Êbeh 70 thŭn, ƀiădah khua mduôn Ama An, ƀuôn Trí A, xã Krông Ana, kdriêk Ƀuôn Đon, čar Dak Lak ăt pral kdal hŏng klĭt jŭ, asei mlei kjăp msĕ si ana knia prŏng kjăp ti krah dliê kmrơ̆ng Lăn Dap Kngư liă lia. Thŭn 2002, Lăn Dap Kngư jing sa anôk rŭng răng klei kđi čar hŏng klei đĭ kyar mơ̆ng sa êpul bi kdơ̆ng, Ama An jing anôk mnuih ƀuôn sang hlăm ƀuôn knang. Jih sa wưng sui, păn kjăp boh klei hlăm djăp boh sang, ñu gĭr hâo hưn mtô kơ mnuih ƀuôn sang thâo kral phung jhat bi kdơ̆ng čiăng mnuih ƀuôn sang thâo răng, amâo hmư̆ klei phung jhat mplư.

Pô tinei đăm gnư̆ ôh, pô păn kjăp klei Đảng gĭt gai, hdră êlan knŭk kna, knang kơ hdră êlan Đảng čiăng duah klei jăk kơ grăp čô ti alŭ wăl.

Tơdah klei êđăp ênang lŏ hơĭt, khua mduôn, phung mâo kơhưm lŏ dơ̆ng jing gru mngač hlue ngă jăk hdră êlan mơ̆ng Đảng, hdră bhiăn Knŭk kna. 54 thŭn dôk hlăm dŭm êpul mơ̆ng Đảng, Y Thương K’Măn ti să Bông KRang, kdriêk Lăk, čar Dak Lak khăng hgŭm hlăm klei bi kƀĭn êpul êya ƀuôn sang, iêô jak mnuih ƀuôn sang ngă jăk hdră êlan, hdră bhiăn mơ̆ng Knŭk kna, gĭr mkŏ mjing êpul bi hgŭm jih djuê ana. Y Thương brei thâo, wăt tơdah lăn čar ƀrư̆ đĭ kyar ƀiădah klei hdĭp mnuih ƀuôn sang djuê ƀiă ăt mâo lu klei dleh dlan, dŭm êpul bi roh ăt mjhua hlăm klei anei čiăng mplư mnuih ƀuôn sang bi rai boh tŭ mơ̆ng klei krŭ kdơ̆ng. Kyua anăn phung đảng viên msĕ si ñu, jing anôk knang yuôm bhăn čiăng kơ mnuih ƀuôn sang pô tui hlue:

Đảng leh anăn Knŭk kna mđing dlăng kơ klei hdĭp mda mnuih djuê ƀiă lu mta, tal sa jing pui kmlă grăp boh sang mâo leh, tal dua jing ksiêm mkă klei ruă amâo liê prăk. Dŭm mta anăn jing klei Đảng mđing dlăng, hdră êlan Knŭk kna mđing dlăng kơ mnuih djuê ƀiă pô.

Hŏng kơhưm pô, lu khua mduôn ăt mtrŭt mjhar mnuih ƀuôn sang bi mguôp mđĭ kyar hiu čhưn ênguê êpul êya hŏng bruă răng mgang dhar kreh. Khua mduôn Y Nuel Niê, ƀuôn Akŏ Dhông, ƀuôn prŏng Ƀuôn Ama Thuôt, čar Dak Lak, bruă ngă anei đru kơ mnuih ƀuôn sang thiăm klei khăp, mpŭ kơ klei dhar kreh djuê ana, đru kơ diñu mâo thiăm prăk hrui wĭt čiăng mâo klei dhĭp hơĭt kjăp hĭn.

“Răng mgang dhar kreh djuê ana dưi mâo dŭm mta ênoh prăk hrui wĭt čiăng bi liê kơ anak čô hriăm hră ăt msĕ mơh mjing bruă mă kơ anak čô hlăm ƀuôn sang. Lŏ kơrŭ wĭt, hưn mthâo dhar kreh anak Êđê pô amâo djŏ knŏng hkăn kơ tue hlăm ala čar ôh ƀiădah wăt tue ti ala tač êngao. Mđĭ kyar dhar kreh mguôp hŏng hiu čhưn ênguê čiăng mâo prăk hrui wĭt kơ mnuih ƀuôn sang.”

Lăn Dap Kngư mâo êbeh 3.700 čô khua mduôn, phung mâo kơhưm, diñu amâo djŏ knŏng jing klei bi knăl dhar kreh ti krah ƀuôn sang ôh ƀiădah lŏ jing kngan mơ̆ng bruă sang čư̆ êa hlăm klei hâo hưn mtô mblang hdră êlan, hdră bhiăn, ba anăp hlăm klei hlue ngă dŭm hdră êlan, đru hơĭt kjăp klei hdĭp mda leh anăn klei êđăp ênang ƀuôn sang./.