Leh lu wưng dôk mâo klei mđing ksiêm jih jang bruă hlăm klei bi kƀĭn tal 4, Bruă kƀĭn ala gưl 15, Võ Tấn Tài, k’iăng khua kiă kriê dŭm mta bruă kơ klei mkŏ mjing ti Daklak, jing khua kiă kriê bruă Djuê ana - klei đăo, mơ̆ng Êpul khua kiă kriê krĭng Lăn Dap Kngư êlâo dih, mâo klei mơak kơ boh tŭ dưn truh 94, 38% ênoh phung bi ala mâo klei bi tŭ ư, Hdră mtrŭn kơ klei lông bi hmô kơ dŭm klei bhiăn hdră êlan pioh hjăn čiăng mđĭ kyar ƀuôn prŏng Ƀuôn Ama Thuôt, čar Daklak mâo bi mklă leh. Võ Tấn Tài lač:

 “Jing sa čô mnuih hdĭp ti ƀuôn prŏng Ƀuôn Ama Thuôt anei kâo ƀuh jing mơak snăk kơ klei Đảng, knŭk kna mđing kơ bruă rŭ mdơ̆ng ƀuôn prŏng Ƀuôn Ama Thuôt. Hmei dôk mĭn, Ƀuôn Ama Thuôt anei, lehanăn hlăm kluôm čar Daklak msĕ mơh, leh hmư̆ Bruă kƀĭn ala bi mklă kơ klei bhiăn pioh hjăn kơ pô, jing leh klei myun pai mă mtam klei myun anei lehanăn dưn yua jih ai ktang klei găl pô pioh hlue ngă jih klei bhiăn dưi mâo anăn, mjing klei găl, klei ktang mđĭ kyar ƀuôn prŏng Ƀuôn Ama Thuôt klă sĭt jing anôk phŭn”.

            Tui si Thái Hồng Hà, Khua kiă kriê knơ̆ng bruă dhar kreh, mjuăt asei mlei lehanăn hiu čhưn ênguê čar Daklak: Hdră mtrŭn anei mâo bi mklă mâo wăt hŏng jih jang hdră êlan mă bruă pioh leh kơ hjăn ƀuôn prŏng Ƀuôn Ama Thuôt, čar Daklak kơ ênoh ngăn prăk, kơ klei knŭk kna kiă kriê hlăm bruă čuăl mkă, iêo jak phung duh mkra hriê duh bi liê, jum tal êlâo jih jang phung knhăk, phung truăn kơ bruă, jing phung kreh knhâo, mnuih mbruă hriê mă bruă. Kyuanăn yơh, Thái Hồng Hà čang hmăng snei:

      “Bruă kƀĭn ala klă klơ̆ng mâo leh klei bi mklă kơ klei bhiăn hjăn, hlăm anăn mâo 5 hdră êlan mă bruă ƀuh jing jăk êdi. Anei jing sa klei bi knăl, jing knơ̆ng, jing boh kdrŭt, mơ̆ng anăn dưi gĭr hĭn čiăng dưi ngă tui si klei bi mklă mrô 67 mơ̆ng Phŭn bruă kđi čar, lehanăn hdră mtrŭn mrô 103 ƀrư̆ ƀrư̆ rŭ mdơ̆ng ƀuôn prŏng Ƀuôn Ama Thuôt jing anôk phŭn kơ krĭng hlue si hdră mtrŭn mrô 23 mrâo anei”.

            Ti anôk bi kƀĭn kơ tuôr mlan 10, Knơ̆ng bruă sang čư̆ êa čar Daklak mâo Phạm Ngọc Nghị, khua knơ̆ng bruă sang čư̆ êa čar Daklak mta leh kơ dŭm knơ̆ng dhar bruă, alŭ wăl pai mă mtam klei bhiăn anei leh mâo Bruă kƀĭn ala bi mklă leh, čiăng kơ ƀuôn prŏng pô pral mâo ngă jih jang bruă knuă, klei kiă kriê mơ̆ng knŭk kna, lehanăn bruă sang čư̆ êa ƀuôn prŏng, pioh đru kơ phung ƀuôn sang bi jăk hĭn. Phạm Ngọc Nghị lač:

“Êngao kơ boh phŭn bruă knuă mâo hưn mdah leh, snăn mta kơ jih jang brei mâo klei mđin hĭn kơ klei bhiăn pioh hjăn kơ Ƀuôn Ama Thuôt, mâo bi mklă leh, snăn drei bi pai mă mtam yơh mđưm kơ hdră ngă bruă ti thŭn 2023 anei, čiăng kơ klei bhiăn Ƀuôn Ama Thuôt, lehanăn lu hdră mtrŭn mơ̆ng knŭk kna, mơ̆ng gưl dlông, snăn knơ̆ng bră sang čư̆ êa čŏng ba yua mtam kăp kčĕ kơ êpul ngă bruă”./.