Mâo knuă druh, lĭng kahan kdông kahan knông lăn Đăk Long leh anăn khua knơ̆ng gĭt gai lĭng kahan knông lăn čar Kon Tum mđup brei hnư mnơ̆ng, jao sang dôk mrâo, A Trỏ, mnuih djuê ana Jeh Triêng, ƀuôn DỤc Lang, să Đăk Long, kdriêk Đăk Glei hơ̆k mơak êdi. A Trỏ brei thâo, thŭn anei ñu 84 thŭn leh, amâo mâo jhŏng mĭn ôh dưi dôk hlăm sang prŏng leh anăn kjăp msĕ sơnei:

 “Sang hđăp hjan êa ƀrôč, angĭn thŭt. Sang mrâo mâo knŭk kna đru 60 êklăk prăk, leh anăn mâo lĭng kahan knông lăn Đăk Lông klei tur sang, mdơ̆ng mtih, brei simăng kơ kâo leh anăn đru kâo amâo mâo mă prăk mưn, Mrâo rŭ mdơ̆ng sa mlan ƀiădah leh leh. Knŏng thâo lač jăk kơ diñu yơh”.

Să Knông lăn Đăk Long, kdriêk Đăk Glei, čar Kon Tum mâo êlan knông lăn taih êbeh 53 km bi knông hŏng ala čar Lào. Să mâo 2 kdông kahan knông lăn, Đăk Long leh anăn Rơ Long. Hluê ngă klei gĭt gai mơ̆ng bruă Đảng čar Kon Tum lăm lui sang dôk êjai, sang tĭ rưč kơ mnuih ƀuôn sang, 2 kđông kahan knông lăn bi mguôp hŏng bruă Đảng nah gŭ, bruă sang čư̆ êa să Đăk Long ksiêm dlăng hlăm grăp alŭ buôn, bi klă mâo 24 gŏ sang čiăng dưi lăm lui sang dôk êjai, sang tŭ rưč. A Thai, khua bruă đảng să Đăk Long brei thâo, hŏngk lei đru mơ̆ng knuă druh, lĭng kahan kdông kahan, truh hruê 1/3 să dưi rŭ mdơ̆ng leh 18 boh sang leh anăn gĭr êlâo kơ hruê 30/4 srăng dưi bi leh jih jang:

 “Bruă đang nah gŭ bi mguôp hŏng dŭm anôk bruă jưh hlăm hlăm alŭ wăl hlei pô ya dŏ mâo đru dŏ anăn. Boh nik ayŏng adei lĭng kahan đru hruê ai jing lu êdi. Êngao kơ năn lŏ iêo jak phung knuă druh, lĭng kahan đru ya dŏ mâo, bi mguôp prăk kăk đru kơ mnuih ƀuôn sang djuê ƀiă kpưn đĭ tlaih ƀuh hơĭt kjăp”.

Thượng tá Đặng Nguyên Hương, khua dlăng bruă Đảng, khua bruă kđi čar kđông kahan knông lăn Đăk Long, să Đăk Long, kdriêk Đăk Glei brei thâo:

 “Hluê ngă hdră lăm lui sang dôk êjai, sang tĭ rưč hlăm alŭ wăl, hmei mâo hdră mtrŭn, hdră êlan mtrŭt mjhar jih jang knuă druh, lĭng kahan nao hgŭm hlăm hdră anei. Bi mguôp kjăp hŏng gưl bruă đảng nah gŭ, bruă sang čư̆ êa alŭ wăl să Đăk Long tiŏ nao knuă druh đru klei tur sang, dŭ ba mnơ̆ng rŭ mjing. Êngap kơnăn, hmei lŏ đru simăng iêo mthưr phung mâo ai tiê kmah mkrum mguôp”.

Hrăm mbĭt hŏng gưl bruă đảng nah gŭ, bruă sang čư̆ êa 13 să knông lăn hlăm 4 kdriêk: Đăk Glei, Ngọc Hồi, Sa Thầy leh anăn Ia H’Drai, knuă druh, lĭng kahan dŭm kđông kahan knông lăn čar Kon Tum dôk hrăm mbĭt, đru kơ mnuih ƀuôn sang lăm lui sang dôk êjai, sang tĭ ƀrôč.

Đại tá Lê Minh Chính, khua dlăng bruă đảng, khua bruă kđi čar lĭng kahan knông lăn čar Kon Tum brei thâo, ktuê knông lăn taih êbeh 292 km bi knông hŏng ala čar Lào leh anăn Campuchia mâo 199 boh sang mơ̆ng mnuih ƀuôn sang jing sang dôk êjai, tĭ rưč leh anăn čiăng rŭ mdơ̆ng mrâo 145 boh sang. Amâo djŏ knŏng mguôp ai hŏng mnuih ƀuôn sang alŭ wăl hnưm bi leh mta kñăm lăm lui sang dôk êjai, sang tĭ rưč, knuă druh, lĭng kahan knông lăn lŏ gĭr đru kơ dŭm gŏ sang rŭ mdơ̆ng sang hŏng ênoh lu hĭn prăk knŭk kna đru.

 “Êngao 60 êklăk prăk anăn hmei lŏ bi mkrum mguôp prăk mơ̆ng knuă druh, lĭng kahan knông lăn čar Kon Tum, dŭm knơ̆ng bruă, phung mâo ai tiê kmah čiăng kơ grăp boh sang mâo ênoh mơ̆ng 85, 90 êklăk prăk kơ dlông. Sang dôk jing sa hdră yuôm bhăn hŏng klei hdĭp mnuih ƀuôn sang čiăng kơ digơ̆ mâo sang dôk kjăp, siam leh anăn hơĭt kơ mnuih ƀuôn sang”.

Hŏng klei hrăm mbĭt, klei đru mơ̆ng knuă druh, lĭng kahan knông lăn, bruă rŭ mdơ̆ng mrâo, mkra bi jăk 199 boh sang dôk êjai, sang tĭ rưč ti 13 să knông lăn mơ̆ng čar Kon Tum dôk dưi bi pral. Hlăm anăn, lu să mdưm mta kñăm bi leh bruă lăm lui sang dôk êjai, sang tĭ rưč kơ mnuih ƀuôn sang êlâo kơ wưng hruê 30/4 tŭ drông bi hdơr 50 thŭn sau wĭt klei êngiê kwar Dhŭng, hluh hlir lăn čar. Truh jih mlan 2 mrâo êgao, čar Kon Tum dưi bi lie 879 hlăm 2.725 boh sang dôk êjai, sang tĭ rưč čiăng rŭ mdơ̆ng mrâo leh anăn mkra wĭt.