Bi klă hlăm mmông mă bruă, Khua lăn čar Võ Văn Thưởng mnă ktang: Bruă mgaih msir hră mơar klei bi kmhal hŏng klei djiê leh anăn hluê ngă klei bi kmhal bi mdjiê jing boh klei yuôm bhăn djŏ tuôm hŏng klei hdĭp anak mnuih, čiăng mâo klei ksiêm dlăng, mgaih msir leh anăn mkŏ mjing hluê ngă hŏng ai tiê bruă klam ktang, mâo klei răng, bi mguôp kjăp, rơ̆ng kơ klei čuăn mpŭ kơ hdră bhiăn leh anăn klei bhiăn ala čar, rơ̆ng kơ klei dưi êngiê anak mnuih mơ̆ng pô tŭ klei bi kmhal hŏng klei djiê djŏ hŏng hdră bhiăn.

Khua lăn čar Võ Văn Thưởng mtă, hlăm wưng kơ anăp, dŭm anôk bruă lŏ dơ̆ng hluê ngă ênŭm, djŏ hŏng hdră bhiăn dŭm bruă klam, klei dưi pô hluê si klei čuăn hlăm klei bhiăn ala čar, bi klă bruă klam mơ̆ng grăp anôk bruă, mđĭ hĭn klei bi mguôp, ngă bruă ksiêm dlăng, ktuê dlăng jêñ jêñ, hluê ngă mâo boh tŭ dưn, rơ̆ng klei tŭ dưn mơ̆ng klei bhiăn ala čar. Khua lăn čar mñă kơ dŭm anôk bruă ksiêm dlăng, bi êdah hdră êlan mlih mrâo, bi mbŏ dŭm klei čuăn hlăm klei bhiăn ala čar kơ klei bi kmhal hŏng klei djiê leh anăn ngă bruă bi kmhal hŏng klei mdjiê djăp ênŭm hnơ̆ng čuăn hlăm boh sĭt, hưn mdah hŏng dŭm anôk bruă mâo klei dưi ksiêm dlăng, bi klă.