Ti să Snay Anhchit, kdriêk ChumKiri, čar Kampot, ala mtao Campuchia, mnuih ƀuôn sang hdĭp mda hŏng bruă lŏ hma, kbưi hŏng wăl krah, kyuanăn klei hdĭp, ai tiê leh anăn klei găl kriê dlăng klei suaih pral ăt dôk msĕ hŏng đưm leh anăn tuôm hŏng lu klei dleh dlan, kƀah mñơ̆ng dhơ̆ng. Aduôn Chanol ƀuh lĭng kahan Việt Nam nao mkă dlăng klei ruă, brei êa drao amâo mâo mă prăk kơ mnuih ƀuôn sang ti nei, ñu ƀuh mgei ai tiê: “Kâo mâo lu klei ruă sơnăk ƀiădah amâo mâo klei găl dưi mdrao gŭn, ară anei hmư̆ mâo êpul phung aê mdrao mơ̆ng knơ̆ng gĭt gai lĭng kahan čar Kiên Giang hriê mkă dlăng klei ruă leh anăn brei êa drao amâo mâo mă prăk, mđup brei hnư mnơ̆ng kơ mnuih ƀuôn sang ti nei, kâo mơak êdi. Kâo lač jăk lu êdi.”

Hlăm klei hluê ngă bruă klam, êpul ngă bruă tuôm hŏng lu klei dleh dlan kyua yan adiê, êdeh êdâo đĭ, klei mdê hlăm klei blŭ, ti anăp dŭm klei dleh dlan, suăi êmăn mơ̆ng mnuih ƀuôn sang ti ala čar mah jiăng, grăp čô hlăm êpul mâo nanao klei mđĭ ai hdơ̆ng găp čiăng mgaih msir klei dleh dlan, bi leh bruă klam. Trần Thu Quỳnh, sang êa drao prŏng čar Kiên Giang brei thâo:

Kâo pô ƀuh klei huĭ mơh kyuadah jing gưl tal êlâo pô nao mkă dlăng, drao klei ruă ti ala čar mah jiăng. Khădah tuôm hŏng lu klei dleh dlan hlăm klei êrô êbat, êa drao gŭn leh anăn kdrăp yua bruă mdrao mgŭn, ƀiădah leh hriê ti nei kâo ƀuh bruă mdrao mgŭn mơ̆ng mnuih ƀuôn sang tinei dôk mâo lu klei dleh dlan, kâo pô jing aê mdrao mbĭt hŏng phung ayŏng amai adei hlăm êpul ăt gĭr jih ai pô čiăng đru kơ bruă mdrao mgŭn kơ mnuih ƀuôn sang tinei, čiăng đru mguôp sa kdrêč bi hrŏ klei ktrŏ kơ bruă mdrao mgŭn alŭ wăl.

            Thiếu tá Hoàng Trọng Thiên, Khua kiă kriê anôk bruă mdrao mgŭn knơ̆ng gĭt gai lĭng kahan čar Kiên Giang brei thâo:

            Lač klă kơ mmông mprăp mnơ̆ng yua jing dôk dleh dlan êdi, ƀiădah hlăm klei ngă bruă, phung ayŏng amai adei hmei mâo klei gĭr leh anăn truh ti anôk anei lŏ mâo klei đru mơ̆ng anôk bruă găp leh anăn mnuih ƀuôn sang alŭ wăl kđông kahan găp, klei nao mkă dlăng, mdrao klei ruă anei dưi tŭ jing jăk.

            Ti nei, êpul phung nai êa drao, aê mdrao mơ̆ng Knơ̆ng gĭt gai lĭng kahan čar Kiêng Giang dưi mkă dlăng leh anăn mđup brei 300 hnư êa drao amâo mâo mă prăk kơ phung knuă druh leh anăn mnuih ƀuôn sang tinei, grăp hnư êa drao mâo ênoh 100 êbâo prăk. Mbĭt anăn, ti anôk mkă dlăng klei ruă leh anăn brei êa drao, êpul ăt mđup brei 60 hnư mnơ̆ng kơ dŭm gŏ sang mâo klei hdĭp dleh dlan, grăp hnư mâo ênoh 500.000 păk. Bruă ngă tinei dưi mkŏ mjing lu klei khăp jăk siam hŏng bruă sang čư êa alŭ wăl leh anăn mnuih ƀuôn sang ti ala čar mah jiăng kơ rup lĭng kahan Việt Nam hlăm ênuk êđăp ênang. Aduôn Sui Kết, mnuih ƀuôn sang ti kdriêk Chumkiri, čar Kam Pốt brei thâo: Kâo mơak sơnăk kyua mâo phung nai êa drao hriê mđup brei hnư mnơ̆ng leh anăn mkă dlăng klei ruă, brei êa drao amâo mâo mă prăk, amâo mâo mnơ̆ng lŏ dưi mkă ôh, tơdah dưi êdei dih lŏ hriê đru hmei đa, kyuadah hlăm wưng anei mnuih ƀuôn sang hmei ăt dôk tuôm hŏng lu klei dleh dlan, dŭm hnư mnơ̆ng anei jing ƀiă, ƀiădah dưi đru kơ hmei bi hơĭt klei hdĭp hlăm wưng dleh dlan anei.

            Mơ̆ng thŭn 2015 truh kơ ară anei, Knơ̆ng gĭt gai lĭng kahan čar Kiên Giang mkŏ mjing leh 6 êpul nao mkă dlăng klei ruă leh anăn mđup brei êbeh 3.500 hnư êa drao kơ mnuih ƀuôn sang ti lu să, kdriêk dôk mâo lu klei dleh dlan ti ala čar Campuchia hŏng ênoh prăk êbeh 400 êklăk prăk. Grăp klei čuă êmuh, grăp hnư êa drao, grăp hnư mnơ̆ng jing dŭm boh ƀrĭk bi kjăp klei bi mguôp plah wah lĭng kahan 2 ala čar. Đại tá Tếp Âm, k’iăng khua gĭt gai wăl kahan Kampot brei thâo: “Dưi mâo klei jao bruă mơ̆ng gưl dlông, hmei bi mguôp hŏng êpul nai, êa mdrao Kiên Giang hriê mkă dlăng klei ruă, mđup brei êa drao amâo mâo mă prăk leh anăn hnư mnơ̆ng. Hlăm klei bi mguôp hŏng êpul mơ̆ng čar, Êpul klam bruă K92, êpul mâo leh klei mkă dlăng klei ruă, mđup brei êa drao ti alŭ wăl să Snay Anh Chít. Kâo bi mni, hơ̆k mơak leh anăn lač lač kơ êpul nai, aê mdrao mơ̆ng čar Kiên Giang lu êdi”

            Bruă mkŏ mjing êpul nai, aê mdrao nao mkă dlăng klei ruă, mđup brei êa drao kơ mnuih ƀuôn sang să Snay Anhchit jing bruă ngă yuôm bhăn leh anăn tŭ dưn mơ̆ng êpul lĭng kahan čar Kiên Giang, đru sa kdrêč hŏng bruă sang čư êa, alŭ wăl ala čar găp kriê dlăng klei hdĭp mnuih ƀuôn sang. Hluê anăn ăt mkŏ mjing klei găl čiăng kơ êpul K92 dôk tui duah, kkuai mă klang phung lĭng kahan djiê êngiă leh anăn phung thơ̆ng kơ bruă Việt Nam djiê ti anôk bi blah Campuchia bi leh jăk bruă klam dưi jao leh, ba ktang lĭng kahan pô wĭt hŏng ƀuôn sang. Anei ăt jing wưng bi kjăp klei bi mguôp, mđĭ hĭn klei bi hgŭm plah wah 2 čar Kiên Giang leh anăn KamPot, plah wah knŭk kna leh anăn mnuih ƀuôn sang Việt Nam – Campuchia. Đại tá Cao Minh Tâm, k’iăng khua bruă kđi čar Knơ̆ng gĭt gai lĭng kahan čar Kiên Giang brei thâo:

Hŏng bruă mkŏ mjing klei mkă dlăng klei ruă, mđup brei êa drao amâo mâo mă prăk leh anăn mđup brei hnư mnơ̆ng kơ mnuih ƀuôn sang ti čar Kampot mơ̆ng knơ̆ng Gĭt gai lĭng kahan čar leh anăn sang êa drao prŏng čar Kiên Giang, hŏng mta kñăm mkŏ mjing klei găl čiăng kriê dlăng klei hdĭp mnuih ƀuôn sang ti alŭ wăl čar Kampot, hlăm anăn jing kdriêk Chumkiri čiăng kčưm hyuă kjăp klei bi mguôp, bi hgŭm plah wah 2 djuê ana Việt Nam leh anăn Campuchia ăt msĕ hŏng čar Kiên Giang leh anăn čar Kampot”.