Êpul mă bruă nao myơr brui mngưi, mnga bi hdơr ti Wăl mnơ̆ng kriê pioh hƀuê êneuk Anôk bruă gĭt gai lĭng kahan Tà Thiết ti kdriêk Lộc Ninh. Leh anăn, êpul nao êmuh hrăm, mđup brei mnơ̆ng kơ gŏ sang knŭk kna dlăng ba leh anăn hđeh sang hră mâo klei hdĭp dleh dlan ti kdriêk Lộc Ninh. Êpul mđup brei 30 hnư mnơ̆ng kơ gŏ sang knŭk kna dlăng ba, 30 hnư mnơ̆ng kơ hđeh sang hră dleh dlan hriăm thâo, 2 gŏ sang knŭk kna dlăng ba hlăm bruă kahan ksiêm.

Hlăm mmông mđup brei mnơ̆ng, K’iăng Khua lăn čar Võ Thị Ánh Xuân kah mbha klei dleh dlan leh anăn bi mni kơ gŏ sang knŭk kna dlăng ba, gŏ sang mâo ai krŭ kdơ̆ng gĭr ktưn, đru mkŏ mjing ƀuôn sang lăn čar. Mbĭt anăn, mtrŭt mjhar phung hđeh hriăm thâo, hgao klei dleh dlan, hriăm thâo mâo klei tŭ dưn. Leh anăn, K’iăng Khua lăn čar Võ Thị Ánh Xuân nao čhưn hŏng phung knuă druh, lĭng kahan răng mgang knông lăn Hoàng Diệu, hlăm kdriêk Bù Đôp.