Hlăm klei blŭ akŏ thŭn 2022, Khua bruă kƀĭn ala Vương Đình Huệ lač: Bruă kƀĭn ala, Khua Dhar bruă kƀĭn ala srăng pral hĭn, hrăm mbĭt jih ai tiê hĭn hŏng knŭk kna, dŭm anôk bruă knŭk kna čiăng hmao ksiêm dlăng, bi mklă dŭm bruă hlăm klei dưi. Lač mbĭt hŏng bruă ngă, leh 1 thŭn pŏk ngă Hdră mkŏ mjing hdră bhiăn wưng Bruă kƀĭn ala gưl XV, dŭm anôk bruă mơ̆ng Bruă kƀĭn ala, Knŭk kna leh anăn dŭm anôk bruă djŏ tuôm bi leh 81/137 bruă čih mkra hdră bhiăn, bi leh bruă ksiêm hriăm, ktuê dlăng amâodah mkŏ mjing mrâo (mâo êbh 59% bruă klam mơ̆ng jing wưng păn bruă), mjing tur knơ̆ng hdră bhiăn čiăng kơ Knŭk kna, bruă sang čư̆ êa alŭ wăl ba yua dŭm hdră msir mbruă, jih ai tiê, tŭ dưn hlăm hdră gang mkhư̆ klei ruă tưp, răng mgang klei hdĭp, klei suaih pral mơ̆ng yang ƀuôn, đru kơ anôk bruă duh mkra, phung mă bruă hgao klei dleh dlan leh anăn rơ̆ng klei hdĭp mda ala ƀuôn, mđĭ hdră kơrŭ wĭt leh anăn mđĭ kyar bruă duh mkra- ala ƀuôn hơĭt kjăp leh klei ruă Covid-19.

Boh nik, êngao kơ dua klei bi kƀĭn grăp gưl, hlăm akŏ thŭn, Bruă kƀĭn ala mkŏ mjing Klei bi kƀĭn mjêč tal sa čiăng ksiêm dlăng, bi mklă lu boh phŭn prŏng, mjêč, hmăi kơ klei kơrŭ wĭt, mđĭ kyar mơ̆ng lăn čar hlăm klei găl mrâo. Bruă mkŏ mjing klei bi kƀĭn mjêč tal sa dưi dlăng jing bi mklă hƀuê ênuk mơ̆ng Bruă kƀĭn ala Việt Nam hlăm 76 thŭn êgao, bi mklă klei jhŏng, klei gĭr kđi čar mơ̆ng anôk bruă mâo klei dưi knŭk kna prŏng hĭn ăt msĕ mơh klei gĭr mlih mrâo, bruă ngă kyua klei tŭ dưn kơ yang ƀuôn.

Klei bi kƀĭn mjêč čiăng msir mgaih bruă mjêč. Boh sĭt bi mklă tơdah Bruă kƀĭn ala amâo mbĭt hŏng Knŭk kna mâo dŭm klei wĭt lač pral srăng bi luč hĕ klei găl kơ ala čar.  Dŭm boh phŭn bi trông hlăm klei bi kƀĭn mjêč amâo djŏ knŏng ngă djŏ klei čiăng kơ thŭn 2022, thŭn 2023 ôh, ƀiădah lŏ jing klei yuôm bhăn kơ jih wưng leh anăn dŭm thŭn kơ anăp. Jing jang dŭm hdră mprăp leh anăn mkŏ mjing klei bi kƀĭn dưi bi êdah hnơ̆ng trah dlăng kbưi, êlam leh anăn klei ngă bruă mprăp mơ̆ng hnưm, mơ̆ng kbưi.

Mta kñăm jing bruă kƀĭn ala bi mklă Hdră mtrŭn mrô 43/2022 hruê 11/01/2022 kơ hdră êlan ngăn prăk hŏng hnơ̆ng hlăm brô 350 êbâo êklai prăk, bi knar hŏng êbeh 8% GDP čiăng đru pŏk ngă Hdră kñăm kơrŭ wĭt leh anăn mđĭ kyar bruă duh mkra- ala ƀuôn, đru ba mđĭ kyar GDP thŭn 2022 đĭ 8,02%, mâo lu hĭn hlăm êbeh 10 thŭn êgao, hlăm êpul ala čar mâo hnơ̆ng đĭ kyar mrô sa dlông rŏng lăn.

Msĕ si klei Khua čih hră, Khua adŭ bruă kƀĭn ala Bùi Văn Cường lač: Hdră mtrŭn dưi ba mdah hlăm sa klei bi kƀĭn yuôm bhăn snăk, ka tuôm mâo ôh hŏng lu klei gĭr mơ̆ng Khua gĭt gai Đảng, Bruă kƀĭn ala, Knŭk kna, dŭm Phŭn, dhar bruă, alŭ wăl leh anăn phung bi ala bruă kƀĭn ala. Hdră mtrŭn anăn pŏk sa klei bhiăn yuôm bhăn, hlăm anăn dŭm hdră mtrŭn, hră mơar dưi bi ênưih jih hnơ̆ng, mbha gưl ktang kơ grăp phŭn, dhar bruă, alŭ wăl sui hŏng anei ka tuôm ba yua ôh. Bruă kƀĭn ala lŏ dơ̆ng jao kơ Dhar bruă kƀĭn ala klei bi mklă dŭm bruă yuôm bhăn, mdê hjăn, boh nik mdê hŏng hdră bhiăn hlăm wưng Bruă kƀĭn ala amâo bi kƀĭn čiăng hmao hrăm mbĭt hŏng knŭk kna. Ai tiê leh anăn boh tŭ mơ̆ng klei bi kƀĭn mjêčf tal sa, Bruă kƀĭn ala gưl Xv mjing leh ai êwa mrâo, klei găl mrâo.

Prăk hrui wĭt knŭk kna lu ka tuôm mâo, êbeh lu mkă hŏng hdră mĭn tĭng, nư đuôm hlăm hnơ̆ng dưi ktuê dlăng, GDP thŭn 2022 jih thŭn đĭ 8,02%, lu hĭn hlăm wưng 2011-2022, dŭm hdră bruă p’prŏng dưi bi knar… Dŭm klei hâo hưn yuôm bhăn dưi ba mdah hlăm knhal jih thŭn mâo lu klei bi knăl jăk, jing boh kdrŭt yuôm bhăn kơ hdră kčah 5 thŭn, ƀrư̆ yuôm bhăn hĭn tơdah ala čar mŭt hlăm thŭn mơ̆ng wưng păn bruă hlăm bruă hlue ngă hdră mtrŭn klei bi kƀĭn tal XIII mơ̆ng Đảng.

Mpŭ hĭn tơdah klei êdah kdlưn hlăm jih jang bruă hŏng lu klei êdah kdlưn tơdah drei lŏ dlăng wĭt boh klei thŭn 2022, boh klei dlông rŏng lăn mlih mrâo dleh ktuê dlăng, ka tuôm mâo, dleh dlan hĭn mkă hŏng mkŏ mjing Hdră kčah mđĭ kyar bruă duh mkra- ala ƀuôn thŭn 2022. Hŏng klei mlih mrâo dlông rŏng lăn, klei mnơ̆ng dhơ̆ng đĭ ênoh lu, ênoh êa săng, êa pui, mnơ̆ng dhơ̆ng đĭ, hmăi prŏng kơ lu dhar bruă, alŭ wăl, lu bruă mâo sui brei dưi msir mgaih, hlăk êjai anăn, klei ruă tưp, yan adiê ngă, angĭn êbŭ mâo dleh ktuê dlăng, ba lu klei amâo jăk kơ bruă mnia blei leh anăn klei hdĭp mda mơ̆ng ala ƀuôn.

Lač kơ klei hmăi amâo jăk anei čiăng ƀuh kơ boh tŭ drei mâo leh jing yuôm bhăn snăk. Klei kơrŭ wĭt ktang mơ̆ng bruă duh mkra bi êdah klei tŭ gĭt gai mơ̆ng Knŭk kna ăt msĕ mơh dŭm phŭn, dhar bruă; klei gĭr, jih ai tiê mơ̆ng bruă kđi čar, mơ̆ng yang ƀuôn, êpul bruă duh mkra. Leh anăn boh nik klei hrăm mbĭt, hmao đru, tŭ dưn mơ̆ng bruă kƀĭn ala mơ̆ng hdră “yuôm bhăn, mjing klei găl, mdê hjăn”.

Klei lông dlăng, dleh dlan ăt mâo lu, ƀiădah klei đăo knang hlăm anôk bi kƀĭn dưi ƀuh klă, tơdah mâo phung bi ala bruă kƀĭn ala bi êdah: Dlông rŏng lăn dôk ksiêm dlăng Việt nam msĕ si sa klei bi knăl êdah kdlưn mơ̆ng ênuk Covid-19 leh anăn klei dưi ktang êdei klei ruă tưp. Đăo sĭt, hŏng klei bi hgŭm, sa ai mơ̆ng jih bruă kđi čar, klei nao ai, tŭ ư mơ̆ng jih jang mnuih ƀuôn sang leh anăn dŭm anôk bruă duh mkra, klei gĭt gai klă mngač mơ̆ng Đảng, klei pral, hrăm mbĭt mơ̆ng Bruă kƀĭn ala leh anăn klei gĭt gai jih ai tiê, siă suôr mơ̆ng Knŭk kna, klă sĭt drei srăng hlue ngă tŭ jing dŭm hdră kñăm bhâo hlăm thŭn 2023, ăt msĕ mơh hdră kñăm sui hlăm êdei anăp./.