Đăo knang lehanăn čang hmăng jing ai tiê mơ̆ng lu phung bi ala bruă kƀĭn ala lehanăn mnuih ƀuôn sang hŏng klei bi kƀĭn tal 4, Bruă kƀĭn ala gưl 15. Klei bi kƀĭn mâo mkŏ mjing leh klei bi kƀĭn gưl dlông 6 mrâo bi ruĕ hŏng klei trông čhai lu mta bruă yuôm bhăn hŏng klei mđĭ kyar bruă duh mkra ala ƀuôn lăn čar; klei mlih mrâo hdră Đảng kiă kriê... Năng mđing hĭn êdi, klei bi kƀĭn gưl dlông 6, mâo ƀuah mkra leh anăn brei mdei dôk hlăm êpul khua kiă kriê gưl dlông mơ̆ng dŭm phung khua kiă kriê hlăm bruă Đảng gưl dlông. Anei jing hdră pŏk êlan kơ hdră “akâo mdei bruă tơdah ngă soh amâodah amâo thâo mă bruă”, čiăng kơ jih jang phung khua prŏng mkăn čong ksiêm dlăng pô lehanăn thâo ngă klei bi hmô kơ phung khua êmua mkăn hlăm bruă kđi čar. Pô bi ala Lê Thanh Vân, êpul mơ̆ng Cà Mau lač:

“Kâo čang hmăng truh ti sa wưng, tơdah Đảng nao êlâo hlăm bruă knŭk kna kiă kriê ăt srăng mâo mơh dŭm bruă hlue tluôn bi djŏ, čiăng kơ jih jang bruă păn djă klei dưi mơ̆ng knŭk kna čŏng thâo klei awăt êdu pô, lehanăn čŏng “kdŭn đuĕ jang anôk kơ mnuih mkăn”, čiăng kơ mnuih mâo klei thâo hĭn, mnuih knhăk, mnuih mâo klei dôk dơ̆ng ƀơ̆ng huă ênuah dưi kgŭ lehanăn mă bruă, amâo lĕ hlăm klei bi tiŏ êran sun ngăn, ik uêñ jao kơ bruă ôh”.

Kơ klei hdĭp mda ala ƀuôn, mâo phung ƀuôn sang mđing hĭn êdi jing kơ klei êa săng, êa pui. Kơ bruă êa săng đĭ ênoh hlăm wưng leh êgao kbiă hriê mơ̆ng klei kƀah êa săng êa pui hlăm ala čar, hnơ̆ng ênoh prăk mnga ba wĭt amâo mâo djŏ guôp, ênoh blei ti phŭn yuôm hĭn, ngă kơ phung čhĭ mnia êa săng êa pui čhĭ mnia êa săng êa pui amâo mâo ƀơ̆ng mnga ôh. Boh sĭt klei anei ngă truh kơ lu anôk čhĭ êa săng, êa pui bi kđăl ƀăng, amâodah čhĭ mă mkrah dưn hnơ̆ng êa săng, êa pui kơ mnuih blei. Phung ƀuôn sang akâo kơ knŭk kna mă klei hriăm, lehanăn mâo hdră mghaih msir bi pral klei kơ ênoh ênil hŏng tar rŏng lăn mâo klei amâo mâo jăk kơ mgi dih. Lehanăn akâo ngă bi mngač hĭn hlăm bruă kiă kriê, lehanăn ksiêm jih jang djăp mta mnơ̆ng yua aguah tlam. Kyua êjai ênoh êa săng, êa pui trŭn, ƀiădah djăp mta ênoh mnơ̆ng yua mkăn ăt dôk yuôm, boh nik mnơ̆ng kơ bruă lŏ hma, mnơ̆ng ƀơ̆ng huă... ngă hmăi amâo mâo jăk prŏng hŏng phung ƀuôn sang, lehanăn phung duh mkra:

Hŏng djăp mta bruă knuă, ăt djŏ tuôm hŏng êa săng, êa pui sơăi. Jing hmăi prŏng êdi hŏng klei duh mkra mnia mblei, yap wăt hŏng mnuih nao ngă bruă, lehanăn klei êdeh êdâo dŭm diăng mnơ̆ng dhơ̆ng. Mơ̆ng bruă lŏ hma, hlŏng truh kơ bruă rŭ mdơ̆ng, wăt hŏng bruă mnia mblei kơ djăp mta mnơ̆ng čhĭ mnia jing djŏ tuôm hŏng êa săng, êa pui sơăi”.

Leh lu blư̆ bi kdung, tal anei Bruă kƀĭn ala bi mklă mlih mrâo hdră čih mkra hdră bhiăn lăn ala. Anei jing hdră bhiăn mâo leh lu phung bi ala lehanăn mnuih ƀuôn sang mđing lehanăn akâo bi kdơ̆ng hŏng klei amâo mâo djŏ, mjhua hŏng klei tŭ dưn hlăm bruă mkra mjing hdră bhiăn. Hdră bhiăn lăn ala lŏ mlih mrâo čiăng bi mngač hĭn kơ bruă sua wĭt lăn, boh nik hŏng dŭm anôk rŭ mkra ƀuôn prŏng, alŭ wăl sang mưn dôk. Kơ bruă čiu hnô, đru ba, mkŏ mkra anôk dôk mrâo tơdah tuôm hŏng klei knŭk kna hrui mă lăn ala, rơ̆ng kơ hnơ̆ng hrui wĭt, lehanăn kơ klei hdĭp mda knar amâodah kdlưn hĭn kơ anôk hđăp. Năng brei mđing hĭn, bi mâo klei bhiăn kjăp kơ ênoh ênil hŏng lăn ala... Jing anôk bruă hlue ngă bruă knŭk kna kiă kriê klei kơ lăn ala, Khua phŭn bruă ngăn dŏ wăl hdĭp mda Trần Hồng Hà brei thâo: Klei čih mkra kơ hdră bhiăn lăn ala lŏ mlih mrâo, anăp truh kơ klei čoh čuăn rơ̆ng bi mklă kơ ênoh ênil lăn ala hŏng klei klă mngač, lehanăn djŏ guôp hŏng ênoh bi mnia mblei čiăng kơ phung ƀuôn sang, lehanăn phung duh mkra dưi dưn sơăi klei tŭ dưn:

“Leh mâo kruak kơ klei ênoh ênil lăn ala, hŏng klei klă mngač, lehanăn djŏ guôp hŏng ênoh bi mnia mblei snăn phung ƀuôn sang lehanăn phung duh mkra bi mâo klei tŭ dưn. Klei anei srăng đru mguôp sa kdrêč klei dưi dưn kơ ênoh lăn ala. Phung ƀuôn sang êjai anăn tơdah tuôm hŏng klei hrui mă lăn snăn ênoh lăn ti mmông anăn srăng dưi bi tĭng hŏng klei djŏ, klei năng kơ lăn ala. Bi kdrêč kơ knŭk kna ăt dưi dưn mơh klei tŭ dưn êjai hrui mă lăn mnuih dôk yua, djŏ tui si ênoh lăn mơh”.

Leh klei bi kƀĭn gưl dlông 6 mă klei blŭ kơ hdră mđĭ mlih prăk mlan, prăk leh wĭt mdei bruă, klei đru hră ênua bruă yang ƀuôn, lehanăn klei đru ba mnuih mâo bruă tŭ dưn hlăm thŭn 2023, truh kơ ară anei knŭk kna hlăk ba mdah kơ bruă kƀĭn ala bi mlih klei kơ prăk mlan nah ti hnơ̆ng ƀiă hĭn mơ̆ng hrue 1/7/2023 hŏng ênoh lŏ mđĭ mơ̆ng 1 êklăk 490 êbâo prăk truh 1 êklăk 800 êbâo prăk. Phung bi ala mnuih ƀuôn sang čang hmăng ba mdah hŏng bruă kƀĭn ala kñăm mâo mđĭ ênoh hrui wĭt, čiăng kơ digơ̆ hơĭt ai tiê mă bruă, bi leh jăk bruă kčah jao:

“Tơdah hlue ngă kơ klei mđĭ prăk mlan srăng mjing hdră bi hơĭt kơ klei hdĭp mda phung ngă bruă knŭk kna, lehanăn mnuih leh wĭt mdei jih thŭn, bi êdah kơ klei mđĭ kyar lăn čar. Siămdah, kơ klei duh mkra čiăng dưi mđĭ prăk mlan si ngă hơĭt mơ̆? klei čiăng mđĭ prăk mlan jing klei dôk čiăng năng êdi mơ̆ng phung ƀuôn sang”.

Phung bi ala akâo kơ knŭk kna ksiêm duah čiăng dưi mâo klei bhiăn jăk hĭn hŏng dŭm bruă mghaih msir ya mta klei adôk ka djŏ, năng mâo hdră êlan ngă mtam bi pral, hlăm bruă mdrơ̆ng hŏng klei ruă tưp Covid 19. Mbĭt hŏng anăn, lŏ dơ̆ng dlăng bi kjăp lehanăn mghaih msir klei ngă soh. Kyuadah phung ngă soh hŏng hdră bhiăn hlăm bruă mdrơ̆ng hŏng klei ruă tưp ăt adôk dleh ka thâo tĭng knăl; mđing kơ bruă duh bi liê kơ bruă mdrao mgŭn, boh nik bi mâo hdră êlan đru, bi djŏ, kñăm dưi iêo ba, mtrŭt mđĭ phung knuă druh bruă mdrao mgŭn pral bi hơĭt ai tiê mă bruă, êjai dôk mâo lu mnuih ngă klei amâo mâo djŏ, snăn mghaih msir tui si klei bhiăn phat mkra klei ngă soh./.