leh 3 mlan mdei prŏng, mprăp dơ̆ng mŭt kơ thŭn hriăm mrâo 2023-2024, amuôn Y Dũng, djuê ana M’Nông, ti bon Sar Pa, să Thuận An, kdriêk Dak Mil lŏ djă ba hdruôm hră mơar, mnơ̆ng mnuă hriăm hră lehanăn čhum ao nao dôk hlăm kđông răng mgang knông lăn ti ƀăng jang knông lăn Thuận An. Amyuôn Y Dũng jing anak rông kơ kahan răng mgang knông lăn mâo leh 4 thŭn tinăn kahan răng mgang knông lăn đru rông ba mtô bi hriăm gơ̆. Mprăp kơ thŭn hriăm mrâo, Dũng mâo leh knuă druh kahan răng mgang knông lăn ƀăng jang knông lăn Thuận An lŏ bi hriăm mbŏ klei hriăm adŭ 5, lehanăn mprăp klei hriăm mrâo kơ adŭ 6. Mâo klei đru jih ai tiê mơ̆ng kahan răng mgang knông lăn snăn mơ̆ng sa čô hđeh hriăm mil mkrah dưh, ară anei Dũng hriăm hră mơar tŭ dưn leh jing nanao hđeh hriăm hră tŭ kdlưn hlăm 4 thŭn êgao:

 “Yap truh kơ ară anei, kâo mâo leh amiêt kahan răng mgang knông lăn đru rông ba truh 4 thŭn leh. Hlăm 4 thŭn êgao duh mĭn djăp ênŭm êsei huă, djam ƀơ̆ng anôk pĭt đih, lehanăn mjuăt bi hriăm hlăm grăp hruê, čiăng jing mnuih tŭ dưn. Kâo srăng gĭrr hriăm hră mơar bi thâo čiăng bi năng hŏng ai tiê di amiêt mtô mjuăt leh”.

Ăt mâo klei đĭ lkyar jăk mơh leh mâo kahan răng mgang knông lăn rông ba, amuôn Nông Tiến Mạnh, hđeh hriăm adŭ 4A, sang hră gưl sa Nguyễn Du, să Dak Wil, kdriêk Čư̆ Jŭt, čar Dak Nông, lač:        

 “Gŏ sang kâo dôk hlăm klei dleh dlan, ama mâo klei dju djuăm duam ruă, amâo mâo dưi mă bruă ktrŏ ôh, jih jang djăp mta bruă lĕ ti mra amĭ sơăi. Leh mâo kahan iêo rông ba dôk hlăm kđông Nậm Na amĭ ama mơak mơh kyua mâo mnuih đru dlăng ba brei kơ anak hriăm hră mơar, mdul kơ găp djuê. Ti kđông kahan răng mgang knông lăn, mâo di amiêt, di mneh anăn yơh jing sang tal 2. Hlăk mrâo nao dôk bŏ hŏng klei huĭ, kăn jhŏng blŭ tlao rei, hriăm hră mơar ka thâo mơh. Ƀiădah leh mâo klei rông ba, mtô bi hriăm jăk, đru mđĭ ai snăn kâo dơ̆ng jhŏng, lehanăn mâo klei thâo gĭr dơ̆ng jhŏng hŏng arăng, mơak mñai, lehanăn hriăm hră mơar dơ̆ng tŭ jing mơh”.

 Điểu Plơu, K’iăng khua knơ̆ng bruă sang čư̆ êa să knông lăn Quảng Trực, kdriêk Tuy Đức, čar Dak Nông lač, mơ̆ng hdră “anak rông kơ kahan răng mgang knông lăn”, “đru adei nao sang hră mơar” mơ̆ng kahan răng mgang knông lăn mâo đru leh jăk êdi hŏng phung hđeh dôk halwm klei hdĭp dleh dlan hlăm bruă mjuăt bi hriăm ti dŭm să knông lăn, krĭng taih kbưi:

 “Să Quảng Trực jing sa boh să knông lăn taih kbưi, krĭng mnuih djuê ƀiă. Knơ̆ng bruă kahan răng mgang knông lăn mâo leh klei mđing, đru ba kơ alŭ wăl jăk snăk, boh nik hŏng phung hđeh mâo nao sang hră mơar êjai digơ̆ jing anak aneh gŏ sang dleh dlan, knap mñai, đa đa êrĭt êrin, mâo kahan răng mgang knông lăn bi mguôp hŏng bruă sang čư̆ êa ngă bruă anei. Snăn bruă sang čư̆ êa bŏ hŏng klei mơak mơh”.

Hŏng hdră êlan “mđup brei boh hră, ba klei čang hmăng” thŭn 2016, knơ̆ng bruă kahan răng mgang knông lăn čar Daknông mâo ngă leh hdră “Đru adei nao sang hră”. Thŭn 2019, kahan răng mgang knông lăn Dak Nông lŏ dơ̆ng ngă hdră “Anak rông kahan răng mgang knông lăn”. Truh thŭn hriăm 2022-2023, kdông kahan lŏ ngă dŭm hdră “Knuă druh, lĭng kahan atăt adei nao sang hră”.

Đại tá Bùi Đức Chính, k’iăng khua bruă kđi čar kahan răng mgang knông lăn čar Dak Nông brei thâo, truh kơ ară anei, mâo leh 222 čô hđeh hriăm hră ti 7 boh să knông lăn čar Dak Nông lehanăn 12 čô hđeh mơ̆ng čar Mondulkiri (ala mtao Campuchia) mâo leh kahan răng mgang knông lăn Dak Nông đru hlăm klei nao sang hră mơar. Ênoh bi liê kơ jih bruă đru phung hđeh dôk hlăm klei dleh dlan giăm 4,5 êklai prăk, mơ̆ng klei jih jang knuă druh, lĭng kahan răng mgang knông lăn Dak Nông bi mkrum. Mâo klei đru mơ̆ng knuă druh lĭng kahan, phung hđeh mâo leh klei gĭr amâo mâo mdei čiăng dưi găn jih klei dleh dlan, klei kƀah wư, kơ mnơ̆ng dhơ̆ng lehanăn ai tiê, tơl dưi jing leh phung hđeh hriăm hră thâo. Lu phung hđeh dơ̆ng mơ̆ng hđeh hriăm hră ti hnơ̆ng man dưn jing leh hđeh hriăm thâo kdlưn hĭn.

 “Hdră atăt adei nao sang hră mơar - anak rông kahan răn mgang knông lăn” lehanăn bruă knuă druh lĭng kahan đru atăưt adei nao sang hră bi êdah leh ai tiê klei khăp prŏng plah wah kahan răng mgang knông lăn hŏng mnuih ƀuôn sang djăp djuê ana. Lehanăn, mơ̆ng bruă anei lŏ mđĭ ai leh phung knuă druh lĭng kahan amâo mâo mđĭ hĭn klei thâo săng pô kñăm mâo anao klei thâo bi mguôp hŏng mnuih ƀuôn sang djăp djuê ana ti knông lăn, đru lŏ bi êdah knhuah gru jăk siam mơ̆ng lĭng kahan awa Hô, jing lĭng kahan kă grat mtah hlăm ênuk mlih mrâo”.

 Leh 7 thŭn êgao, dŭm hdră “Atăt adei nao sang hră”, “Anak rông kahan răng mgang knông lăn” mơ̆ng knuă druh lĭng kahan răng mgang knông lăn mâo đru leh lu phung hđeh hlăm krĭng knông lăn čar Daknông mâo klei găl hĭn hriăm hră mơar, lehanăn kpưn đĭ hlăm klei hdĭp. Klei jăk siam mơ̆ng knhuah lĭng kahan ka grat mtah knư̆ hĭn mơh lŏ jing yuôm bhăn hlăm krĭng knông lăn dleh dlan anei./.