Anei jing bruă ngă yuôm bhăn hlăm boh klei ară anei tơdah lĭng kahan pŏk ngă bi jăk Hdră mtrŭn mơ̆ng kahan lĭng Gưl dlông mđĭ kar knuih jăk lĭng kahan Awa Hồ, gĭr bi kdơ̆ng hŏng klei mĭn hjăn păn hlăm boh klei mrâo.

Hlăm dŭm klei ba bi trông mâo sơăi klei lač knhuah gru “Lĭng kahan awa Hô” mâo bi êdah kơ knhuah hdĭp, klei hur har sĭt suôr hŏng Đảng, Knŭk kna mơ̆ng kahan lĭng drei, jing leh knơ̆ng yuôm bhăn mơ̆ng lĭng kahan yang ƀuôn Việt Nam. Knhuah gru “Lĭng kahan Awa Hồ” jing leh ênoh čuăn kơ knhuah mơ̆ng sa čô lĭng kahan cách mạng, hlăm ya ênuk dôk găn êđăp ênang thâodah bi blah, kahan lĭng ăt sĭt suôr hŏng Đảng, sa ai tiê hŏng mnuih ƀuôn sang, mprăp kơ klei bi blah hŏng klei săn asei mlei, kyua klei hnŭk êngiê kơ lăn čar, kyua kơ yang ƀuôn ngă phŭn êngiê. Jih jang klei anăn mâo čăt jing leh mơ̆ng klei mkŏ mjing hlŏng kơ klei đĭ kơ prŏng hlăm dăp wang êlan rŭ mdơ̆ng, bi blah lehanăn đĭ hriê kơ prŏng mơ̆ng lĭng kahan yang ƀuôn Việt Nam. Tui si nai prŏng, nai prĭn Hoàng Chí Bảo, Khua hlăm êpul gơ̆ng bruă hlak mblang gưl dlông lač anăn pia “Lĭng kahan Awa Hô”.

 “Lĭng kahan Awa Hồ” jing leh pô amâo mâo djŏ knŏng kơ klei ksiêm duah kreh knhâo, ƀiădah lŏ jing pô kơ klei čih mkra, hưn mdah, mjing boh kdrŭt kơ ai tiê čih klei yăl dliê kơ jŭm klei čiăng lač hŏng akŏ yuôm bhăn anei, ti anôk čiăng ti anôk mâo. Lĭng kahan Awa Hô ksŭn tinăn lu knhuah gru jăk siam mơ̆ng kahan lĭng drei. Lač kơ sa knhuah gru jăk siam dhar kreh Việt Nam ênuk Hồ Chí Minh, hlăm anăn mâo dhar kreh kahan lĭng, kreh dhar lĭng kahan drei”.

 Blŭ ti anôk trông čhai, Trung tướng Trịnh Văn Quyết, K’iăng khua adŭ bruă kđi čar anôk bruă kđi čar hlăm lĭng kahan yang ƀuôn Việt Nam lač: Anăn knăl yuôm bhăn “Lĭng kahan Awa Hô” mâo leh mnuih ƀuôn sang đăo knang, khăp mpŭ hŏng kahan lĭng drei dơ̆ng mơ̆ng ênuk blah Prăng. Hlăm ya klei dôk găn ênuk êđăp ênang thâodah ênuk bi blah, găn hlăm klei dleh dlan dưn khădah săn asei mlei pô, ƀiădah lĭng kahan hlăm kluôm kahan lĭng wưng leh êgao ăt bi msiăm nanao knhuah mơ̆ng lĭng kahan awa Hô, êjai dôk hlăm klei dleh dlan, ƀai hĭn srăng guh mngač. Dôk ti anăp klei lông dlăng msĕ si ară anei knhuah gru anei knư̆ hĭn dưi dưn yua:

“Hlăm boh klei mrâo, bruă čuăn rŭ mdơ̆ng lĭng kahan, bi kjăp bruă răng mgang lăn čar, răng mgang kjăp klei êngiê kơ lăn ala êa djuh, hŏng lu bruă klam prŏng. Êjai anăn, phung bi roh hlăk dôk ba yua lu mnêč “nao hŏng klei êđăp ênang” ngă klei “čŏng bi mlih”, “čŏng mbliư̆” hlăm êpul pô “Êngao kơ bruă kđi čar” lĭng kahan duah bi luar hdră êlan mơ̆ng Đảng, klei bhiăn knŭk kna, lehanăn knhuah gru hlăm lĭng kahan yang ƀuôn Việt Nam jhŏng ktang, knhuah gru jăk siam “Lĭng kahan Awa Hô” bi kriê pioh lehanăn bi mđĭ lar ai ktang, bi năng hŏng klei čiăng hlăm ênuk mrâo mrang”.

 Ti anăp klei lông dlăng “bi mlih hlăm klei êđăp ênang” ară anei, mâo lu klei blŭ kñăm tui duah djăp hdră lŏ kơrŭ wĭt klei êpa mhao duh myơr, mjuăt hriăm dưn yua knhuah gru lĭng kahan awa Hô hlăm boh klei mrâo. Hlăm anăn hyua kjăp hdră êlan kiă kriê, hlăm djăp mta klei mơ̆ng Đảng; mđĭ hĭn bruă dhar kreh hlăm lĭng kahan, păn kjăp knhuah gru lĭng kahan awa Hô, kut kat bi blah bi kdơ̆ng hŏng hdră êlan mĭn mă hjăn. 

Ti anôk trông čhai mâo lu klei čih ba bi trông lač klă mngač kơ knhuah gru lĭng kahan awa Hô, mjing knơ̆ng kơ anôk bruă Đảng kahan gưl dlông, phŭn bruă kahan lĭng Knơ̆ng kiă kriê bruă kđi čar lehanăn dŭm gưl bruă Đảng, anôk kiă kriê kahan hlăm dŭm gưl bi păn kjăp, kiă kriê mâo dŭm hdră êlan gĭt gai jih jang lĭng kahan dưn yua jih knhuah gru lĭng kahan awa Hô hlăm boh klei mrâo, bi leh bruă čuăn rŭ mdơ̆ng kahan lĭng, bi kjăp bruă răng mgang lăn čar, lehanăn jing ênoh čuăn, giê mkă kơ knhuah cách mạng čiăng kơ grăp čô knuă druh, lĭng kahan čŏng ksiêm mkă pô mâo klei bi mlih lehanăn bi ktưn mjuăt mjing knhuah yuôm bhăn mơ̆ng cách mạng, lar ling knhuah gru dhar kreh lĭng kahan awa Hô ênuk mrâo mrang.

Klei tŭ dưn knhuah “Lĭng kahan awa Hồ” jing klei bi mguôp kjăp dhar kreh kahan lĭng Việt Nam, mâo leh dŭm gưl knuă druh lĭng kahan mơ̆ng kahan lĭng yang ƀuôn Việt Nam nâo dưn yua, lŏ čuê, lehanăn ksul mbŭ ti gŭ klei kiă kriê, mkŏ mjing, lehanăn mjuăt bi hriăm mơ̆ng Đảng lehanăn mơ̆ng khua gĭt gai Hồ Chí Minh. Mđi lar knhuah gru dhar kreh lĭng kahan awa Hô mâo păn kjăp lehanăn mtrang mgač nanao, đru bi mkŏ mjing kahan lĭng yang ƀuôn Việt Nam kjăp ktang kơ bruă kđi čar, mjing knơ̆ng kơ bruă bi klin jih nhuah klei jăk, ai ktang bi blah, bi leh jăk bruă čuăn mâo Đảng, Knŭk kna lehanăn mnuih ƀuôn sang jao./.