Knơ̆ng bruă sang čư̆ êa čar Dak Lak mrâo mkŏ mjing klei bi kƀĭn ksiêm wĭt boh klei pŏk ngă dŭm hdră kñăm ala čar wưng 2021 - 2023, hdră msir, bruă klam phŭn wưng 2023 - 2025 leh anăn tă hdră pŏk ngă hlăm wưng 2026 - 2030. Hlue ngă 3 hdră kñăm ala čar (krĭng ƀuôn sang mrâo, bi hrŏ ƀun kjăp leh anăn mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng, Dak Lak dưi jao giăm 2.320 êklai prăk. Hlăm anăn, Hdră mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng mâo lu, hŏng ênoh prăk êbeh 1000 êklai prăk; Hdră bi hrŏ ƀun kjăp jao leh êbeh 382 êklai prăk; Hdră mkŏ mkra krĭng ƀuôn sang mrâo jao leh êbeh 927 êklai prăk. Êngao kơ prăk knŭk kna, Dak Lak iêô mkrum êbeh 1542 êklai prăk hlăm 3 thŭn 2021-2023 čiăng ngă hdră kñăm ala čar mkŏ mkra krĭng ƀuôn sang mrâo.

Phạm Ngọc Nghị, Khua Knơ̆ng bruă sang čư̆ êa čar, Khua Anôk bruă dŭm Hdră kñăm ala čar čar Dak Lak bi mklă, hlăm wưng kơ anăp, čar srăng gĭr ruh mgaih klei dleh dlan êdu kƀah, čiăng kơ dŭm hdră mđĭ lar tŭ dưn hĭn. Hlăm anăn, bruă kơ lăn dôk mkra mjing hlăm krĭng mnuih djuê ƀiă srăng dưi mđing msir mgaih tal êlâo, rơ̆ng kơ mnuih ƀuôn sang djuê ƀiă hơĭt klei hdĭp mda:

        “Ară anei hlue si klei hưn mdah snăn hlăm brô 23% mnuih djuê ƀiă adôk kƀah hlăm ênoh mnuih djuê ƀiă, ƀiădah 65% mnuih djuê ƀiă hlăm ênoh mnuih ƀun ti čar, dŭm ênoh mrô prŏng. Ƀun snăn adôk lu mta phŭn êlâo hĭn jing arăng ăt lač kƀah lăn mkra mjing, lăn dôk, kƀah klei găl čiăng mnuih ƀuôn sang mkŏ mjing duh ƀơ̆ng. Hmei dôk kƀĭn kơ hdră mnuih djuê ƀiă snăn mđing tal êlâo mơ̆ng Bruă Đảng čar, Knơ̆ng bruă ăt jing lăn mkra mjing, lăn kơ mnuih djuê ƀiă. Hmei dưi ngă lu bruă mkăn ƀiădah mnuih ƀuôn sang mkra mjing, kƀah lăn dôk, kƀah kdrăp mnơ̆ng mkra mjing čiăng duh ƀơ̆ng snăn amâo yuôm bhăn ôh.”

 Mrâo êgao, ti ƀuôn prŏng Pleiku, ăt mkŏ mjing klei bi kƀĭn ksiêm wĭt boh tŭ hlue ngă Asăp mtrŭn mơ̆ng Anôk dlăng bruă Đảng čar Gia Lai kơ klei mđĭ bruă gĭt gao mơ̆ng dŭm dưl bruă Đảng kơ klei mkŏ mkra krĭng ƀuôn sang mrâo hlăm krĭng mnuih djuê ƀiă. Hlue si hưn mdah, 5 thŭn êgao, dŭm alŭ wăl hlăm čar iêô mkrum leh êbeh 1.500 êklai prăk čiăng pŏk ngă hdră mkŏ mkra krĭng ƀuôn sang mrâo hlăm krĭng mnuh djuê ƀiă. Hlăm anăn, prăk knŭk kna giăm 1.300 êklai prăk, prăk anôk bruă duh mkra đru giăm 24 êklai prăk, prăk yang ƀuôn đru mguôp êbeh 153 êklai, prăk brei čan 43 êklai 5 êklăk prăk. Leh 5 thŭn, ară anei kluôm čar mâo 110 alŭ, ƀuôn mnuih djuê ƀiă djăp hnơ̆ng čuăn krĭng ƀuôn sang mrâo, klei hdĭp mda mnuih ƀuôn sang ƀrư̆ dưi mđĭ.

 Khădah snăn bruă hlue ngă 3 hdră kñăm ala čar ti dŭm čar Lăn Dap Kngư ăt adôk lu klei dleh dlan; dŭm hdră bruă, boh phŭn ka dưi pŏk ngă leh anăn ruh mgaih kyua ka mâo klei ktrâo lač djăp ênŭm mơ̆ng Gưl dlông. Bruă ktuê dlăng, bi mklă hnơ̆ng kčah yap anôk mbha, bi mklă anăn hdră bruă bi liê adôk lu klei mtŭk mtŭl. Trương Thế Vinh, knuă druh ngă bruă djuê ana ti kdriêk Ia Grai, čar Gia Lai lač, knuă druh nah gŭ dôk tuôm hŏng lu klei dleh dlan hlăk êjai pŏk ngă hdră bruă:

“Mâo lu hră mơar mơ̆ng čar hmao mkă hŏng êlâo pŏk ngă hdră bruă, boh nik ti anôk bruă nah gŭ ka mâo klei ktrâo lač klă klơ̆ng. Boh nik Hdră bruă 1 đru kơ sang dôk, lăn dôk, lăn mkra mjing hlue ngă hdră mtrŭn 04 mơ̆ng Khua knŭk kna snăn đru lăn ti hnơ̆ng 44 êklăk/gŏ êsei leh anăn lăn mkra mjing 22 êklăk/gŏ êsei snăn dleh dưi pŏk ngă. Lăn mkra mjing kơ mnuih ƀuôn sang snăn ênoh yuôm, hŏng ênoh prăk đru snei leh anăn prăk brei čan snăn mnuih ƀuôn sang amâo dưi blei djăp ênŭm ôh ênhă lăn čiăng mkra mjing, mdơ̆ng sang”.

Ti Kon Tum, mrâo anei, êbeh 1000 čô êdam êra čar Kon Tum hgŭm Hdră bi tuôm, bi blŭ hrăm hŏng Khua Knơ̆ng bruă sang čư̆ êa čar, hŏng akŏ “Mđĭ lar bruă klam mơ̆ng phung êdam êra hlăm bruă hlue ngă dŭm Hdră kñăm ala čar ti čar Kon Tum”. Khua Knơ̆ng bruă sang êa čar Kon Tum Lê Ngọc Tuấn bi mklă, anei jing dŭm boh phŭn yuôm bhăn tă hdră kơ phung mda asei hlăm bruă hgŭm hlăm hdră phŭn čiăng đru hlue ngă tŭ dưn bruă duh mkra- ala ƀuôn thŭn 2023 ti čar. Čiăng kơ phung mda asei Kon Tum đru lu hĭn hlăm klei hlue ngă Hdră kñăm ala čar, Khua Knơ̆ng bruă sang čư̆ êa čar Kon Tum Lê Ngọc Tuấn, brei thâo:

“Anôk bruă êdam êra čar, dŭm anôk bruă êdam êra kdriêk, ƀuôn prŏng pŏk ngă dŭm hdră ngă bruă krĭ kdơ̆ng rơ̆ng klei tă hdră, klei tŭ dưn, klei kjăp, klei mbruă. Hlăm anăn kƀĭn hlăm bruă msĕ si klei hâo hưn mkŏ mkra krĭng ƀuôn sang mrâo, bi hrŏ ênoh gŏ êsei êdam êra ƀun, bi hgŭm mkŏ mjing mkra mđĭ êlan klông msĕ si kƀan, êlan krĭng ƀuôn sang. Mkŏ mjing dŭm gru hmô bi hgŭm mđĭ kyar bruă duh mkra phung êdam êra./.”