Hlăm klei nao čuă ala čar Dhŭng Korea, tlam mbruê 4/12, leh truh ti ƀuôn prŏng phŭn Seoul, Khua lăn čar Nguyễn Xuân Phúc mâo leh klei bi tuôm hŏng dŭm êpul êya bi hgŭm, bi mguôp bruă duh mkra, dhar kreh, mjĕ êrô mnuih ƀuôn sang Dhŭng Korea – Việt Nam mâo lu klei đru mguôp yuôm bhăn kơ bruă mtrŭt mđĭ klei mjĕ giăm 2 ala čar. Lŏ dơ̆ng klei kƀĭn trông bi hgŭm Dhŭng Korea – Việt Nam (KOVIFA), mơ̆ng Kim Joon, khua gĭt gai êpul ba anăp, Khua lăn čar Nguyễn Xuân Phúc mñă klă, 30 thŭn êgao jing amâo mâo sui ôh ƀiădah klei mjĕ giăm 2 ala čar dưi mâo lu boh tŭ kluôm ênŭm, jing ƀĭng hgŭm yuôm bhăn hdơ̆ng pô, jing klei bi hmô hlăm klei mjĕ giăm tar rŏng lăn, hnơ̆ng klei bi mguôp hlăm dŭm mta msĕ si bruă duh bi liê, mnia mblei, hiu čhưn ênguê, mă bruă knuă.

Khua lăn čar hmăng hmưi leh anăn đăo knang êpul srăng lŏ ba anăp, bi lar bruă klam kmeh gơ̆ng kơ klei mjĕ êrô mnuih ƀuôn sang, mtrŭt mđĭ klei bi mguôp lu mta bruă, mtrŭt mjhar dŭm knơ̆ng bruă Dhŭng Korea mđĭ hĭn klei bi mguôp, duh bi liê, mnia mblei hŏng Việt Nam, bi mguôp đru kơ 20 êbâo čô mnuih Việt Nam dôk ti Dhŭng Korea, boh nik jing dŭm gŏ sang mâo mniê mnuih Việt Nam dôk ung Dhŭng Korea.