Hlăm klei đuĕ nao truh kơ kđông kahan răng mgang knông lăn bi knông hŏng ala čar Lào lehanăn Campuchia dŭm hrue anei ênưih ñŭ kma hŏng klei mơak drông Tết. Ti 13 să knông lăn hlăm 4 kdriêk: Đăk Glei, Ngọc Hồi, Sa Thầy lehanăn Ia H’Drai mơ̆ng čar  Kon Tum ai êwa Tết giăm truh leh.

Wưng Tết Nguyên đán Ất Tỵ thŭn anei, Knơ̆ng bruă kahan răng mgang knông lăn čar Kon Tum ruah să Ia Đal, kdriêk Ia H’Drai mkŏ mjing anôk bi hmô kơ čar mkŏ mjing hdră: “Yan mnga kahan răng mgang knông lăn h’uh mđao ai tiê mnuih ƀuôn sang” mbĭt hŏng klei “mơak đŭng điŏ”. Hŏng bruă ngă anei mâo êbeh 6.000 čô mnuih hlăm 11 boh ƀuôn hlăm să mâo mơak Tết, mơak mñai mkŏ mjing klei bi lông đŭng điŏ, riă điŏ, mkŏ mjing klei kưt muiñ, mjuăt asei mlei, mđup brei mnơ̆ng hŏng êbeh 250 hnư mnơ̆ng, 400 hlâo điŏ đŭng. Đại tá Lê Minh Chính, pô ngă bruă kđĭ čar hlăm kđông kahan răng mgang knông lăn čar Kon Tum, brei thâo wưng anei, ktuê knông lăn mâo mkŏ mjing lu bruă duh mĭn Tết kơ mnuih ƀuôn sang:

“Thŭn anei hmei ruah să Ia Đal, kdriêk Ia H’Drai jing să ngă anôk bi hmô pioh mă klei hriăm kơ jih jang anôk mkăn. Dŭm să adôk kđông răng mgang knông lăn bi mguôp hŏng mnuih ƀuôn sang, lehanăn bruă sang čư̆ êa alŭ wăl mkŏ mjing kơ mnuih ƀuôn sang mâo dŭm mta klei kahan răng mgang knông lăn đru mguôp, mbĭt hŏng phung duh mkra, phung thâo bi đru, dŭm gưl dhar bruă čiăng kơ mnuih ƀuôn sang msao drông Tết h’uh mđao”.

Hŏng êwa čing kwang, ti krah hla čhiăm gru bi kđhĭt hlăm klei mnuih ƀuôn sang mơak mtlao hlăm knông lăn čar Kon Tum hlăk mjing klei jăk siam hlăm yan mnga bluh hdĭp, lehanăn h’uh mđao.

Thŭn 2024 klei hdĭp mnuih ƀuôn sang ti alŭ wăl knông lăn čar Kon Tum mâo leh klei bi mlih jăk kyua kphê, ksu, hbei ƀlang mâo ênoh. Dŭm bruă bi hmô mâo kahan răng mgang knông lăn ngă, msĕ si: Tiŏ nao phung đảng viên mơ̆ng kđông răng mgang knông lăn đru čung ba mnuih ƀuôn sang, đru mjeh êmô pioh rông kơ mnuih dôk hlăm klei dleh dlan ti dŭm boh sa knông lăn; msĕ si rông ŭn jŭ, mđrăm mbĭt hŏng êpul bruă mniê knông lăn... Dưn yua tŭ jing bruă bi đru mnuih djuê ƀiă, mâo klei hrui wĭt hơĭt mơak thiăm hlăm hrue Tết. Bloong Hâm, k’iăng khua knơ̆ng bruă sang čư̆ êa să Đăk Dục, kdriêk Ngọc Hồi, lač:

 “Mâo Đảng, Knŭk kna, dŭm êpul êya djŏ tuôm, kahan răng mgang knông lăn čar đru bi leh dŭm ênoh čuăn duh mkra ala ƀuôn hlăm să, dưi djăp, đa đa kdlưn hĭn hŏng ênoh čuăn. Mnuih ƀuôn sang mơak mâo drông Tết”.

Hrue mmôn ghlăk đuĕ nao thŭn hđăp đuĕ nao, thŭn mrâo truh. Hlăm knông lăn čar Kon Tum mâo 76 êpul êya, êbeh 550 gŏ sang ti 13 boh să knông lăn ƀuăn răng kriê knông lăn, gơ̆ng knông lăn bi jăk. Mâo 93 êpul lehanăn giăm 600 gŏ sang ƀuăn bi đru răng kriê klei êđăp ênang hlăm ƀuôn sang. Hlăm dŭm hrue drông Tết, mơak yan mnga, lĭng kahan ti nei ăt kăn wơr bruă čuăn hlăm klei thâo răng. Knuă druh lĭng kahan, lehanăn mnuih ƀuôn sang păn kjăp ai tiê hiu suang răng, čiăng bi knông lăn mâo klei êđăp ênang. Đại tá Trần Ngọc Tùng, k’iăng khua kahan răng mgang knông lăn čar Kon Tum, brei thâo:

“Mđĭ hĭn bruă klam jih jang mnuih ƀuôn sang jih ai tiê bi hgŭm hŏng kahan răng mgang knông lăn, bi răng kriê kjăp lăn ala êa djuh pô, knơ̆ng kiă krie ekahan răng mgang knông lăn čar mđĭ hĭn klei hâo hưn, čiăng kơ mnuih ƀuôn sang mâo klei răng săng, hlăm klei jih jang mnuih ƀuôn sang bi đru răng mgang klei êđăp ênang knông lăn lehanăn hlăm ƀuôn sang. Mđĭ hĭn bruă klam mơ̆ng êpul êya, grăp čô mnuih hlăm bruă kiă kriê klei êđăp ênang bruă kđĭ čar lehanăn klei êđăp ênang yang ƀuôn”.

 Hŏng dŭm klei bi mlih jăk siam klei hdĭp mda mnuih ƀuôn sang, klei mơak drông Tết mơ̆ng mnuih ƀuôn sang lehanăn lĭng kahan ti knông lăn čar Kon Tum knư̆ hĭn mơh mơak mñai. Tết ti knông lăn amâo mâo knŏng jing klei bi mtuôm kuh kŭm ênŭm ênap ƀiădah lŏ bi knăl kơ klei thâo bi đru, thâo bi mguôp plah wah lĭng kahan hŏng mnuih ƀuôn sang ti knông lăn./.