoàng Duy, dôk ti ƀuôn Nhì, să Mỹ Long Nam, kdriêk Cầu Ngang, čar Trà Vinh êrĭt ama mơ̆ng điêt. Amĭ dua ayŏng adei diñu dôk rông ba diñu bhiâo kbưi hŏng ƀuôn sang, lehanăn lŏ dôk ung mrâo mn dah duah anôk jưh knang, ƀiădah hlăm klei hdĭp mrâo, lŏ dơ̆ng lĕ hlăm klei dleh dlan, hlŏng phưi tha dua čô anak hŏng aduôn digơ̆ mduôn leh. Tlâo aduôn čô hdĭp hlăp klei klŭt aguah kƀah tlam, mmông trei mmông hơăi, lehanăn kăn dưi mâo ai tiê truh kơ sang hră mơar rei. Ƀri mơh mâo hĕ klei myun kơ dua čô ayŏng adei, thŭn 2019 mâo kahan răng mgang knông lăn čar Trà Vinh mâo ngă leh hdră bi hmô jing “Anak rông mơ̆ng kahan răng mgang knông lăn” snăn drông digơ̆ ba rông hlăm kđông kahan răng mgang knông lăn Mỹ Long lehanăn mâo klei sa ai mơ̆ng anôk bruă sang čư̆ êa nah gŭ.

Trung úy Nguyễn Quốc Việt, lĭng kahan mâo jao bruă dlăhg kriê, mjuăt bi hriăm hră mơar kơ dua čô adei, leh mâo kahan iêo rông ba, klei hdĭp digơ̆ mâo klei bi mlih kluôm dhuôm. Knŏng hlăm brô sa thŭn đuič, dơ̆ng mơ̆ng sa čô hđeh hriăm hră awăt, ară anei jing leh sa čô hđeh hriă mthâo, mâo klei suaih pral, awan dhuan đĭ prŏng jăk hĭn mơh:

“Dlăng kơ asei mlei phung hđeh leh mâo hdĭp hŏng kahan lĭng, digơ̆ thâo hgưt asăp, kreh kriăng blŭ tlao nao hriê mâo klei bhiăn, thâo mpŭ kơ mnuih prŏng... Kơ mmông snăn 5h aguah kgŭ leh, wăt amuôn Duy msĕ mơh. Gơ̆ čang hmăng mgi dih êdei anăp jing sa čô lĭng kahan, hmei gĭr jih ai tiê đru digơ̆, kiă kriê rông ba bi djăp ênŭm hlăm klei hdĭp, êjai dôk mbĭt hŏng kahan lĭng”.

Adei Trần Hoàng Duy thŭn anei dôk hriăm adŭ 6, srăng dôk hdĭp mbĭt hŏng kahan răng mgang knông lăn truh kơ gơ̆ hriăm jih adŭ 9 msĕ si ayŏng gơ̆ anăn. Gơ̆ yăl dliê, dôk hdĭp hlăm kahan, klei huă ƀơ̆ng, hriăm mjuăt, pĭt đih djŏ mmông, mâo    hdĭp hŏng kahan răng mgang knông lăn, klei huă ƀơ̆ng, hriăm mjuăt, mdei msăn, mâo phung kahan mtô bi hriăm jăk, snăn boh tŭ dưn đĭ kyar hĭn leh hlăm klei hdĭp. Hmăng hmưi mgi dih dưi jing knuă druh kahan răng mgang knông lăn mơh:

  “Tinei 5h aguah kgŭ mprăp yơh kơ klei nao sang hră mơar, grăp aguah lĭng kahan brei 15.000đ, bi hriăm tlam lŏ brei 10.000đ. Tlam huă êsei, hlăp mjuăt asei mlei hŏng lĭng kahan. Kâo gĭr hriăm hră mơar bi thâo, čiăng kơ mgi dih mâo klei thâo dưi mŭt kahan, pioh ngă bruă hlăm kahan lĭng”.

Bi adei Trần Quốc Thịnh, thŭn dih leh ruĕ hriăm gưl 2, lŏ wĭt hdĭp hŏng găp djuê, mâo hdră “Atăt adei nao sang hră” dưi đru hŏng ênoh 500.000 prăk/mlan. Êngao kơ anăn, čiăng mjing klei jăk hĭn kơ phung hđeh lŏ wĭt hdĭp hŏng găp djuê, phung knuă druh, lĭng kahan mơ̆ng kđông răng mgang knông lăn Mỹ Long lŏ mtrŭt mjhar mđĭ ai, mâo klei iêo mkrum ngă hră mkiêt mkriêm mâo truh 27 êklăk prăk pioh mđup brei kơ phung hđeh, mbĭt hŏng lu hdruôm hră hriăm. Trung tá Phan Thanh Sang, Pô ngă bruă kđi čar hlăm kđông kahan răng mgang knông lăn Mỹ Long lač, leh jih wưng ngă anak rông mơ̆ng kahan răng mgang knông lăn, phung hđeh mâo dưn hdră êlan “Đru atăt adei nao sang hră” čiăng lŏ mâo klei đru kơ digơ̆ hriăm hră mơar, mâo mbĭt hŏng hră mkiêt mkriêm. Kyuanăn, hmei gĭr jih ai tiê, bi mđĭ ai hdơ̆ng găp, mđrăm mbĭt đru hŏng klei dưi pô:

“Kđông ngă hdră anei mơ̆ng thŭn 2019. Knŏng rông 02 čô amuôn snăn lŏiêo mthưr phung mâo ai tiê thâo pap, phung lĭng kahan mơ̆ng êpul êya mkăn. Tal 3, jing mă mơ̆ng keh duh mkra pla mjing rông mnơ̆ng hlăm lĭng kahan kñăm bi mâo djăp klei dưi đru rông ba phung hđeh hŏng jih hnơ̆ng”.

Mbĭt hŏng klei bi hmô “Anak rông kahan răng mgang knông lăn”, phung knuă druh, lĭng kahan hlăm kđông răng mgang knông lăn Mỹ Long, čar Trà Vinh lŏ đru dlăng ba truh 10 čô hđeh hriăm hră dôk hlăm klei hdĭp dleh dlan ti alŭ wăl, hlue hŏng hdră “Đru adei nao sang hră mơar”. Mơ̆ng anăn, grăp čô hđeh mâo đru 500.000 prăk hlăm sa mlan pioh bi liê kơklei hriăm hră mơar tơl truh jih adŭ 12. Mơ̆ng hdră anei, mâo đru leh kơ phung hđeh mơ̆ng sa čô hđeh hriăm hră adôk awăt, dưi jing leh hđeh hriăm hră thâo lehanăn kdlưn hĭn.

Mơ̆ng thŭn 2016 truh kơ ară anei, kahan răng mgang knông lăn čar Trà Vinh mâo đru dlăng ba nanao hŏng ênoh truh 34 čô hđeh hriăm hră dôk hlăm klei dleh dlan, hŏng ênoh prăk jih jang truh êbeh 1,4 êklai prăk. Êpul prăk anei mơ̆ng dŭm êpul êya bi mguôp, hlăm anăn mâo phung knuă druh lĭng kahan hlăm êpul bruă kahan răng mgang knông lăn, lehanăn mơ̆ng keh duh mkra pô. Mơ̆ng klei bi hmô anei, jih jang dŭm boh kđông răng mgang knông lăn hlăm kluôm ala mâo đru leh, bi hriăm mbŏ dŭm êtuh čô hđeh hriăm hră dôk hlăm klei dleh dlan, ti krĭng knông lăn mâo klei hmăng hmưi dưi hriăm hră mơar, čiăng kơ mgi dih dưi jing mnuih tŭ dưn./.