Hrue mbrue 21-1, Abnôk bruă jưh ti lăn dap kngư mơ̆ng Sang mđung asăp blŭ Việt Nam bi mguôp leh hŏng knơ̆ng bruă kahan čar Daklak lehanăn knơ̆ng bruă êa săng êa pui nah dhŭng lăn dap kngư mkŏ mjing leh knăm mđup brei sang mrâo kơ kahan Xa Văn Thắng, dôk mă bruă ti anôk bruă kahan kdriêk Krông Bông, čar Daklak.  Xa Văn Thắng mâo klei hdĭp dleh dlan, dôk sang mưn, rông amĭ mduôn, lehanăn dua čô anak điêt hlăk dôk hriăm hră. Sang mrâo anei mdơ̆ng giăm 100 m2, hŏng ênoh jih jang truh 260 êklăk prăk. Hlăm anăn, VOV Lăn dap kngư, lehanăn knơ̆ng bruă êa pui êa săng nah dhŭng lăn dap kngư mguôp 80 êklăk prăk, dŭm adôk jing Thắng čan mơ̆ng mah jiăng, lehanăn knơ̆ng prăk đru ba bruă yang ƀuôn. Sang mđup brei anei mâo mdơ̆ng leh êlâo kơ Tết Nguyên đán jing leh dŏ mđup brei yuôm bhăn, ba wĭt klei mơak lehanăn klei mđĭ ai kơ gŏ sang, đru kơ Thắng hĭt anôk dôk, ênang hlăm bruă duh ƀơ̆ng bi leh jăk bruaư kčah jao.

Dưi thâo, anei jing sang tal 5 leh VOV Lăn dap kngư mbĭt hŏng dŭm êpul êya bi đru mâo mdơ̆ng đru kơ mnuih ƀuôn sang hlăm čar Daklak dŭm thŭn êgao.

Hlăm ai êwa drông Têt Djuê ana Ất Tỵ 2025, gŏ sang amai Ka Nhing, djuê ana K’ho ti alŭ Di Linh Thượng 2, wăl krah Di Linh, čar Lâm Đồng mgei ai tiê hlăk mâo jao “Sang hơuh mđao klei khăp”. Sang anei dưi mdơ̆ng hŏng ênoh prăk 160 êklăk prăk. Hlăm anăn, Êpul bruă mniê kdriêk Di Linh đru 50 êklăk prăk mơ̆ng Keh kyua phung mniê ƀun, kdrêč adôk gŏ sang čan lĭng. Ka Hương, Kơiăng khua êpul bruă mniê kdriêk Di Linh brei thâo, mbĭt hŏng hdră jao “Sang hơuh mđao klei khăp”, gưl anei lŏ mâo lu hdră mđing dlăng Têt kơ amai adei mâo klei hdĭp dleh dlan.

 “Êpul bruă mniê kdriêk Di Linh iêu mthưr jih jang mnuih bi đru, mâo ai tiê kmah, mnuih hgŭm hlăm êpul thâo bi đru… Êngao anăn, hmei ăt bi hgŭm hŏng dŭm êpul ti alŭ wăl msĕ si Anôk bruă Pui kmlă čiăng nao čuă êmuh, mđup brei mnơ̆ng kơ amai adei dleh dlan, amâo mâo anôk jưh knang čiăng kơ diñu lŏ mâo thiăm hnư mnơ̆ng hơuh mđao hruê mơak drông yan mnga, drông Têt. Hlăm thŭn, hkăk mkŏ mjing hdră “Amĭ đru rông ba”, hmei iêu mthưr leh phung mâo ai tiê kmah, dŭm êpul bruă, mnuih nao čuă êmuh lehanăn jao 45 hnư mnơ̆ng kơ phung hđeh êrĭt êrin, amâo anôk jưh knang. Grăp mlan, kreh mâo êpul mkŏ mjing hdră čuă êmuh, dlăng kriê klei suaih pral. Knhal jih thŭn ăt mâo hdră mđup brei mnơ̆ng kơ phung hđeh čiăng mâo klei găl mơak drông Têt”.